Գյումրիի ինֆեկցիոն հիվանդանոցը «Գյումրի» ԲԿ-ին միավորելու նախագիծը քննարկման փուլում է

Շիրակի մարզում քննարկվում է Գյումրիի ինֆեկցիոն հիվանդանոցը «Գյումրի» բժշկական կենտրոնին միավորելու նախագիծը: Այս մասին ինֆեկցիոն հիվանդանոցի աշխատակազմը օրեր առաջ է տեղեկացվել: Նախագիծը մի քանի հիմնավորում ունի: Նախ այն, որ Գյումրիի ինֆեկցիոն հիվանդանոցը, որն ունի 40 մահճակալ, տարվա մեծ մասն աշխատում է թերբեռնված: Հաջորդ հիմնավորումն այն է, որ բուժհաստատությունների միավորման արդյունքում ինֆեկցիոն հիվանդանոցում հոսպիտալացվածներին հասանելի կդառնա բազմապրոֆիլ բուժօգնությունը:

«Ինֆեկցիոն հիվանդանոցի հիվանդները շատ քիչ են, եթե չլինի  COVID 19-ը: Կորոնավիրուսով հիվանդներին բուժելու համար վերապրոֆիլավորման ժամանակ էլ պետք է խնդրեն, որ մեր հիվանդանոցից  նեղ մասնագետներ գնան իրենց մոտ հիվանդներին հետազոտեն, բուժօգնություն ցուցաբերեն: Իհարկե այդ ամենն անվճար չէ, պայմանագրային հիմունքներով ենք աշխատում: Մենք միշտ օգնել ենք ինֆեկցիոնին: Միավորման ծրագրին ծանոթ եմ, որպես նախագիծ: Եթե վերջնական հավանություն տրվեց մարզի կողմից ու գնաց Երևան, կառավարության որոշման մեջ նոր կնշվեն ժամկետներ: Գյումրիի ծննդատան, պաթոլոգաանատոմիական լաբորատորիայի և ուռուցքաբանական դիսպանսերի «Գյումրի» բժշկական կենտրոնին միավորվելու որոշման ժամկետը նշված է հունիսի 1-ը:Այն կիրականացվի: Հաջորդ էտապում ինֆեկցիոնի միավորումն է: Չեմ կարող ասել, վերջնական ինչ որոշում կկայացնեն: Բայց կրճատումների մասին խոսք չկա, շենքի կրճատում չկա: Նախադեպը Գյումրիի ծննդատունն էր, որ միավորվելու է՝պահպանելով շենքը, աշխատողները մնում են իրենց տեղում:Ավելի շատ վարչական մասում են փոփոխություններ լինում»,-ShantNews-ին ասել է «Գյումրի» բժշկական կենտրոնի տնօրեն Արմեն Իսահակյանը:

Քանի դեռ նախագիծը քննարկվում է, ըստ Արմեն Իսահակյանի, ժամկետներ  չեն նշվում, թե երբ է միավորման գործընթացը տեղի ունենալու: Առայժմ ինֆեկցիոն հիվանդանոցն  աշխատելու է 40 մահճակալ հզորությամբ: Այսօրվանից այն կրկին վերապրոֆիլավորվել է և ընդունում է COVID 19-ով հիվանդներին:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։