Գյումրիում COVID-ով հիվանդներին ընդունող բուժհաստատությունները նորից վերապրոֆիլավորվել են

Կորոնավիրուսով հիվանդացության թվերի աճով պայմանավորված՝ հանրապետությունում ավելացել են COVID-19-ով պացիենտներին ընդունող հիվանդանոցները: Վերաբացվել է նաև «Գյումրի» բժշկական կենտրոնի COVID բաժանմունքը: Այն գործում է մարտի 17-ից:

«Գյումրի» բժշկական կենտրոնի երկրորդ հարկում COVID-19 ցուցանակը վկայում է՝ դռներից այն կողմ բարձր ռիսկային գոտի է, մուտքը թույլատրելի է միայն բուժաշխատողների համար, այն էլ միայն հատուկ դիմակներով ու պարտադիր ախտահանումից հետո:

«Գյումրի» բժշկական կենտրոնի  COVID բաժանմունքը փակվել էր հունվարին, հիմա դրա անհրաժեշտությունը նորից է առաջացել: Կորոնավիրուսով հիվանդացության թվերն աճում են՝ հոսպիտալացման կարիք ունեցող հիվանդները շատ են:

«Շատ են քրոնիկական հիվանդություններով հոսպիտալացվածները: Ունենք նաև առաջնակի հիվանդներ, որոնց մոտ ուղեկցող հիվանդություններ չկան, բայց կորոնավիրուսը ծանր թոքաբորբ է առաջացրել: COVID բաժանմունքը նախատեսված է 50 մահճակալի համար, բայց մենք ավելին  ենք տեղադրել, որ կարողանանք ապահովել բուժսպասարկում: Այսինքն՝ մոտ 60 մահճակալ ունենք, ևս 13 մահճակալ տրիաժ բաժանմունքում է»,- ShantNews-ին ասել է «Գյումրի» բժշկական կենտրոնի փոխտնօրեն Արմեն Խաչատրյանը:

Որպես կորոնավիրուսի թողած հետևանք՝ թոքաբորբ ունեցող հիվանդները բուժվում են Գյումրիի ինֆեկցիոն հիվանդանոցում: Այն հիվանդներն են, որոնց թեստավորման պատասխանը բացասական է, այսինքն՝ վիրուսն արդեն չկա, բայց թոքաբորբը՝ որպես հետևանք, մնացել է:

Այսօրվանից Գյումրիի ինֆեկցիոն հիվանդանոցը ևս  կորոնավիրուսով հիվանդների է ընդունում: Նախկին հակատուբերկուլյոզային բաժանմունքի մասնաշենքն է նորից հատկացվել  կորոնավիրուսով հիվանդների բուժման համար:

«Այսօր երկու հիվանդ ենք արդեն ընդունել հակատուբերկուլյոզային նախկին բաժանմունքի մասնաշենքում: Ցանկացած վարակաբան կարող է փաստել, որ առաջին հերթին վարակիչ հիվանդները պետք է առանձին հիվանդանոցում լինեն: Սպասում էինք, որ մեր հիվանդանոցը նորից վերապրոֆիլավորվելու էր, քանի որ հետևում էինք թվերի աճին ու հիվանդանոցներում տիրող իրավիճակին»,- ShantNews-ին ասել է Գյումրիի ինֆեկցիոն հիվանդանոցի վարակաբան Հեղինե Հունանյանը:

«Գյումրի» բժշկական կենտրոնում բաժանմունքը վերաբացելու որոշումը պայմանավորված է հոսպիտալացվող քրոնիկական հիվանդություններ ունեցողներով, սա նշում է «Գյումրի» կենտրոնի տնօրենը: Կորոնավիրուսով վարակված ու ուղեկցող հիվանդություն ունեցողներին, ըստ նրա, բազմապրոֆիլ բժշկական օգնություն է անհրաժեշտ:

« Երբ տվյալ հիվանդները ինֆեկցիոն հիվանդանոց էին տեղափոխվում, մեր մասնագետներին էինք ուղարկում: Պայմանագրով աշխատում էին: Հիմա, երբ այդ հիվանդները մեզ մոտ են բուժում ստանում, այդ անհարմարությունները չկան»,- ShantNews-ին ասել է «Գյումրի» բժշկական կենտրոնի տնօրեն Արմեն Իսահակյանը:

Վերաբացման 2 օրերի ընթացքում «Գյումրի» բժշկական կենտրոնի COVID բաժանմունքում արդեն մոտ 50 հիվանդ է հոսպիտալացվել, որոնք ոչ միայն Շիրակի մարզի բնակիչներ են, այլև Լոռու, Տավուշի, Գեղարքունիքի ու Արագածոտնի մարզերից են տեղափոխվել:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։