30 հազարից ավելի եզակի գտածոներ պահվում են փակ արկղերում․ Շիրակի երկրագիտական թանգարանին հատկացված շենքի վերակառուցման նախագիծ է կազմվում

2018 թվականին Գյումրիի Գյուլբենկյանի անվան նախկին վիրաբուժական հիվանդանոցի շենքը անհատույց և անժամկետ  հատկացվեց Շիրակի երկրագիտական թանգարանին: Եռահարկ կառույցը հիվանդանոցների օպտիմալացումից հետո դատարկ էր, կառավարությունը որոշեց պետական գույքը վերածել թանգարանի։ Հատկացումից երեք տարի անց շենքում ոչինչ արված չէ, 2018 թվականից մինչև հիմա աշխատանքները մնում են նախագծային փուլում։

1930 թվականին հիմնված Շիրակի երկրագիտական թանգարանը գործունեության 91 տարիների ընթացքում չի ունեցել սեփական շենքը։ 30 հազար ցուցանմուշները 30 տարուց ավելի փակ արկղերում են՝ մշտական  ցուցադրություններից զրկված։ Քաղաքի նախկին «Չափ ու կշեռքի» նեղլիկ ու մութ սենյակներով շենքում են պահում Շիրակի դաշտավայրի բացառիկ գտածոները, որոնք ամեն տարի պեղումների արդյունքում ավելանում են։

Բայց 30 տարի շարունակ քաղաքի մի քանի շինություններ մատնացույց էին արվում, քննարկվում, որպես թանգարան դարձնելու համար, հետո առաջարկները կամ մերժում էին, կամ էլ մերժվում։ Հիվանդանոցի նախկին շենքի պարագայում ևս նման մոտեցումներից հեռու չէին։

««Գյուլբենկյանի» շենքի նկատմամբ եղել են շատ լուրջ ախորժակներ՝ հյուրանոց, հանգստի տարածք, «Պոլիտեխնիկականին» հատկացնելու մտքեր են եղել, ես էլ հետևողականորեն մտածել եմ, որ քաղաքի պատմական կենտրոնում էդ շենքը՝ թանգարանի նախկին վայրից ոչ հեռու, կարող է իսկապես ծառայել որպես թանգարան, որովհետև չեմ տեսել, որ պետությունն իր ՊՈԱԿ թանգարանի համար՝ Շիրակի երկրագիտական թանգարանի համար մի բան անի, 30 տարի մատը մատին չի խփել»,- Shantnews.am-ին ասել է  Գյումրիի ավագանու անդամ Լևոն Բարսեղյանը։

Եռահարկ շենքն, ի վերջո, թանգարանայինի վերածելու որոշումն ուժի մեջ մտավ 2018 թվին, բայց առանց  ֆինանսական միջոցներ ուղղելու։ Գործի մեկնարկի տարբերակ համարվեց  հանգանակությունը։ Միայն նախնական աշխատանքների համար պահանջված գումարը 50 մլն դրամ էր, իսկ  հանգանակվածը՝  15 միլիոն, որով էլ  թանգարանի տնօրենը  նշեց, որ  նոր միայն սկսվել է նախագծումը։ Իսկ  կրթության, գիտության, մշակույթի և սպորտի նախարարությունից էլ ստացանք այլ տեղեկություն, որ  նախագծման աշխատանքները անհատ բարերարի միջոցներով են տարվում։

«Ինքն անհատ, մասնավոր ներդրող է, բարերար՝ էսպես ասենք։ Ինքը գումար է հատկացրել, որպեսզի էդ հիվանդանոցի շենքը վերականգնվի և դառնա երկրագիտական թանգարան»,- SHANTNEWS.am-ի հետ զրույցում նշել է ԿԳՄՍ նախարարության հուշարձանների վերականգնման բաժնի գլխավոր մասնագետ Լուսինե Իգիթյանը։

Շիրակի երկրագիտական թանգարանի տնօրեն Արտաշես Բոյաջյանը այլ բան է պնդում՝ հակառակ  նախարարության պատասխանատուի ասածների, և իր մոտ եղած  ունեցած պայմանագրերով կարող է  փաստել, որ հանգանակված գումարով է կատարվում նախագծումը, և մասնագետներն արդեն ուսումնասիրություններն ու չափագրումներն ավարտել են շենքում։

«Էդպիսի բան չկա․ նախագծային աշխատանքների հետ կապված ուզում եմ ասել, որ Շիրակի մարզի և Հայաստանի ոչ մի խոշոր գործարար կամ բարերար ոչ մի լումա չի ներդրել, դրամահավաքին չի մասնակցել»։

Հիմա նաև շենքի պահպանության հարցն է թանգարանի պարտավորությունը, որն անցած տարվանից տրվել է իրենց։ 9 տարի դատարկ մնացած 3000 քառակուսի մետր մակերեսով  շենքից թե ինչեր են պակասել ու ինչ վիճակում է հանձնվել շենքը թանգարանի պահպանությանը, տնօրենը շատ չի մանրամասնում, բայց դժգոհում է, որ միջոցներ չունեն շուրջօրյա պահակություն անելու համար։

«Մենք այստեղ ամեն շաբաթ այցելում ենք, հետևում շենքի պահպանությանը։ Հատուկ գումար հատկացված չէ, էդ հաստիքը չունենք պահակների, որ իրենց տեղում լինեն ու պահպանեն, բացի դրանից, պայմաններ էլ չկան շենքում՝ ո՛չ էլեկտրականություն կա, ո՛չ էլ ջեռուցում»,- ասում է թանգարանի տնօրենը։

Նախագծման աշխատանքների համար 18 շաբաթ է նախատեսված, որից հետո այն դեռ կառավարության հաստատմանն է ուղարկվելու։ Նախագծման ու այլ փաստաթղթերի կազմման գործընթացը միայն մեկնակետն է, բուն շինարարությանը հասնելու համար, ըստ նախնական հաշվարկների, կպահանջվի մոտ 2 միլիոն դոլար։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom , HAY-NET ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։