Սահմանափակ կարողություններով ոսկերիչը երբեք չընկճվելու օրինակ է ցույց տալիս

Սահմանափակ կարողությունները կյանքում կրթութուն ստանալու, մասնագիտություն ու նախասիրություններ ընտրելու սահմանափակումներ չեն կարող մտցնել: Սրանք ոչ թե խոսքեր են, որոնք ներառականությունն են քարոզում, այլ ապրելակերպ ու սկզբունք, որին արդեն 22 տարի հետևում է Հովունի գյուղի բնակիչ Արամ Մարտիրոսյանը:

13 տարեկանում Հովունի գյուղում Ռուսական ռազմաբազայի զորավարժությունների համար նախատեսված տարածքում գտած արկի հետ անզգույշ վարվելու հետևանքով կորցրել է ոտքը, ձեռքը և մյուս ձեռքի 3 մատները։

Արամը ֆիզիկական ու հոգեբանական ապաքինման լավագույն օրինակներից է: Առանց վերջույթների երկու տասնամյակ է սպորտով է զբաղվում, մի քանի մասնագիտություններում է իրեն փորձել:Հիմա, գուցե անհավանական թվա, սկսել է զբաղվել ոսկերչությամբ: Մանրակրկիտ ձեռքի աշխատանք պահանջող արհեստը Արամը հաջողությամբ յուրացնում է ու աշխատում  աջ ձեռքի  ընդամենը երկու մատով:

Հովունի գյուղից Գյումրի՝ ոսկերիչ վարպետի արհեստանոց…մեկ տարուց ավելի է սա Արամի ամենօրյա երթուղին է: Իսկ ամեն ինչ սկսվել է այն օրից, երբ Արամին փողոցում հանդիպել է վարպետ Հարությունը և առաջարկել նոր մասնագիտություն ձեռք բերել: Առաջին հարցը, որ առաջացել է, դա ոսկերչական գործիքները Արամի համար հարմարեցնելն էր:

Ոչ բոլոր գործիքներն է հնարավոր եղել  հարմարեցնել հատուկ կարիքներով աշակերտին: Արամի ձեռքում հումքը հալեցնելու, հարթեցնելու և մաքրելու հարմարանքները աշխատում են նույնքան վարժ, որքան հմուտ ոսկերիչները:

« Վարպետիս առաջարկն ընդունելուց առաջ երկար եմ մտածել: Մտածում էի, եթե չստացվի, բայց որոշեցի գալ ու փորձել: Մեջս կռիվ տալով ես անում եմ այս գործը: Այնպիսի գործեր եմ անում, որոնք պետք է, որ երկու ձեռքով բռնես: Հարմարեցնում եմ ինձ: Տեսնողներն էլ զարմանում են: Ինքդ քո մեջ հոգեբանական ուժ պետք է գտնես: Եթե քեզ կոտրեցիր, կյանքին ուրիշ ձևի կնայես: Իսկ ես , փառք աստծո, կյանքին ավելի պայծառ եմ նայում»,-shantnews-ին ասել է Արամ Մարտիրոսյանը:

Աշխատել բոլորի հետ հավասար…

Սա Արամի համար սկզբունք է: Նույն վերաբերմունքին է արժանացել նաև ոսկերչական արհեստանոցում: Վարպետը նրա նկատմամբ նույնքան խստապահանջ է, ինչքան մյուս աշակերտների:

Արամի ձեռքի աշխատանքները վարպետն ավելի բարձր է գնահատում, ոչ նրա համար, որ դրանք ավելի գեղեցիկ են կամ նրբագեղ, այլ որ յուրաքանչյուր զարդը Արամի կամքի մեծ ուժի ու քրտնաջան աշխատանքի արդյունքն է:

«Արամի չարչարանքը շատ-շատ է: Դրա համար իր աշխատանքը պետք է սիմվոլիկ գնահատվի: Արամն աշխատում է ընդամենը երկու մատով: Արամին տեսնելով զարմանում ես նրա կամքի ուժի վրա: Մենք որոշել ենք 20 խաչ պատրաստել ու նվիրել վիրավոր զինվորներին: Ինչու խաչ,որովհետև այս իրավիճակում նրանց կարող  է օգնել միայն աստված ու իրենց կամքը: Իսկ օրինակը Արամը կարող է լինել»,– shantnews-ին ասել է ոսկերիչ Հարություն Հովսեփյանը:

Պատերազմի ավարտից հետո Արամն ու իր վարպետը սկսել են խաչեր պատրաստել: Դրանք նախատեսված են պատերազմի ընթացքում վիրավորում ստացած տղաների համար: Խաչերի հետ Արամը նրանց է փոխանցելու երբեք չվհատվելու, չընկճվելու, նորից ապրելու համար ուժ գտնելու իր օրինակը: 20 խաչ են պատրաստելու: Դրանք մեկ առ մեկ Արամն ինքն է ձուլում ու փայլեցնում:

«Տղաները չպետք է կոտրվեն: ես 22 տարի այս վիճակում եմ ու շատերին եմ խորհուրդ չկոտրվել, չընկճվել: Եղել է այն ինչ եղել է , իրենք հիմա պետք է իրենց մեջ ուժ գտնեն, իրենք իրենց հոգեբանը դառնան ու վստահ լինեն, որ ամեն ինչ դեռ առջևում է »,- նշել է Արամ Մարտիրոսյանը:

Արամի կամքի մեծ ուժի արտահայտությունը նաև նրա մարզական հաջողություններն են: Բազկամարտի Հայաստանի չեմպիոն է: Նաև ծանրամարտով ու սեղանի թենիսով է զբաղվել: Բժիշկների ցուցումով ծանրամարտը թողել է,նորից վերադարձել բազկամարտին: Ընդմիջման ժամերին վարպետի հետ ձեռքի ուժն են չափում: Այստեղ արդեն վարպետը Արամն է:

Համառությունն ու աշխատասիրությունը Արամի հաղթանակների երաշխիքն են: Երեք տարի առաջ Արամն ամուսնացել է ու նաև անձնական կյանքում ապացուցել, որ սահմանափակ կարողությունները չեն զրկում նոր հնարավորություններից:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։