Շիրակի ներմարզային երթուղիներից սպասարկող ընկերությունները հրաժարվում են

Գյումրիի ավտոկայանի ներմարզային երթուղիների կայանատեղիներում ավտոբուսներն ու միկրոավտոբուսները գնալով պակասում են։ Ուղևորահոսքի նվազելու պատճառով երթուղին սպասարկող ընկերությունները մեքենաները գծից հանում են, քիչ երթուղով էլ շահույթ չեն ստանում: Գյումրիից Հայկավան երթուղին նախկինում 2  միկրոավտոբուս է սպասարկել՝ ժամը մեկ գրաֆիկով։ Հիմա մեկն է մնացել՝ գյուղ մեկնումն ու վերադարձը երկու ժամը մեկ է:

Քիչ ուղևորներով գրեթե բոլոր երթուղիներն են աշխատում, երբեմն առանց ուղևորի են գյուղեր հասնում ու հետ գալիս: Ներմարզային որոշ երթուղիների սպասարկումից  ընկերությունները հրաժարվում են։

« 5 երթուղի էս պահին չենք սպասարկում, սպասարկել ենք Իլին, Գառնառիճ, Ցողամարգը, Աշոցքի ձորի գյուղերը, Ամասիայից էլի գյուղեր, դրանք հիմա չենք սպասարկում, մի քանի ամիս առաջ էլ հրաժարվել ենք Գյումրի-Հովունի երթուղուց։ Քիչ է, ուղևորահոսք չկա, հետո էլ երթուղիներում տաքսիներն են շատացել: Նույնը նաև Գյումրի-Երևան երթուղին է, քիչ ուղևորներով գիծը պահում ենք»,- SHANTNEWS.am-ի հետ զրույցում ասել է Գյումրիի ավտոկայանի երթակարգավար Շիրակ Հովհաննիսյանը:

Ներմարզային երթուղու մրցույթ անցկացվել է  մեկ տարի առաջ, դրանից հետո Շիրակի մարզպետարանը մրցույթներ չի հայտարարում, բայց ոչ թե դրա անհրաժեշտությունը չի եղել, այլ մրցույթների կազմակերպումը այլևս  մարզպետարանների գործառույթը չէ: Ներմարզային երթուղիների սպասարկման մրցույթներ հայտարարելու և անցկացնելու լիազորությունը տարածքային կառավարման և ենթակառուցվածքների նախարարությանն է։

«2020-ի դեկտեմբերից փոխվել է մրցույթի անցկացման կարգը, նախկինում մարզպետարաններն էին հայտարարում մրցույթները, հիմա այլևս այդպես չէ, նախարարությունն է այդ գործառույթն իրականացնելու: Մեզ մնացել է միայն այն, որ եթե երթուղիների սպասարկման ժամկետները լրանում են, մենք երկարացնում ենք մինչև նոր մրցույթի հայտարարումը: Նոր կարգով դեռ հանձնաժողովներ չեն ձևավորվել, մարզպետարանից մեկ ներկայացուցիչ պիտի լինի»,- նշել է  Շիրակի մարզպետարանի տրանսպորտի և ճանապարհաշինության բաժնի պետ Խաչատուր Խնձրցյանը:

Մեկ այլ նոր  որոշում էլ կա, որը վերաբերում է խոշորացված համայնքներին, վերջիններիս ղեկավարներին լիազորություն է տրված իրենց համայնքների գյուղերի համար երթուղային ցանց ձևավորել: Ինչպես, ինչ կարգով ՝ հստակեցնելու է նախարարությունը և համապատասխան ծանուցումներ է ուղարկելու խոշորացված համայնքների ղեկավարներին։

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom,SHIRAK telecom  ցանցային օպերատորների կապուղիներով, ինչպես նաև  Shant Digital Tv հավելվածով՝ ամբողջ աշխարհում։