Գյումրիի թիվ 25 դպրոցում դասադուլը շարունակվում է, իսկ մանկավարժները անժամկետ գործադուլ են հայտարարել

Գյումրիի թիվ 25 հիմնական դպրոցում դասադուլն ու գործադուլը շարունակվում են: Մանկավարժներն ու ծնողները համաձայն չեն դպրոցի տնօրենի մրցույթի արդյունքների հետ, ըստ որոնց՝ տնօրեն է դարձել ոչ թե նույն դպրոցի ուսուցիչը, այլ թիվ 9 դպրոցի փոխտնօրենը: Օրեր առաջ ծնողներն ու մանկավարժները նորանշանակ տնօրենին թույլ չէին տվել աշխատանքային առաջին օրը մտնել դպրոց: Իսկ այսօր անարդյունք է անցել ծնողների, նորանշանակ տնօրենի և մարզպետարանի կրթության վարչության պետի հանդիպումը: Ծնողները պահանջում են չեղարկել մրցույթի արդյունքները։ Նորանշանակ տնօրենին ընտրել է փոխվարչապետը և հաստատել Շիրակի մարզպետը: 7-րդ օրն է՝ դպրոցի 700-ից ավելի աշակերտ դպրոց չի գնում:

Մրցույթի արդյունքներով թիվ 25 դպրոցի ուսուցիչ Մերուժան Մինասյանը ստացել էր կառավարման խորհրդի անդամներից 4-ի քվեն, իսկ թիվ 9 դպրոցի փոխտնօրեն Իրինա Բաղդասարյանի օգտին քվեարկել էր 2-ը: Ըստ կարգի, եթե թեկնածուներից որևէ մեկը 5 և ավելի ձայներ չի ստանում, ապա ընտրության իրավունքը վերապահվում է փոխվարչապետին: Անցած տարեվերջին պարզ դարձավ, որ փոխվարչապետը երկու թեկնածուներից ընտրել է ավելի քիչ ձայներ ստացածի: Կրքերն ավելի բորբոքվեցին, երբ անցած շաբաթ Շիրակի մարզպետը Իրինա Բաղդասարյանին նշանակեց տնօրենի պաշտոնում: Ծնողներն ու մանկավարժները փակեցին նրա մուտքը դպրոց: Իսկ այսօր առավոտյան ծնողները եկել էին դպրոց արդեն նոր տնօրենի հետ հանդիպելու:

«Նորանշանակ տնօրենը կանչեց մարզպետարանի  ներկայացուցիչներին, եկավ կրթության վարչության պետը: Նրա ու ոստիկանների ներկայությամբ տեղի ունեցավ հանդիպումը: Մենք ուզեցինք մեր հարցերը հղեինք իրեն, ինքը նույնիսկ չուզեց պատասխանել: Շատ կոպիտ ձևով, նույնիսկ մատ թափ տվեց ծնողների վրա: Այդ տոնով էր խոսում: Խնդրում ենք, որ  թույլ տան, որ մեր ձայնը հասնի մինչև վերև: Մարդիկ իմանան, որ այսօր 730 աշակերտ դպրոց չի գալիս: Կարծում եմ՝ դա հսկայական թիվ է»,- SHANTNEWS-ին ասել են թիվ 25 դպրոցի աշակերտների ծնողները:

Իրինա Բաղդասարյանը մեկնաբանություններից հրաժարվեց, միայն նշեց, որ իր նշանակումը օրենքին համապատասխան է: Դասադուլի հետևանքով 700-ից ավելի երեխա մեկ շաբաթ է՝ դասի չի գալիս: Ամենակարևոր հարցը՝ թե ինչպես վերականգնել դասապրոցեսը, անպատասխան է:

«Նախ պետք է գիտակցի յուրաքանչյուր ծնող, որ իր երեխան պետք է հաճախի դպրոց: Առավել ևս նման պայմանները պետք չի օգտագործել որևէ մեկի շահը պաշտպանելու համար: Այնպես չի, որ ձեռքներս ծալած նստել ենք: Այս պահին էլ աշխատանքային իրավիճակ է: Հրավիրել ենք ուսուցիչներին, որպեսզի զրուցելու արդյունքում հասկանանք՝ սա ինչ-որ մեկի ուղղորդո՞ւմն է, թե՞ պարզապես ծնողների ցանկությունն է»,-SHANTNEWS-ին ասել է Շիրակի մարզպետարանի կրթության, մշակույթի և սպորտի վարչության պետ Հրայր Կարապետյանը:

Կրթության վարչության պետը նշում է՝ ծնողների պահանջը բավարարել, այսինքն՝ մրցույթի արդյունքները չեղարկել, իրենք իրավասու չեն, բայց պարտավոր են դասապրոցեսը նորմալ հուն վերադարձնել: Այդ գործընթացն առայժմ սահմանափակվում է սրանով, որ ծնողների ու մանկավարժների հետ, ինչպես վարչության պետը նշեց, բացատրական աշխատանքներ են տանում:

«Մենք պատասխանատու ենք մեր մարզում յուրաքանչյուր հանրակրթական դպրոցի ուսումնական գործընթացը կազմակերպելու: Մնացած հարցերով, եթե ինչ-որ անհամաձայնություն կա, եթե բողոք կա, ես բազմիցս նշել եմ, միայն ու միայն դատական ճանապարհով կարող են դիմել, վիճարկել տվյալ հարցը»,- ասել է Հրայր Կարապետյանը:

Այսինքն՝ խորհուրդ է տալիս երեխաներին դպրոց բերել, մրցույթի արդյունքներն էլ դատարանում վիճարկել: Բայց դասերի վերսկսումն այսօրվանից ավելի բարդ է դարձել: Թիվ 25 դպրոցի մանկավարժական խորհուրդը նորանշանակ տնօրենին այսօր ներկայացրել է դիմում, համաձայն որի՝ ուսուցիչները անժամկետ գործադուլ են հայտարարել:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX ,ARPINET, Opticom ցանցային օպերատորների կապուղիներով։ Ինչպես նաև Shant Digital Tv հավելվածով ամբողջ աշխարհում։