Գյումրիի տնակային մանկապարտեզների շենքային խնդիրները վերջնական լուծված չեն․ մեկ մանկապարտեզ կշարունակի մնալ տնակներում

Գյումրին ինչպես բնակելի  տնակներից, այնպես էլ տնակային մանկապարտեզներից դեռ վերջնական չի ձերբազատվել։ Մեկ տարի առաջ քաղաքում տնակային մանկապարտեզների թիվը 3-ն էր, այսօր մնացել է մեկը։ «Զանգակ» մանկապարտեզն անցած տարվա հուլիսի ուժեղ ջրհեղեղից փլվեց, ինչն էլ արագացրեց նորը կառուցելու ծրագիրը, իսկ մյուսի՝ «Սուրբ Մարիամ» մանկապարտեզի համար կառուցման ծրագիրն ավելի վաղ էր հաստատվել։ Այժմ միակ տնակայինը՝ խիտ բնակեցված Արցախ թաղամասում (նախկին անունը՝ թուրքի մայլա ) մնում է «Ծիածան» մանկապարտեզը։

Այստեղ 30 տարում ոչինչ չի փոխվել, ընդամենը մասնակի, կոսմետիկ նորոգումներով մանկապարտեզ են պահում։ Կատարված մեծ փոփոխությունը այս տարիների ընթացքում վառելահեղուկի վառարանից անցումն է եղել գազաֆիկացված ջեռուցման։

Ամիսներ առաջ թվում էր՝ քարաշեն կառույցով ապահովելու խնդիրը մոտ է լուծման։ Որոշվել էր «Ծիածան»-ին հատկացնել  նախկին թիվ 10 մանկապարտեզի շենքը, որը 30 տարուց ավելի է բնակեցված է։ Նախկին մանկապարտեզի երկհարկանի շենքը չորս կողմից պարսպապատված է, մուտքը՝ արգելված, պատկանում է մեկ ընտանիքի, իսկ շենքի առաջին հարկում  սպասարկման օբյեկտներ են: Նախկին մանկապարտեզի շենքն անհատի կողմից սեփականաշնորհվա՞ծ է, թե՞ ոչ, հարցը քաղաքապետարանի իրավաբանական բաժինը դեռ ուսումնասիրում է:

Տնակային մանկարապարտեզի տեղում նորը կառուցելու առաջարկը մերժվել է։ ՀՀ տարածքային կառավարման և ենթակառուցվածքների նախարարության մասնագետների  ուսումնասիրությունների հիման վրա կազմված եզրակացությամբ՝ տարածքն անհամապատասխան է տիպային շենք կառուցելու համար։

Մյուս 2 տնակային մանկապարտեզների համար թույլատրվեց տնակների տեղում նորերը կառուցել։ «Սուրբ Մարիամ» մանկապարտեզի շինարարական  աշխատանքների 60 տոկոսն արդեն կատարված է: Տարածքային զարգացման հիմնադրամի 200 մլն և համայնքի 20 մլն դրամ համաֆինանսավորմամբ շենքի կառուցումը կավարտվի ամռան կեսին։

«Զանգակ» մանկապարտեզի, որը ջրհեղեղի հետևանքով փլվել էր, աշխատանքները նույնիսկ նախապատրաստական փուլին չեն հասել:

Այժմ երկու մանկապարտեզների  աշխատակազմը պարապուրդում է։ Դայակները, դաստիարակները, բուժքույրերը  հարկադիր պարապուրդի դիմաց չեն վճարվում, աշխատավարձ ստանում են միայն  տնօրեններն ու հաշվապահները։ Նրանք աշխատանքի  մեջ են գրեթե ամեն օր՝ շինարարության գործընթացում  փաստաթղթային ու այլ գործառույթներով են զբաղված:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX  և Opticom ցանցային օպերատորների կապուղիներով։ Ինչպես նաև  Shant Digital Tv հավելվածով ամբողջ աշխարհում։