Ֆրանսիական լեգիոնում ծառայած գյումրեցի երիտասարդը հայրենիքում ռազմական գործի դասընթացներ է նախաձեռնել

Արցախյան երկրորդ պատերազմում սփյուռքից շատ կամավորականներ, նրանց թվում՝ պատրաստված զինվորականներ շտապեցին առաջնագիծ։ Ֆրանսիական լեգիոնում զինվորական բարձր պատրաստություն անցած գյումրեցի Լևոն Մհլամյանը Մարսելում թողել է ընտանիքը, աշխատանքը ու եկել Արցախ: Մասնակցել է Մարտակերտի ու Ստեփանակերտի պաշտպանությանը: Հիմա էլ ֆրանսիական լեգիոնում ծառայության տարիներին կուտակած փորձը, դասընթացների միջոցով, փոխանցելու է բոլոր ցանկացողներին:

Հյուրասենյակի մի անկյունում ծանր ուսապարկն է ու առաջին բուժօգնության պարագաներով լի պայուսակը: Զինվորականը միշտ պատրաստ պետք է լինի: Սա ֆրանսիական լեգիոնում ծառայություն անցած Լևոնի համար սկզբունք է, անկախ նրանից, որ վաղուց զինվորական աշխատանքը թողել է, բայց ինչպես ասում է, լեգիոներները նախկին չեն լինում: Լևոնը մասնագիտացել է մարտի դաշտում առաջին բուժօգնություն ցուցաբերելու գործում: Այստեղ էլ մանրուքները կարող են կյանք փրկել:

Այս ամենը Լևոնը սովորել է ֆրանսիական լեգիոնում: Այն էլիտար զորամիավորում է, որը ֆրանսիական բանակի մաս է կազմում: Լեգիոնում ֆրանսիացիները միայն հրամանատարական կազմում են, իսկ զինվորագրվում են բացառապես օտարերկրացիներ:

150 երկրի ներկայացուցիչների հետ է Լևոնը ծառայել: Սա համարում է բացառիկ կարգապահության օրինակ, երբ իրար լեզու չհասկացող զինվորականները համագործակցում են:

«Ինձ լեգիոն գուցե տարավ ռոմանտիզմը, ռազմական կյանքը և այդ կառույցի հնչեղությունը: Շատ լավ գիտեի, որ լեգիոնը լավ պատրաստվածություն է տալիս և իմ խորին համոզմամբ ամեն մի հայ տղամարդ պետք է տիրապետի զենքին: Լեգիոնի կարգապահությունը աշխարհում շատ քիչ բանակներ ունեն: Պատկերացրեք այդքան ազգություններ իրար հետ շատ լավ համագործակցում են: Դա հենց կարգապահությունն է»,– Shantnews-ին պատմել է Լևոն Մհլամյանը:

Լևոնը Մարսելում է թողել կնոջը, 8 ամսական որդուն ու Արցախ հասել պատերազմի առաջին օրերին: Մարտական ուղին Արցախում սկսել է Մարտակերտից, միացել է տեղի ջոկատին ու առաջինը նրանց է փոխանցել լեգիոնում ստացած գիտելիքները: Մարտակերտի իրենց ջոկատը կորուստներ չի ունեցել: Սա համարում է հրամանատարների պատրաստվածության արդյունքը: Նշում է՝ հայկական բանակը մեծ պոտենցիալ ունի, որին արտերկրում կրթություն ստացած զինվորականները մեծապես կարող են օգնել:

«Մենք մեր սփյուռքի պոտենցիալը լավ չենք գիտակցում: Ոչ միայն ֆրանսիական լեգիոնում, այլ նաև Իսրայելում ծառայող հայեր կան, Գերմանիայում ծառայող հայեր կան, ամերիկյան բանակում կան: Դա հսկայական փորձ է: Կարող ենք համատեղել և ստեղծել մեր հայկական հատուկ նշանակության ջոկատները, որոնք կլինեն գերպրոֆեսիոնալ: Ինչքան ուզում ես պրոֆեսիոնալ դարձրու զինվորականին, եթե խիզախ չեղավ, մի բան թերի կլինի: Իսկ մեր խիզախ տղերքին, եթե պրոֆեսիոնալ պատրաստվածություն տաս, մեր բանակի նման ուժեղ բանակ չի լինի, դա հավաստիացնում եմ: Այն ինքնազոհությունը, որը ես տեսա Արցախում՝ 18-20 տարեկան տղաների մոտ, աշխարհի որևէ բանակում չեմ տեսել»,– ասել է Լևոն Մհլամյանը:

Քանի դեռ Հայաստանում է, Լևոնը որոշել է դասընթացներ կազմակերպել բոլոր նրանց համար, ովքեր ուզում են մարտական պատրաստվածություն ունենալ և պատրաստ լինել ցանկացած իրավիճակների:

Շուտով Լևոնը Մարսել կվերադառնա, բայց նորից հետ գալու և բանակաշինությանը մասնակցելու հստակ որոշմամբ: Լևոնի և բոլոր նրանց համար, ովքեր պատերազմի օրերին կամավորագրվեցին, մեկ իրականություն կա՝ առաջնագիծն անցնում է յուրաքանչյուրի տան առջևով: Լևոն Մհլամյանը պարգևատրվել է «Մարտական ծառայություն» մեդալով:

 «Շանթ Գյումրի» հեռուստաալիքն այս պահին հասանելի է Rostelecom, Delta telecom, TeleMAX և Opticom ցանցային օպերատորների կապուղիներով։ Ինչպես նաև Shant Digital Tv հավելվածով ամբողջ աշխարհում։