Էկոնոմիկայի նախարարությունը սուբսիդավորված գնով սերմացուի տրամադրման ծրագրի համար ուսումնասիրում է գյուղերի պահանջարկը

Էկոնոմիկայի նախարարութունը ճշտում է, թե գյուղական բնակավայրերում տարբեր մշակաբույսերի սերմացուների ինչպիսի պահանջարկ կա: Սա անհրաժեշտ է հացահատիկային, հատիկաընդեղեն և կերային գարնանացան մշակաբույսերի արտադրության խթանման պետական աջակցության ծրագրի իրականացման համար: Գյուղերը նախնական հայտեր են ներկայացնում, եթե պահանջարկը մեծ եղավ, ծրագիրը կիրականացվի: Կառավարությունը կսուբսիդավորի սերմացուի գինը: Պայմանները ևս նախնական են՝ սուբսիդավորումը կկազմի 1 կգ սերմացուի գնի շուրջ 50 տոկոսը:

Գյուղերում հացահատիկի պահեստներում ցորենի ու գարու սերմացուներ են ամբարված: Անցած տարվա հացահատիկի բերքից առանձնացրել են ամենաորակյալը, գարնանը զտելու են , ախտահանելու են, որ նորից ցանեն: Սերմացուի որակից է կախված բերքատվությունը:

« Ընթանում են համայնքների հացահատիկային, հատիկաընդեղեն և կերային մշակաբույսերի պահանջարկի ճշգրտման աշխատանքները: Էկոնոմիկայի նախարարությանը պետք է ներկայացվի ըստ համայնքների գարնանացան գարու, վարսակի, հաճարի, հատիկաընդեղենի  և առվույտի սերմացուի նախնական պահանջարկը: Սերմացուի քանակից է կախված: Եթե քիչ եղավ պահանջարկը, իհարկե ծրագիրը չի իրականացվի: Ինձ թվում է, որ եթե տեսնեն պահանջարկ շատ , այդ դեպքում ծրագիրը կիրականացվի»,- shantnews-ին ասել է Շիրակի մարզպետարանի գյուղատնտեսության բաժնի գլխավոր մասնագետ Արամ Վարձելյանը:

Այսինքն նախնական հայտերի ընդունումը դեռ չի նշանակում, թե ծրագիրը հաստատված է ու գարնանը գյուղացիները սերմացու կստանան սուբսիդավորված գնով: Սուբսիդավորման պայմանները ևս նախնական են: Նախատեսվում է , որ սերմացուի 1 կգ-ի գնի շուրջ 50 տոկոսն է պետությունը փոխհատուցելու:

«Եթե գարնանացանի ծրագիրը հաստատվի, շուրջ 50 %-ով կսուբսիդավորվի: Շուրջ 50 %-ը դա հաստատված չէ, կարող է լինել 40 % , 30  % կամ 60 %: Ծրագիրը դեռ վերջնական հաստատված չէ»,- ասել է Արամ Վարձելյանը:

Նախորդ տարիներին նաև Արցախից էր հացահատիկի սերմացու ներկրվում: Հիմա, երբ հացահատիկի ցանքերի զգալի մասը Ադրբեջանի վերահսկողության տակ է անցել, սերմացուի պահանջարկը պետք է լրացվի Ռուսաստանից ներկրումով: Հատիկաընդեղենի մշակությամբ Շիրակի մարզի գյուղերում շատ չեն զբաղվում, իսկ գարու և ցորենի սերմացուի պահանջարկ միշտ է եղել:

Անցած աշնանը աշնանացան ցորենի պետական աջակցության ծրագիր իրականացվեց Հանրապետությունում: Գյուղացիների գնած սերմացուի մեկ կգ-ի արժեքի 70 դրամը սուբսիդավորեց կառավարությունը: Սա նպաստեց, որ մարզում աշնանացանի ցանքերը չպակասեն: իսկ գարնանացանի համար սերմացուի տրամադրման ծրագիր լինելու է, թե ոչ կհաստատվի մինչև փետրվարի վերջ: Մարտին Շիրակի մարզում գարնանացանն արդեն մեկնարկելու է: