Գյումրիի թիվ 25 դպրոցի մանկավարժները դժգոհ են տնօրենի թափուր տեղի համար անցկացված մրցույթի արդյունքներից

Գյումրիի թիվ 25 հիմնական դպրոցի մանկավարժներն ու կառավարման խորհրդի անդամները համաձայն չեն դպրոցի տնօրենի թափուր տեղի համար անցկացված մրցույթի արդյունքների հետ: Թիվ 25 դպրոցի տնօրենի կենսաթոշակային տարիքն է լրացել:Սա էր պատճառը, որ ուսումնական տարվա հենց սկզբին`սեպտեմբերի 15-ին դպրոցում տնօրենի ընտրություններ անցկացվեցին: Մասնակցության հայտ էր ներկայացրել 7 թեկնածու, բայց մրցութային փուլերը հաղթահարելուց հետո  հիմնական պայքարը ծավալվել էր երկուսի՝ նույն դպրոցի ուսուցիչ Մերուժան Մինասյանի և Գյումրիի թիվ 9 դպրոցի փոխտնօրեն Իրինա Բաղդասարյանի միջև: Կառավարման խորհրդի անդամների քվեարկության արդյունքում, սակայն, տնօրեն չի ընտրվել:

«7 թեկնածուներից 5-ը ձայներ չեն ստացել: Մեր դպրոցի պատմության ուսուցիչ Մերուժան Մինասյանը ստացել է 4 ձայն, իսկ իրինա Բաղդասարյանը՝ 2 ձայն: Ընտրությունից պարզ էր, որ թեկնածուներից մեկը ձայների կրկնակի առավելություն ունի, չնայած որ,բավարար ձայներ չէր հավաքել, բայց դա կարող ենք պայմանավորել նաև բացականերով»,- նշում է  է Գյումրիի թիվ 25 հիմնական դպրոցի ուսուցիչ Թաթուլ Խաչատրյանը:

Կառավարման խորհուրդը 8 անդամ ունի: Մրցույթի օրը նրանցից 6-ն են ներկա եղել: Կառավարման խորհրդում մարզպետարանի ու քաղաքապետարանի ներկայացուցիչները բացակայել են : Սա էլ, ըստ մանկավարժների, ազդել է մրցույթում ձայների համամասնության վրա:

Ըստ այդմ երկու թեկնածուների միջև ընտրության իրավունքը վերապահվել է փոխվարչապետին: Նոյեմբերի 27-ին հեռավար հարցազրույց է տեղի ունեցել թեկնածուների հետ, արդյունքում՝ Գյումրիի թիվ 25 դպրոցի տնօրեն է նշանակվել թիվ 9 դպրոցի փոխտնօրենը:

«Ես մեր 4 ձայները համադրում եմ 2-ի հետ ու ես գիտեմ, որ 4-ը անպայման մեծ է 2-ից: Եթե իրենք թվաբանական ուրիշ համակարգով են հաշվել, թող բացատրություն տան:Եթե մեզ հաշվի չեն առել, կառավարման խորհրդում մեր ձայները կապ չունեին, ապա իմաստ չուներ ընտրության անցկացումը»,- ասում է Գյումրիի թիվ 25 դպրոցի կառավարման խորհրդի անդամ Շուշան Տոնոյանը:

Կառավարման խորհրդի անդամները պահանջում են բացատրություն, թե ինչ չափանիշներով է կատարվել ընտրությունը, երբ իրենց դպրոցի ուսուցիչը 20 տարվա աշխատանքային փորձ ունի և մրցույթի ընթացքում կրկնակի ավելի ձայներ է ստացել մյուս թեկնածուից, ում փոխվարչապետը նշանակել է տնօրենի պաշտոնում:

«Եթե նշանակովի էր դպրոցի տնօրենը, ուրեմն թող նշանակեին: Էլ ի՞նչ իմաստ ուներ բեմականացումը՝ ընտրությունը , երբ ընտրության հենց սկզբից մեր խորհրդի նախագահը՝ Պալյան Էմման, ընտրությունը տարավ  դեպի նշանակում: Եթե պատճառը վարչական աշխատանքի փորձի պակասն է, որը չունի մեր թեկնածուն՝ Մերուժան Մինասյանը, թող տնօրենի հավաստագրի համար դիմելուց այդ կետը նշեին, որ պետք է անպայման վարչական աշխատանքի փորձ ունենան թեկնածուները»,-նշում է  Գյումրիի թիվ 25 դպրոցի կառավարման խորհրդի անդամ Մարինե Գրիգորյանը:

Թիվ 25 դպրոցի մանկավարժական հանրույթը, մինչև որոշում կայացնելը, դիմել էր փոխվարչապետին, որ թեկնածուներից որևէ մեկին նախապատվություն տալուց  իրենց կարծիքը ևս հաշվի առնեն: Պատասխան այդպես էլ չեն ստացել: Հիմա, երբ տնօրենն արդեն ընտրված է, նորից են նամակ գրել, վարչապետին ու փոխվարչապետին: Այս անգամ պահանջում են ուսումնասիրել իրենց բարձրացրած հարցերը և անհրաժեշտության դեպքում նոր մրցույթ անցկացնել: