Արսեն Թորոսյանը վիճակագրություն է ներկայացրել ու վստահեցրել, որ պատվաստանյութի խնդիր չի լինի

Այսօր կառավարության նիստի ժամանակ անդրադարձ է եղել նաև նոր կորոնավիրուսի՝ Հայաստանում տիրող իրավիճակին:

«Հիվանդանոցային ֆոնդի ծանրաբեռնվածությունն արդեն տանելի է: Մենք երեկվանից չունենք քաղաքացիներ, որոնք գտնվում են ծանր վիճակում, և մենք նրանց չենք կարողանում տեղավորել, հույս ունենք, որ այս իրավիճակը մոտակա մի քանի շաբաթներին կպահպանվի, իհարկե, մեր ազգաբնակչության օգնությամբ, քանի որ կանոնների պահպանումը շատ կարևոր է»,- ասել է ՀՀ առողջապահության նախարար Արսեն Թորոսյանը՝ հավելելով, որ հիվանդանոցների թիվը նվազեցնելու ուղղությամբ չեն մտածում, քանի որ հիմա էլ համաշխարհային ակադեմիական շրջանակներում հնարավոր աճի մասին են խոսում՝ 2-3 ամսի կտրվածքով:

Վարչապետն անհրաժեշտ է համարել արձանագրել, որ նոր կորոնավիրուսի զարգացումներն աշխարհում ընթանում են կանխատեսածի համաձայն։

«Բոլոր երկրները, ընդհանուր առմամբ, նույն արդյունքն են ունենալ: Կար ժամանակ, որ ՀՀ-ն վարակվածության ամենաբարձր ցուցանիշն է ունեցել, բայց հիմ այդպես չէ, այդ հանգամանքը դարձել է փոխանցիկ, ինչ-որ մի ժամանակ այդ ցուցանիշ փոխանցիկ-դրոշն այլ երկրներ են վերցրել ու վերցնում»:

Ինչ վերաբերում է պատվաստանյութի ձեռքբերմանը։

«Մենք ունենք արդեն վճարած կանխավճար՝ միջազգային հավաքական գնումների մի պլատֆորմի, որից օգտվում են աշխարհի մոտ 180 երկրներ: Այնտեղ հավաքված են բոլոր արտադրողների այն պատվաստանյութերը, որոնք ունեն մեծ շանսեր ապագայում գրանցում ստանալու: Էս պահի դրությամբ՝ մինչև 10 թեկնածուի մասին է խոսքը: Դրանցից որը հաստատվի, դա էլ մենք հնարավորություն կունենանք ձեռք բերելու: Մենք պատվիրել ենք նախնական մեր բնակչության 10 տոկոսի չափով, այսինքն՝ 300 հազար բնակչի հաշվարկով: Հավանական մատակարարման ամսաթիվը տատանվում է գարնան կեսերի վրա, ինչպես ամբողջ աշխարհի համար, խոսքը վերջնական հաստատված պրոդուկտի մասին է: Իսկ փորձնական պրոդուկտներ կան հիմա աշխարհում և օգտագործում են տարբեր փորձարկումների ժամանակ՝ թե՛ ՌԴ-ում, թե՛ ԱՄՆ-ում և Եվրոպայում:

Մենք նաև ուղիղ բանակցություններ ենք վարում, բայց ուզում եմ ասել, որ այդ բոլոր պրոդուկտները կան նաև այդ իմ ասած միջազգային պլատֆորմի մեջ: Եթե, օրինակ, ռուսական պատվաստանյութը հաստատում ստանա վերջնական ԱՀԿ-ի և այդ պլատֆորմի կողմից, մենք կարող ենք ընտրել նաև այդ պրոդուկտը, կամ ամերիկյան պրոդուկտը, որը որ կլինի ավելի արագ և ավելի էֆեկտիվ: Որոշելիքը մերն է լինելու, և մենք այդ որոշումների պրոցեսը տանում ենք հաստատմանը և փորձարկումներին զուգընթաց»,- ասել է առողջապահության նախարարը՝ հավելելով, որ 300 հազար բնակչի հաշվով 600 հազար դոզա է լինելու, քանի որ յուրաքանչյուր բնակիչ 2 դոզա է ստանալու:

Հաշվարկը պահպանողական է արվել, քանի որ հայտնի չէ, թե պատվաստանյութի առկայության պահին պահանջարկը որքան է լինելու:

Հաշվի են առել նաև այլ հիվանդությունների դեմ պատվաստման փորձը: ՀՀ-ում բնակչությունը հակված չէ պատվաստվելու, եթե ավելացման կարիք լինի, կարվի: