Գիտակցում եմ, որ ինձ վրա է ոչ միայն մինչև օրս տեղի ունեցածի, այլև հետագա զարգացումների պատասխանատվությունը. ՀՀ վարչապետ

«Մենք ապրում ենք չափազանց դժվար ժամանակներ, այդ ժամանակը ծանրանում է նրանով, որ մեր բազմաթիվ հայրենակիցներ, մեր բազմաթիվ քույրեր և եղբայրներ մեզ հետ չեն ապրում այսօր, նույնիսկ այս ծանր ժամանակները», – այսօր կառավարության նիստի ժամանակ իր խոսքում նշել է ՀՀ վարչապետ Նիկոլ Փաշինյանը:

Վարչապետն ասել է, որ այսօրվա հրամայականը հետևյալն է՝ ապրել այս ծանր ժամանակները, հաղթահարել ժամանակն ու դրա ծանրությունը.

«Ուզում եմ նորից ասել, որ, որպես ՀՀ վարչապետ, ինձ վրա եմ վերցնում ստեղծված իրավիճակի ամբողջ պատասխանատվությունը, բայց գիտակցում եմ, որ ինձ վրա է ոչ միայն մինչ օրս տեղի ունեցածի, այլև հետագա զարգացումների պատասխանատվությունը: Արտաքին ու ներքին անվտանգության ապահովումը և նոյեմբերի 18-ին իմ հրապարակած ճանապարհային քարտեզի իրականացումը բացարձակ առաջնահերթություն և անհաժեշտություն է, և մեր բոլոր ջանքերը պետք է կենտրոնացած լինեն այս խնդրի լուծման վրա», – ասել է  վարչապետը՝ հավելելով, որ կառավարությունն արցախցիներին աջակցող արդեն երկու միջոցառում է ընդունել, այդպիսի միջոցառումների ընդունումը կշարունակվի այնքան, որքան անհրաժեշտ է:

Ըստ Փաշինյանի՝ առաջիկայում  գործադիրի ուշադրության կենտրոնում են լինելու նաև Սյունիքի և Գեղարքունիքի մարզերի՝ պատերազմից տուժած բնակավայրերի վերականգնումը՝ Տավուշի մարզում իրականացված ծրագրերի նմանությամբ:

«Բացարձակ առաջնահերթություն է անհետ կորածների որոնողական աշխատանքները, գերիների փոխանակումը: Այս խնդիրների վրա մենք աշխատում ենք ամենօրյա ռեժիմով: Հիմնական բարդությունն այն է, որ այս աշխատանքի արդյունավետությունը, ցավոք, կախված է ոչ միայն մեզանից: Զոհվածների ընտանիքների, հաշմանդամություն ստացած անձանց և պատերազմից տուժած այլ խմբերի և քաղաքացիների սոցիալական պաշտպանության երաշխիքների հետագա կատարելագործումը մեր հրատապ անելիքների ցանկում է», – ավելացրել է վարչապետը ու նաև նշել, որ նույնիսկ այս դժվար ժամանակաշրջանում պետք է ստեղծել բարեփոխումների շարունակականության երաշխիք: Բարեփոխումների ընդգրկումն ու օրակարգը պետք է ընդլայնվի՝ ի հայտ եկած նոր մարտահրավերների բերումով:

Ըստ Նիկոլ Փաշինյանի՝ ամենահրատապ խնդիրների լուծմանը զուգահեռ պետք է տեղի ուենենան պատճառների վերհանման, պարզաբանման և վերլուծության գործընթացներ:

«Հայ հանրությունը պետք է ստանա հստակ պատասխաններ, թե ինչ է տեղի ունեցել և ինչու: Ժողովուրդը պետք է հասու լինի ճշմարտությանը և որոշումներ կայացնելու հնարավորություն ունենա: Ըստ այդմ՝ կառավարության ամենակարևոր անելիքը ՀՀ քաղաքացիների՝ սեփական երկրի և իրավիճակի տերը լինելու զգացողության փաստի պահպանումն է և այս հանգամանքի ինստիտուցիոնալ հզորացումը: ՀՀ քաղաքացին պետք է վստահ լինի, որ ինքն է իրավիճակի իրական տերը և այս զգացողության վրա պետք է կառուցի իր ապագան: Նաև ժողովուրդը պետք է որոշի, թե այդ ապագան ում հետ պետք է կառուցի և այդ ապագայի կառուցման գործում ով ինչպիսի դերակատարություն պետք է ունենա: ՀՀ քաղաքացիների ստեղծարար ներուժն անսպառ է, և մեր առաջկա ամենակարևոր անելիքն այդ ներուժի կենտրոնացումն է նոր ապագայի կառուցման գործի վրա: Մենք պետք է թույլ չտանք, որ այդ ապագայի հավատը սպանվի, և մեր ամենօրյա աշխատանքը պետք է ուղղված լինի այդ հավատի ուժեղացմանն, ամրապնդմանը և զարգացմանը»,- ասել է ՀՀ վարչապետը: