Գյումրիի թատրոնում կայացել է «Վերելք»ներկայացման առաջնախաղը.hասուjթը կփոխանցվի Արցախի վերականգնմանը

Գյումրիի Վ.Աճեմյանի անվան դրամատիկական թատրոնում տեղի է ունեցել «Վերելք» ներկայացման առաջնախաղը:Դերասան և ռեժիսոր Վարդան Պետրոսյանի մասնակցությամբ ներկայացման պրեմիերան  նախատեսված էր հոկտեմբերի 7-ին , բայց պատերազմական իրավիճակով պայմանավորված այն չկայացավ։

«Պատրաստվում էինք,համավարակի սահմանափակումներից ութ ամիս անց բացել մեր 151-րդ թատերաշրջանը,պիտի բացեինք երեք նոր ներկայացումներով,որոնցից մեկն էլ հենց «Վերելքն» էր:Փորձերը շատ լավ ընթանում էր,արդեն տոմսերը ամբողջությամբ վաճառված էին և սկսվեց պատերազմը։Բոլորիս մոտ շոկ էր,որոշեցինք դադարեցնել փորձերը»,-նշում է Գյումրիի Վարդան Աճեմյանի անվան դրամատիկական թատրոնի տնօրեն Լյուդվիգ Հարությունյանը:

Փորձերը  դադարեցնելու ընթացքում տեղի են ունեցել նաև  սյուժետային փոփոխություններ,սցենարում տեղ են գտել  մերօրյա իրականությունը նկարագրող ու հայ ժողովրդի պատմության ամենակարևոր  դրվագները:Ռազմաճակատ մեկնելու պատճառով ներկայացման մեջ ընդգրկված երիտասարդ դերասանական կազմի  փոփոխություն ևս կատարվել է :

«Էս ընթացքում շատ խնդիրներ եղան,դերասաններից շատերը տեղում չէին,փոփոխություն եղավ:Երեկ էլ վերջին փորձն էինք անում և դերասաններից մեկին կանչեցին զինկոմիսարիատից,պարտադիր պիտի գնար,բայց շարունակեցինք,նորից փոփոխություն արեցինք և ցանկացանք,որ էս ներկայացումը մենք խաղանք»,-նշում է թատրոնի տնօրենը:

Պատերազմական օրերին ներկայացում խաղալը բարդ հոգեբանական վիճակ է նաև   դերասանների համար,բացի դրանից  մտավախություն է եղել,որ հանդիսատեսը կարող է թատրոն չգա:Բայց առաջնախաղը կայացել է :Սա ստեղծագործական խմբի անդամները համարում են թիկունքում համախմբվածության ևս մեկ օրինակ:

«Դերասանը,որն ունի ազգական ռազմաճակատում,որից ոչ մի տեղեկություն չունի,շարունակում է գործ անել,աշխատել բեմում,ընդմիջման պահին դուրս է գալիս, հեռախոսով նայում է՝ ինչ  կա,ինչ եղավ։Մի կարևոր բան կա,որ չպիտի փակվեն էս թատրոնի դռները,թատրոնի դուռ ասվածը հոգու դռներն են:Մենք պիտի ամուր լինենք և ուժեղ:Քառօրյայի ժամանակ էլ մենք խաղացինք ներկայացում և հիմա էլ պիտի խաղանք պարտադիր,ամեն մեկն իր գործը պիտի անի  ու էլ ավելի հզորացնի  և կանգնի մեր պետության կողքին»,-ասում է թատրոնի տնօրենը:

«Սկզբում նախարարությունից հրաման եկավ դադարեցնել,որովհետև դժվար էր պատկերացնել,որ այս օրերին կարելի է ներկայացում խաղալ, բայց ինչպես 90-ականներին, շատ դժվար էր ներկայացում խաղալը,երբ ամեն օր ճակատից բերում էին ֆիդայիններին և բերում էին օպերայի հրապարակ ,հրաժեշտ տալիս ,հետո տանում էին Եռաբլուր թաղելու:Մենք որոշեցինք այս  պատերազմի օրերին անպայման խաղալ,քանի որ թիկունքը իրավունք չունի խոնարհվելու,կոտրվելու,որովհետև էդ թիկունքը մեր զինվորի թիկունքն է և նա գիտի,նա զգում է:Նկատել եք,ինչքան են ասում,պինդ մնացեք,մենք էստեղ պինդ ենք և ձեզանով ենք պինդ»,- նշում է դերասան Վարդան Պետրոսյանը:

«Ես էս տարի  «Վերելքը» չպիտի բերեի,ուրիշ ներկայացում էի պատրաստել,բայց հետո տեսա,որ ժամանակները փոխվեցին,«Վերելքը»  պիտի անենք,ամեն ինչ փոխվեց,թիկունքը,ռազմաճակատը և առաջնագիծը պիտի համագործակցեն և ապրեն կանոնակարգված,մեր հաղթանակը դա է,չտրվել էմոցիաներին:Մեր ներկայացումը հիմա երգիծական չէ,մենք տեսնում ենք կոմիտասյան պատկերներ ,տեսնում ենք Արևմտյան Հայաստանի գյուղերը, մարդկանց մեջ սեր ու գորովանք է արթնանում,պատմական մեր անցյալն ենք տեսնում,օջախը,Արևմտյան Հայաստանի ընտանիքը,Կոմիտասի հանճարը ինչպիսին է եղել,ինչ ուժեղ է նրա հոգու և մեր ժողովրդի  ուժը,մեր փոքրիկ բազեները,արծիվները,որ էսօր դիմանում են հերոսների պես»,- ներկայացման ընդհանուր բովանդակային գծերն այսպես է ներկայացրել ռեժիսոր և դերասան Վարդան Պետրոսյանը:

«Վերելք»-ը աճեմյանական բեմում կլինի նաև առաջիկա օրերին , որի ամբողջ հասույթը կփոխանցվի «Հայաստան» համահայկական հիմնադրամին: