Լեռնային Ղարաբաղի կռիվները մեծացնում են մահացու էսկալացիայի սպառնալիքը. Associated Press-ի հերթական անդրադարձը

Լեռնային Ղարաբաղում ընթացող մարտական գործողությունների վերաբերյալ հերթական հոդվածում Associated Press գործակալությունը նշում է, որ Ռուսաստանի միջնորդությամբ Հայաստանի և Ադրբեջանի միջև ձեռք բերված հրադադարի համաձայնությունը որևէ արդյունք չի տվել: Ըստ պարբերականի՝ մարտերի էսկալացիան մտավախություն է առաջացնում, որ հակամարտությունն ավելի կընդլայնվի և կարող է ներքաշել Ռուսաստանին և Թուրքիային, ինչպես նաև սպառնալ Կասպից ծովի էներգետիկ ռեսուրսների արտահանումներին:

Այնուհետև գործակալությունը հակիրճ ներկայացնում է Լեռնային Ղարաբաղի հակամարտության պատմությունը և գրում, որ Հայաստանի և Ադրբեջանի զինվածության մակարդակը մեծապես տարբերվում է. Ադրբեջանը լիովին նորացրել է իր զինանոցը ժամանակակից հարվածային ԱԹՍ-ներով և հզոր բարձր հեռահարության հրթիռային համակարգերով, որոնք տրամադրում է նրա հարևան և դաշնակից Թուրքիան:

Associated Press-ը նաև անդրադառնում է հակամարտությունում «Թուրքիայի նոր դերին»:

«Ի տարբերություն Լեռնային Ղարաբաղի շուրջ ռազմական գործողությունների նախորդ բռնկումների՝ ՆԱՏՕ-ի անդամ Թուրքիան, որը սերտ էթնիկական, մշակութային և պատմական կապեր ունի Ադրբեջանի հետ, ավելի հեռուն գնաց և խոստացավ օգնել Ադրբեջանին վերադարձնել իր տարածքը: Թուրքիայի նոր պարտադրողական դերն արտացոլում է նախագահ Ռեջեփ Թայիփ Էրդողանի հավակնությունները ՝ ընդլայնելու իր ազգի ազդեցությունը: Հայաստանի իշխանություններն ասում են, որ Թուրքիան ուղղակիորեն ներգրավված է հակամարտության մեջ և սիրիացի վարձկանների է ուղարկում՝ Ադրբեջանի կողմից կռվելու: Թուրքիան հերքել է, որ տարածաշրջանում զինյալների է տեղակայել, սակայն Սիրիայի պատերազմի մոնիթորինգով զբաղվող կազմակերպությունը և Սիրիայում գտնվող ընդդիմադիր ակտիվիստները հաստատել են, որ Թուրքիան հարյուրավոր սիրիացի ընդդիմադիր զինյալների է ուղարկել՝ Լեռնային Ղարաբաղում կռվելու»,- գրված է հոդվածում:

Գործակալությունը նաև գրում է, որ իրավիճակի սրումը մեծ մարտահրավեր է Ռուսաստանի համար, որը ռազմաբազա ունի Հայաստանում, սակայն միևնույն ժամանակ փորձում է լավ հարաբերություններ պահպանել Ադրբեջանի հետ և խուսափել Թուրքիայի հետ բախումից:

Associated Press-ը նաև գրում է, որ Հայաստանը, որը երեք տասնամյակ շրջափակման մեջ է գտնվում Թուրքիայի և Ադրբեջանի կողմից, չունի համապատասխան ռեսուրսներ երկարաժամկետ պատերազմ վարելու համար, սակայն չի կարելի ակնկալել, որ Հայաստանը կտրվի ճնշումների:

«Հայրենասիրական տրամադրությունները բարձր են, և տարբեր մասնագիտությունների ու տարիքի հայերը կամավոր մեկնել են առաջնագիծ»,- նշում է հոդվածի հեղինակը: