Գյումրիի ժողգործիքների պետական նվագախումբը արդյո՞ք կտեղափոխվի նոր շենք

Նախկին «Վան» առողջարանի շրջակայքում առաջինը, որ աչքի է ընկնում հիմա՝ ճահիճների չորացած տարածքներն են: 3-րդ աստիճանի վթարայնության շենքի ամրակայման աշխատանքները 4 ամիս առաջ էին սկսել։ Շենքի տարածքը ճահճացումից ազատել են կառուցած դրենաժների շնորհիվ, թեև սա շինարարը ամբողջական լուծում չի համարում, այս տարածքի գրունտային ջրերի մակարդակը բարձրանալու սովորություն ունի: Կողքով անցնում է Ղորղոբա գետակը։

Սա նախագծով  նախատեսված աշխատանք էր, որը շինարարը կատարել է։ Բայց  վթարային շենքի համար այն  ոչ առաջին, ոչ էլ վերջին խնդիրն է, իսկ դրանց թվարկումը, հետևաբար կարգավորումները, ըստ նախագծի կային, բայց իրականացումը նախահաշվից դուրս է մնացել, այսինքն այդ հիմնահարցերի լուծման համար գումար հատկացված չի եղել։

«Կան աշխատանքներ, որոնք նախահաշվից դուրս են մնացել, պատերի սվաղը, երեսպատումը, գազի գիծը, կոյուղացումը, ծածկի բետոնացումը, սրանք բոլորը նախագծում կան։ Բայց նախահաշվով գումար հատկացված չէ»,-ասել է Շինարար ՍՊԸ-ի տնօրեն Ալբերտ Նալբանդյանը։

Նախկին առողջարանի 3 մասնաշենքերից մեկում հիմնային նորոգում է եղել ՝ հիմքերի ամրակայումով,ևս մեկում վերանորոգում է կատարվել , իսկ երրորդ մասնաշենքում, ինչպես նաև հարևանությամբ 3 քոթեջներում, որոնք ամեն դեպքում  նվագախմբին են պատկանում, ոչ մի շինաշխատանք չի իրականացվել, նախագծից դրանք դուրս են եղել:

Շիրակի մարզպետարանի ճարտարապետաշինարական բաժնի ավագ մասնագետ Մկրտիչ Ասատրյանը չի ժխտում, նախագծային փաթեթը կազմվել է սուղ բյուջեով։ Նախագծի կազմման միջոցները մարզպետարանն է հատկացրել, իսկ  վերակառուցման համար պետական բյուջեից 25 մլն դրամ է տրամադրվել , ևս 20 մլն դրամ էլ Օյունջյան հիմնադրամն է փոխանցել, որպեսզի նվագախումբը դուրս գա այժմյան տնակային տարածքից , որն արդեն պատկանում է հիմնադրամին։ Երկու մասնաշենքի վերանորոգումը շինարարն ու ժողգործիքների նվագախմբի տնօրինությունը լիովին ավարտված չեն համարում նաև մեկ այլ ՝մեծ խնդրի պատճառով։ Շենքը չունի կոմունիկացիոն ցանց, սանհանգույցն առանց կոյուղատար ցանցի։

«Նախագծանախահաշվային փաթեթում դրանք ներառված չեն եղել, մարզպետի կողմից եղել է հանձնարարություն, դիմել ենք տարածքային կառավարման նախարարություն, որպեսզի լրացուցիչ գումար հատկացնեն տարածքի բարեկարգման և կողքի շենքի վերանորոգման համար, դա կլինի ,հավանաբար, հաջորդ ծրագրով»,-ասել է Մկրտիչ Ասատրյանը։

Առանց կոյուղացման, բակի բարեկարգման, առանց շենքի ընդհանուր երեսապատման շինարարը երկու շաբաթից պատրաստվում է կառույցն հանձնել պատվիրատուին, ժամկետներն են այդպիսին։ Պետական նվագախումբը կտեղափոխվի նոր շենք, թե ոչ, պարզ կդառնա երբ մասնագիտական   հանձնաժողովը կատարված շինաշխատանքների ուսումնասիրություն կանցկացնի։ Շահագործման թույլտվությունը, աշխատանքներն ընդունել-չընդունելը կախված է հանձնաժողովի եզրակացությունից։