Գյումրիի փողոցաշինական ծրագրի ժամկետները փոխվել են. ՎԶԵԲ ծրագրով ասֆալտապատման վերջնաժամկետը 2021 թվականն է

Վերակառուցման և զարգացման բանկի ծրագրով Գյումրիում կատարվող փողոցաշինության ժամկետները փոխվել են:Փողոցաշինական մեծ ծրագրի երկրորդ փուլով Գյումրիում վերակառուցվում է 15 փողոց:Քաղաքի կենտրոնական մասում գտնվող փողոցներն են, որոնց վերակառուցման նախագիծն ի սկզբանե կազմվել է՝ առանց ենթակառուցվածքների մաշվածությունը հաշվի առնելու:Շինարարները փողոցները քանդել են, ինչի հետևանքով ջրի երես է դուրս եկել քայքայված ու մաշված կոյուղատար համակարգը,ինչն էլ նորից նախագծային փոփոխությունների պատճառ է դարձել: Հիմա շինարարները կոյուղատար նոր ցանց են անցկացնում:Աշխատանքները դեռ ընթացքի մեջ են ու ըստ այդմ փոխվել են փողոցաշինական ծրագրի ժամկետները: Որպես վերջնաժամկետ նշված տարեվերջը տեղափոխվում է 2021 թվական:

Ենթակառուցվածքների նորացման ու նախագծային փոփոխությունների պատճառով ձգձգումներ, շինարարական թերություններ․սա ՎԶԵԲ ծրագրի փողոցաշինության առաջին փուլի ընթացքն էր Գյումրիում: Մի քանի անգամ ժամկետներ փոխվեցին, նոր նախագիծ կազմվեց: ՎԶԵԲ-ի փողոցաշինության երկորդ փուլը պետք է ընթանար՝ նախկին սխալներից հետևություններ անելով: Համենայնդեպս այսպիսին էին պատվիրատուի՝ քաղաքապետարանի պատասխանատուների հայտարարությունները: Բայց մեկնարկից շատ չանցած՝ պարզ դարձավ , որ երկրորդ փուլում էլ առանց նախագծային փոփոխությունների փողոցաշինությունն առաջ չի գնա: Այս անգամ պատճառը քաղաքի կենտրոնի թաղերի կոյուղատար ցանցն է:

Այն ,որ կոյուղատար ցանցը հին է, մաշված, վթարները շատ են, նորություն չէր ո՛չ թաղի բնակիչների, ո՛չ էլ կոյուղին սպասարկող ընկերության ու հավանաբար նաև քաղաքային իշխանությունների համար: Որպես ապացույց բնակիչները հիշում են ընդամենը մի քանի տարի առաջ նույն այս փողոցներում ջրամատակարարաման ցանցի նորացման աշխատանքները: Երբ խրամուղիներ փորվեցին նոր ջրագծեր անցկացնելու համար, հայտարարվեց , որ կոյուղատար ցանցի նորացման ծրագիր է անհրաժեշտ ։

Փողացաշինական աշխատանքների նախագիծը կազմվել էր միայն մայթերի կառուցման ու ասֆալտապատման համար: Բայց հիմնային աշխատանքների ժամանակ շինարարներն իրենք էին հրաժարվել գործը շարունակել: Նոր նախագիծ է կազմվել, համաձայն որի նախ պետք է այս թաղերի կոյուղատար համակարգը նորացվի:

Յուրաքանչյուր փողոցում մեկական տեխնիկա է աշխատում և բանվորական ոչ մեծ բրիգադ: Բոլոր փողոցները քանդված են, անանցանելի ու դեռ կոյուղատար ցանցի նորացման աշխատանքները չեն ավարտվել: Շինարարը բացատրում է ՝ նոր կոյուղատարի անցկացման համար շատ աշխատուժ չի պահանջվում՝ խրամուղիները տեխնիկան է փորում: Երբ հերթը հասնի մայթերի կառուցմանն ու  եզրաքարերի տեղադրմանը, բանվորների թիվը մի քանի անգամ ավելանալու է: Իսկ մինչև տարեվերջ այս փողոցները ասֆալտապատ  չեն լինի։

« Ժամանակացույցը չեմ կարող այս պահին ասել կոնկրետ, բայց արդեն մյուս տարվա հետ կապված է ։Աշխատանքներ կլինեն, որ կմնան , հաջորդ տարվա մեջ կարվեն: Ինչքան հասցնենք կանենք, որովհետև ծավալները շատ են ու ժամանակատար գործ է կոյուղագծեր փոխելը »,- shantnews-ին ասել է «Վահագն և Սամվել» շինընկերության տեղամասի պետ Արտաշես Առաքելյանը:

Այսինքն փողոցաշինական ծրագրի առաջին փուլի ընթացքի պատմությունը կրկնվում է երկրորդ փուլում․նորից նախագծերի ու ժամկետների փոփոխություն: Ու սա ՎԶԵԲ ծրագրի երկրորդ փուլի միայն առաջին մասն է: Երկորդ մասում կայարանամերձ հրապարակն է ընդգրկված, որտեղ շինաշխատանքները դեռ չեն մեկնարկել: