Ջուլիետա Ղուկասյանին ծեծելով մահվան հասցնելու գործի քննությունը դարձյալ հետաձգվել է․ ամբաստանյալ ռուս զինծառայողը միջնորդել է նիստը ռազմաբազայում կամ տեսակապով անցկացնել

Այսօր Շիրակի մարզի առաջին ատյանի ընդհանուր իրավասության դատարանում կայացել է Ջուլիետա Ղուկասյանին ծեծելով մահվան հասցնելու գործի քննությունը։ Հիշեցնենք, գյումրեցի կնոջը ծեծելով մահվան հասցնելու մեջ մեղադրվում է ռուսական 102-րդ ռազմաբազայի զինծառայող Անդրեյ Ռազգիլդեևը։ Մինչ այս նրա ներկայությունը դատարանում չի ապահովվել։ Այսօր ևս ոստիկանության Շիրակի մարզային վարչության ուղեկցող դասակի հրամանատարը նշել է, որ Ռազգիլդեևին դատարան բերելու համար գնացել են ռազմաբազա, որտեղ իրենց ասել են, որ հրամանատարությանը ոչինչ հայտնի չէ այն մասին, որ Ռազգիլդեևն այսօր պետք է դատարան ներկայանա։ Մինչդեռ, նիստի քարտուղարը նշել է, որ համապատասխան ծանուցագիրը ռազմաբազայի ներկայացուցչին հանձնվել է առձեռն։

Ամբաստանյալ Անդրեյ Ռազգիլդեևը, սակայն, գրավոր միջնորդություն էր ներկայացրել դատարան, որտեղ խնդրում է դատարանին նիստն անցկացնել ռազմաբազայի տարածքում, կամ իր ներկայությունն ապահովել տեսակապի միջոցով։ Իսկ որպես հիմնավորում ներկայացնում է այն, որ կորոնավիրուսով պայմանավորված, վախենում է իր առողջության համար, ինչպես նաև մտավախություն ունի, որ Շիրակի մարզի դատարանի շենքում իր անվտանգությունն ապահովված չէ։ Ավելի վաղ, գրեթե նույնաբովանդակ գրությամբ, դատարանին դիմել էր ռազմաբազայի հրամանատարը։ Միջնորդության վերաբերյալ դիրքորոշում է հայտնել տուժողի իրավահաջորդի ներկայացուցիչ Արթուր Սաքունցը:

«Ակնհայտ է հետևյալը, որ Ռազգիլդեևն ամբողջությամբ գտնվում է բազայի հրամանատարի հսկողության տակ: Հրամանատար, որը իրավական որևէ կարգավիճակ չունի, խոչընդոտում է արդարադատության իրականացմանը և ավելի ցնդելու բան ասեմ՝ ոչ միայն հրամանատարը, այլ արդեն ամբաստանյալն է որոշում, թե ոնց իր նիստն անցկացվի»,- ասել է տուժողի իրավահաջորդի ներկայացուցիչ Արթուր Սաքունցը: Նա նաև նշել է, որ Ռազգիլդեևին Հայաստանի քրեակատարողական հիմնարկ տեղափոխելու հարցը ներկայացրել է Եվրադատարան:

Իսկ Անդրեյ Ռազգիլդեևի շահերի պաշտպան Նարինե Ռշտունին նշել է, որ իր պաշտպանյալի հետ հանդիպել է, քննարկել միջնորդությունը, բայց ռազմաբազայի հրամանատարության հետ առնչություն չունի և Ռազգիլդեևի դատարան ներկայանալու հարցը չի քննարկել:

«Իմ պաշտպանյալը երբևիցե ոչ մի բան ոչ մեկին չի թելադրում, իմ պաշտպանյալի իրավունքն է դատարան դիմելու որևէ միջնորդությամբ և եթե տեսնում ենք՝ միջնորդությունում նա շատ բարեկիրթ գրում է․ «Խնդրում եմ ձեզ»:  Եվ այսպիսի հայտարարություններին, թե նա թելադրում է, կրկնում է հրամանատարին, ես չեմ ուզում անդրադառնալ: Զուտ խնդրում եմ իմ գործընկերոջը, որի հետ իրավապաշտպանությունում երկար ճանապարհ ենք անցել, ապագայում դատական նիստերը միտինգի չվերածել»,- ասել է Նարինե Ռշտունին:

Ռազգիլդեևի միջնորդությունն այսօր չի քննարկվել։ Դատավոր Ադրինե Ղուկասյանը նշել է, որ ամբաստանյալի միջնորդությունը քննարկման ենթակա է միայն այն դեպքում, երբ նա անձամբ այն կներկայացնի դատարանի դահլիճում։