Կապսի ջրամբարի կողքին նոր գյուղ կկառուցվի․Ջրաձորի տեղափոխության համար չափագրումներ են կատարվում

Ամասիայի տարածաշրջանի Ջրաձոր գյուղում գույքագրման ու չափագրման աշխատանքներ են կատարվում: Ջրաձորը կառուցվելու է նոր տեղում՝ նոր ենթակառուցվածքներով, ինչը պայմանավորված է Կապսի ջրամբարի շինարարությամբ: Կառավարությունը հաստատել է Կապսի ջրամբարի շինարարության ծրագիրը: Ջրամաբարաշինությունը մեկնարկել է դեռ Խորհրդային տարիներին ու անավարտ է մնացել: Նախատեսվում է առաջին փուլում Կապսի ջրամբարը կառուցել 25 մլն խորանարդ մետր ծավալով, իսկ հետո թողունակությունը դարձնել մինչև 60 մլն: Սա նշանակում է, որ Ամասիայի տարածաշրջանի Ջրաձոր գյուղը պետք է տեղափոխվի: Գյուղում շինարարություն կատարել չի թույլատրվել դեռ 70-ական թվականներից: Այդ ժամանակվանից է Կապսի ջրամբարի շինարարության և գյուղի տեղափոխության մասին ծրագիր եղել: Գյուղում նոր ոչինչ չի կառուցվել: 88-ից հետո էլ բոլոր տները վթարային են դարձել: Նոր գյուղին ու բնակարանաշինությանը Ջրաձորում սպասում է արդեն երրորդ սերունդը:

«Դեռ իմ հայրը ուզում էր կից կառույց կառուցել, պապս ասում էր , թե չարժե գյուղում շինարարություն սկսել, որովհետև  գյուղը տեղահանելու են: Դա 60-ականների վերջին ու 70-ականների սկզբին էր: Իսկ ջրամբարի  շինարարությունը սկսվել է 1982-ին , 88-ից հետո դադարեցվեց: 2 թունել էինք կառուցել, մեկը պատրաստ էր, որով ջուր է հոսում: Եւս մեկ թունելով էլ ջուրը պետք է վերցնեին և միանար մայր ջրանցքին»,-shantnews-ին ասել է Ջրաձոր գյուղի բնակիչ Կոլյա Սողոմոնյանը:

Կոլյա Սողոմոնյանը 80-ականների սկզբին Կապսի ջրամբարի շինարարությանը մասնակցած վարպետներից է: Երկու թունել է կառուցել, որոնցից մեկով հիմա էլ ջուր է հոսում, մյուսի շինարարութունը կիսատ է մնացել: Հիմա նախ հենց այդ թունելի կառուցումն է ավարտին հասցվելու:

Իրենց տների նկատմամբ գյուղացիները սեփականության իրավունք չունեն: Սպասել են գյուղի տեղափոխությանը և սեփականաշնորհումներ գյուղում չեն թույլատրվել: Հիմա նախ իրենց ունեցածի նկատմամբ սեփականության իրավունք են ձեռք բերելու: Ըստ այդմ էլ ծրագրի շրջանակներում փոխհատուցման չափն է պարզ դառնալու: Հին տան փոխարեն նորն է կառուցվելու, իսկ հողերի ու անասնագոմերի փոխհատուցումն այլ տարբերակով է:

«Հաստատվել է նոր գյուղի կառուցման ծրագիրը: Հողի դիմաց փոխհատուցում չի լինելու, որովհետև նոր տարածքում հող ստանալու են: Իսկ տների փոխհատուցումը հաշվարկվելու է փաստացի ունեցած բնակելի տան մակերեսով, որ համամասնությամբ էլ նոր տուն են ստանալու։Ամեն ինչ գույքագրել ենք՝ տուն, ծառ, մշակաբույսեր, շարժական տնակներ: Նաև հաշվարկվել են յուրաքանչյուր տան տեղափոխման ծախսերը»,-shantnews-ին ասել է չափագրող, գույքագրող ընկերության ներկայացուցիչ Կարեն Դանիելյանը:

Անցած տարի է նոր գյուղ կառուցելու համար 40 հեկտար հողհատկացում կատարվել: Նոր տարածքը գյուղից մի քանի կմ հեռու է՝ ավելի հարթավայրային տեղում:  Ծառերի, տնամերձների ու հողակտորների համար փոխհատուցում են ստանալու: Նաև տեղափոխության հարցերն են պետական միջոցների հաշվին լինելու: Փոխհատուցումների ու փաստաթղթային բոլոր հարցերի կարգավորման համար 10 ամիս ժամկետ է տրված, իսկ բուն ջրամբարի շինարարությունն ավելի երկարատև է:

«Նոր տարածքը տրված է գյուղի դիմաց՝ մոտ 3 կմ հեռու: 5-6 ամիս առաջ ենք հատկացում կատարել: Իսկ ժամկետները ստույգ ոչ ոք չգիտի: Ձմռան ամիսներին այս տարածաշրջանում աշխատել հնարավոր չէ: Դեկտեմբերից մինչև ապրիլ այստեղ աշխատել չի լինի: Եթե լավ սկսեն 2-3 տարվա խնդիր է: Բայց միայն տներ չէ, որ կառուցվելու են, նաև դպրոց պետք է կառուցվի ու ենթակառուցվածքներ »,-shantnews-ին ասել է Ջրաձորի վարչական ղեկավար Գևորգ Հովակյանը:

Ջրաձոր նոր գյուղի նախագիծը պատրաստ է լինելու հաջորդ տարի: Հստակ է , որ նոր տեղում 78 տուն է կառուցվելու:Կապսի ջրամբարի շինարարությամբ պայմանավորված տեղափոխության ծրագրից բացի Ջրաձորում բնակարանաշինական ևս մեկ ծրագիր կար: Կառավարությունը նախատեսում էր 28 ընտանիքների համար տուն կառուցել, որոնք համարվում են երկրաշարժից անօթևան: Գյուղացիների պահանջով երկու ծրագրերը միացվել են և Ջրաձորում բնակարանաշինություն լինելու է ամբողջ գյուղի համար: