Հայաստանն ստեղծում է խաղաղապահ ռազմական ոստիկաններ․ ինչու

ՀՀ ՊՆ ռազմական ոստիկանության կազմում հունվարի 6-ից ստեղծվել է խաղաղապահ դասակ, որը ՀՀ ԶՈՒ խաղաղապահ բրիգադի կազմում կմասնակցի ՀՀ խաղաղապահ առաքելություններին: Այս մասին ասվում է Հայաստանի ՊՆ կայքի երեկվա հաղորդագրություններից մեկում։

Նախարարությունը սկսել է խաղաղապահ ռազմական ոստիկանների հավաքագրումը, և ընտրության ժամանակ նախընտրությունը տալու է «համապատասխան բարձրագույն կրթություն ունեցող, 2 և ավել օտար լեզուների տիրապետող և պարտադիր զինծառայություն անցած մինչև 35 տարեկան ՀՀ քաղաքացիներին»:

Առաջին հայացքից՝ ոչ մի արտասովոր բան։ Սակայն նախարարությունը չի մանրամասնում, թե ինչ առաքելության մասին է խոսքը։

Հայկական խաղաղապահ բրիգադը ներկայում առաքելությունների մասնակցում Աֆղանստանում (126-131 զինծառայող), Կոսովոյում (35-36 զինծառայող), Լիբանանում (32 զինծառայող) և Մալիում (1 շտաբային սպա)։ Հայաստանը բազմիցս հայտարարել է, որ անհրաժեշտության դեպքում պատրաստ է ավելացնել իր խաղաղապահ զորախմբերի կազմը ու նաև ընդգրկվել նոր առաքելությունների մեջ։

— Մենք նաև պատրաստակամ ենք մասնակցելու Սիրիայում ՄԱԿ-ի հովանու և համապատասխան մանդատի ներքո խաղաղարար ջանքեր ձեռնարկելու շուրջ հնարավոր քննարկմանը, — սեպտեմբերին այս խոսակցություններին վերջ դրեց նախագահ Սարգսյանը՝ ՄԱԿ գլխավոր ասամբլեայում իր ելույթի ժամանակ:

Դժվար է գուշակել, թե որ առաքելության համար է նախարարությունը պատրաստում խաղաղապահ ռազմական ոստիկանների դասակը։ Սակայն Հայաստանի համար արդեն ավանդական 4 առաքելություններից բացի, զինծառայողները կարող են գործուղվել նաև Սիրիա։ Մանավանդ, որ Ռուսաստանն այնտեղ արդեն գործուղել է իր ռազմական ոստիկաններին։

Սրանից բացի, 2017 թվականի հունիսին ՀԱՊԿ գլխավոր քարտուղարի տեղակալը հայտարարել էր, որ կազմակերպությունը ՄԱԿ-ի առաջարկով կազմում է մշտական գործող խաղաղապահ ոստիկանության ստորաբաժանում, որը մասնակցելու է խաղաղապահ առաքելությունների։ Պաշտոնյան նշել էր, որ ՀԱՊԿ անդամ բոլոր պետությունները տվել են իրենց համաձայնությունը, և միացյալ ստորաբաժանումը համալրվելու է բոլոր 6 պետությունների (այդ թվում՝ Հայաստանի) իրավապահ մարմինների ծառայողներով։

Թեև ՀԱՊԿ-ն ունի խաղաղապահ ուժեր, որոնք խաղաղապահ առաքելությունների համար պիտանի են ճանաչվել ՄԱԿ-ի կողմից, սակայն այդ ուժերն առայժմ որևէ առաքելության չեն ներգրավվել։ Միևնույն ժամանակ կասկածից վեր է, որ Ռուսաստանի առաջնորդությամբ գործող կառույցի համար առաջնահերթ խաղաղապահ առաքելությունը կարող է լինել Սիրիայում։ Սա առավել հավանական է դարձնում հայկական խաղաղապահ ռազմական ոստիկանության հետագա գործողումն այդ տարածաշրջան։

Հիշեցնենք նաև, որ նոյեմբերին Ռուսաստանի պաշտպանության փոխնախարարը հայտարարել էր, որ Հայաստանը և Սերբիան իրենց ականազերծող ստորաբաժանումները Սիրիա ուղարկելու պատրաստակամություն են հայտնել։

Հայաստանի խաղաղապահ գործողությունների նկարագրությանն ու հեռանկարին կարող եք ծանոթանալ ShantNews-ի «Հայաստանը խաղաղապահության հանգույց. մղումներն ու միտումները» հոդվածում։