Գյումրիում փողոցաշինական աշխատանքները ձգձգվում են, նախագծային փոփոխություններ են կատարվում

Վերակառուցման Զարգացման Եվրոպական բանկի ծրագրի երկրորդ փուլի փողոցաշինական աշխատանքները Գյումրիի 15 փողոցներում  շինարարական փուլին դեռ չեն հասել։ Սունդուկյան, Պուշկին, Մատնիշյան, Մայակովսկի, Օզանյան ու հարակից մյուս փողոցներում շինընկերությունները զբաղված են կոյուղատար խողովակների փոխարինման ու նորերի մոնտաժման աշխատանքներով:

Դրանք նախագծային փաթեթներում ներառված չեն եղել, բնակիչների դիմում-բողոքներից ու շինարարների ահազանգերից հետո  պատվիրատուն կոյուղատար ցանցի փոխարինումн  ընդգրկել է հիմնանորոգման ծրագրում:

Հիմնանորոգման այս տարվա ծրագրում ընդգրկված Սունդուկյան փողոցի միջնամասում երկու մետր խորության փորվող այս խրամուղիները  նոր կոյուղատար խողովակներ անցկացնելու համար են: Շինարարը փողոցի հիմքերի ամրացում ու աշխատանքներ կատարելու փոխարեն  երկու շաբաթ է` կոյուղատար համակարգ են փոխում։

Այն, ինչ պատվիրատուն նախագծում չէր ներառել, հիմա վերադարձել է բաց թողած աշխատանքը լրացնելուն, շինարարները հրաժարվել են փողոց կառուցել` առանց ներքին կոմունիկացիոն ցանցը նորացնելու։

«Խնդիրների ենք բախվել, կոյուղացանցը շատ վատ վիճակում էր, կփոխեինք,  կլցվեր փոսերը, խրամուղիներում դիտահորերը չէինք կարող տեղադրել, դժվար է, որ հին կանալիզացիան կաշխատի, մենք կողքից նորը կքաշենք»,- նշում է «Վահագն և Սամվել» շինընկերության աշխղեկ Աղասի Աթոյանը։

Միայն Սունդուկյան փողոցում չէ նման վիճակ, հարակից ու հատվող մյուս փողոցներում ևս 70-80 տարվա կոյուղատար ցանց է գործում։ Խողովակները կոռոզիայի են ենթարկված, դիտահորերը չեն աշխատում, մի մասն էլ հողաշերտի տակ է, թաղամասում խցանումներն ու ցանցի  վթարները մշտապես եղել են։

Փտած ու քայքայված լինելուց բացի, ներքին ցանցում խողովակները մակերեսային են կառուցված, դրա համար էլ հողային աշխատանքներ շինարարը չի կարողացել կատարել, բավարար խորության վրա չգտնվելու պատճառով փորման ընթացքում վնասվել են։

«Կոյուղու խողովակաշարը  ևս վթարային վիճակում է գտնվում, որը ավելի ակնհայտ դարձավ, երբ մի քանի անգամ ուժեղ անձրևներ տեղացին, մենք խնդիրների առաջ կանգնեցինք, պատվիրատուի կողմից որոշվեց, որ խողովակաշարը ևս  թարմացվի, արդիականացվի։ Էդ աշխատանքները նորից ավելացվել են»,-նշեց «Մերձմոսկովյան» ԲԲԸ աշխղեկ Խաչիկ Ղարիբյանը։

Մայակովսկի փողոցում արդեն 600 մետրից ավելի նոր խողովակաշար է անցկացվել: 300 մմ տրամագծով գլխավոր խողովակներն անցկացնելուց բացի, շինարարների համար խնդիրներ են ստեղծում դեպի  սեփական տներ անկանոն միացված խողովակները:

Մինչև տարեվերջ է տրված փողոցների հիմնանորոգումների ավարտը: Շինարարն այլ ելք չունի, քան կոյուղատար ցանց ու դիտահորեր փոխելուն զուգահեռ այլ  աշխատանքներ կատարելը։ Երթևեկելի մասի ամրացում են անում, մայթերը լայնացնում։

Շինհրապարակի վերածված փողոցներում երթևեկությունը փակ է, մարդկանց անցուդարձը ևս դժվարացել է, անանցանելի վիճակ է ստեղծվում հատկապես անձրևներից հետո։

Բնակիչների բողոքները ևս պատճառ հանդիսացան նախագծային վերանայումների համար։ Բնակիչների, այսպես ասած, «վերահսկողությունը» արդյունք տվեց։ Դիմում-բողոքներ էին հասցեագրել պատվիրատուին, տվյալ դեպքում՝ քաղաքապետարանին։

Իդեպ ներքին կոմունիկացիոն՝ կոյուղատար համակարգի նորացման աշխատանքներում Վեոլիա ջուր ընկերությունը ներգրավված չէ, ամբողջ պատասխանատվությունը կրում են  շին ընկերությունները։