Գյումրիի նախկին «Տեքստիլ» գործարանի արդյունաբերական նշանակության 22 հեկտար տարածքը մաս-մաս վաճառվել է առանց քաղաքի հատակագծի համապատասխանեցման

Գյումրիի նախկին «Տեքստիլ» կոմբինատը արդյունաբերական քաղաքի ամենախոշոր արտադրական ընկերությունն էր։ Այս տարածքում են եղել գործարանին պատկանող տարբեր նշանակության տեղամասերը: 22 հա է ընդհանուր տարածքը, 90-ականներին, երբ կոմբինատը այլևս չաշխատեց ու սկսվեց գործարանի սնանկացման գործընթացը, տարածքը մաս-մաս վաճառեցին:

Իսկ այդ սեփականաշնորհումը տեղի ունեցավ սնանկության գործով կառավարչի թույլտվությամբ։ Բայց ներկա տերերը նախկիններից են գնել տարածքները՝ ոչ մեկ գնորդից: Վաճառքի գործընթացները, ըստ գլխավոր ճարտարապետի, կատարվել են քաղաքաշինական նորմերից շեղումներով։

«Այդ տարիներին կառավարիչը կամայական բաժանումներ է կատարել՝ առանց քաղշին նորմերը հաշվի առնելու»,- SHANTNEWS.am-ի հետ զրույցում ասել է Գյումրիի գլխավոր ճարտարապետ Հենրիկ Գասպարյանը։

Հողերի արդյունաբերական նշանակությունն առանց փոխելու տեղի է ունեցել սեփականաշնորհում, որը քաղաքի գլխավոր հատակագծին հակասող է, իսկ կոմբինատի տարածքը քաղաքաշինական այլ ծրագրերի ուսումնասիրության առանցքում ևս հայտնվեց։ Մեկը դեռ 14 տարի առաջ էր, մյուսը՝ մեկ տարի առաջ։ Հիշեցնենք՝ 2005-2006թթ. ծրագիրը դեռ մնում է քննարկվող ու ապագայի համար։

«Տեքստիլ» կոմբինատի տարածքով նոր միջանցիկ ճանապարհ էր կառուցվելու, որը Խրիմյան Հայրիկ փողոցը կապելու էր Շիրակացի փողոցի հետ։

«Լինելու էր այսպես՝ Մհեր Մկրտչյան փողոցի շարունակությունը միանալու է Խրիմյան Հայրիկին, ունենալու 30 մ լայնություն, երկկողմանի երթևեկելի, կանաչ գոտի, մյուս կողմից՝ ապագայի համար լինելու էր կամուրջ, որը կմիանա Շիրակացի փողոցին»,- ասել է Հենրիկ Գասպարյանը։

Մյուս առաջարկն ընդամենը մեկ տարի առաջ քաղաքաշինության կոմիտեի հանձնարարությամբ ուսումնասիրության արժանացավ։ Կոմբինատի տարածքը նախատեսում էին բնակելի նոր թաղամասի վերածել, բայց այն հիմա օրակարգում չէ։ Ամեն դեպքում, ըստ ճարտարապետի, ցանկացած ծրագիր սկսելու դեպքում քաղաքի գլխավոր հատակագծի հետ համապատասխանություն է պետք, այժմ նաև հատակագծում է փոփոխությունների անհրաժեշտություն  ծագել։ Այժմ տարածքի նոր սեփականատերերից մեկի հետ քաղաքապետարանը շինթույլտվության խնդիրների է բախվել։ Սեփականատերը Հովհաննես Հարությունյանն է, վերջինս սկսել է պարսպապատել իրեն պատկանող  տարածքը, որի թույլտվությունը ստացել է ընդամենը 2 ամիս առաջ, հիմա քաղաքապետարանը առարկություններ ունի:

«Ինքը ճանապարհի հետ պիտի գործ չունենա, իր պարիսպը պիտի սահմանների մեջ դրվի, քանի որ սեփականատերը չի ունեցել նշառման գծագիրը, հնարավոր է՝ սահմաններից դուրս է եկել»,- ասել է ճարտարապետը։

«Ես նախագծման փաթեթն ամբողջությամբ ներկայացրել եմ, որի մեջ եղել են սխեմատիկ բոլոր գծագրերը, որոնք անհրաժեշտ են եղել ու դրա հիման վրա ստացել եմ շինթույլտվությունը։ Այդ ճանապարհն էլ, որի մասին խոսում են, իմ հողատարածքի հետ կապ չունի, ես ճանապարհի վրա ոչինչ չեմ անում»,- մեր թղթակցի հետ զրույցում ասել է տարածքի սեփականատերը։

Քաղաքի գլխավոր ճարտարապետը տարածքում չի եղել, բայց պարսպապատումը որոշել է ժամանակավոր արգելել, փոխարենը սեփականատերը քաղաքապետարան ներկայացրած նախագծային փաթեթով է հիմնավորում, որ հող չի զավթել և ապագայում կառուցվելիք փողոցի երթևեկելի հատվածում աշխատանքներ չի կատարում։

Բայց այս ընթացքում չի թույլատրվի աշխատանքները շարունակել։ Իսկ սեփականատիրոջը երկու ամիս առաջ քաղաքապետարանի տրված շինթույլտվությամբ պարսպապատումն ավարտվելու ժամկետը երեք ամիս  է։ Ուսումնասիրությունները եթե պարզեն, որ շեղումներ չկան  նախագծային փաթեթից, ճարտարապետը հավաստիացնում է՝  շինարարության ժամկետը կերկարացնեն։