Գյումրիի քաղաքապետարանը դեռ հաշվարկում է հուլիսի 13-ի հեղեղի հասցրած վնասի չափը

Գյումրիում վերջին մի քանի օրերին հորդառատ անձրևներ են, որոնց հետևանքով դարձյալ մի շարք թաղամասեր վնասներ են կրել։

Հեղեղումները նոր հետևանքներ են թողնում, իսկ քաղաքապետարանը դեռ հաշվարկում է հուլիսի 13-ին տեղացած անձրևի ու կարկուտի  վնասները։ Դեռ վերջնական վնասի չափ չի հաշվարկվել:

Քաղաքապետարանը 10 մլն դրամ է հատկացրել առավել տուժած ու հեղեղին հաջորդած մի քանի օրերին դիմում ներկայացրած բնակիչների աջակցության համար: Դա հիմնականում տնակային թաղամասերին էր վերաբերում, սակայն սա վնասի իրական պատկերը չէ: Գյումրիի տարբեր տնակային ավանների ու սեփական տների բնակիչները դեռ շարունակում են դիմումներ ներկայացնել քաղաքապետարան: Համապատասխան հանձնաժողովը շրջայցերի ընթացքում է գնահատում ամեն բնակչի կրած վնասի չափը:

Անտառավան թաղամասում անձրևների հետևանքները օրերով չեն անցնում: Տնակներում առաստաղը թաց է, պատերը՝ խոնավ: Վիճակը քայքայված տնակներում նույնն է ամեն հորդառատ անձրևից հետո: Ցերեկը փոքր-ինչ չորանում է, երեկոյան անձրևները նորից իրենց հետքերն են թողնում:

Հուլիսի 13-ին արված տեսագրությունն են ցույց տալիս Շիրակշին բանավանի բնակիչները: Մետաղյա մոդուլային կացարաններում կաթոցներն անդադար են: Վնասված տանիքն անձրևից ու կարկուտից էլ ավելի է վնասվել:

Նկարածը որպես ապացույց ներկայացնում են քաղաքապետարանի հանձնաժողովին, որն ուսումնասիրում է ստացված դիմումները: Հեղեղին հաջորդած օրերին 120 տնակի և սեփական տան բնակիչներից դիմումներ են եղել: Նրանցից ընտրվել են 84 առավել տուժածները, որոնք գումարային աջակցություն են ստացել:

Դրանից հետո դիմումների քանակն ավելացել է, աջակցություն բոլոր տնակներին է պետք:

«Չեմ կասկածում, որ գերթե բոլոր տնակներում այդ օրը կաթոցներ եղել են, բայց փոքրաթիվ են այն տնակները, որտեղ հեղեղների ջուրը գետնից էր լցվել էր տուն: Դրանք ավտոկայանի տարածքում են, բնական է, 32 տարի ապրում են, ոչ մի անգամ վերանորոգում չի տեձսել և չի կարող ծածկի խնդիր չունենալ տնակը:

Կան ընտանիքներ, որոնք բնակարան ստացել են, մի մասը տեղափոխվել է, մյուսը՝ մնացել տնակում: Կան մարդիկ, որոնք փաստացի տուն ունեն, տնակները քանդման ենթակա են, սակայն ինչ-ինչ պատճառներով դեռ չեն քանդել ու ներկայանում են իբր տնակի բնակիչներ ու փորձում են աջակցություն ստանալ:

Այդ տնակները, որտեղ երկար ժամանակ մարդ չի ապրույմ, միանշանակ, չեն ստանա աջակցություն: Իսկ այն տնակները, որտեղ տանիքն է տուժել կամ պատն է խարխլվել, ավելի շատ գումար կստանան՝ որպես աջակցություն: 10 մլն դրամից ավելի արդեն հատկացվել է: Նոր դիմումների համար, որոնց աջակցություն տրամադրելու կարիք կլինի, արդեն դիմելու ենք կառավարություն՝ աջակցություն ստանալու համար»,- SHANTNEWS.am-ին ասել է Գյումրիի քաղաքապետի գլխավոր խորհրդական Կարապետ Մխչյանը:

Շրջայցի ընթացքում նաև տնակային պատմություններն են ուսումնասիրում, թե որ ընտանիքը երբվանից է տնակում, փաստացի բնակվո՞ւմ են այդտեղ, թե՞ ոչ: Ըստ այդմ էլ հանձնաժողովը որոշելու է, թե տնակում ապրող որ ընտանիքին է աջակցություն  հասնելու:

Դիմումների ընդունումը շարունակվում է, ու արդեն մոտ 250 տնակից աջակցության խնդրանքով են դիմել: Իսկ 6 ընտանիքի սոցիալական բնակարաններ են հատկացվել:

Քաղաքապետարանը աջակցության համար բյուջեում գումարներ չունի: