Բենիամինում 9 ամիս առաջ օտարված հողակտորներում գյուղացիները կառուցապատում սկսել չեն կարող

Բենիամին գյուղում կառուցապատման նպատակով աճուրդով օտարված հողերը դարձել են վեճի առարկա գյուղապետի և 10 գյուղացիների միջև: Գյուղացիները աճուրդով գնել են հողակտորներ, որտեղով անցնում է Բենիամինի ոռոգման ցանցը և չեն կարող իրենց տների շինարարությունը սկսել: Նախքան աճուրդ հայտարարելը արդյո՞ք գյուղապետարանում իմացել են, որ նույն տարածքով ոռոգման համակարգի խողովակներ են անցնում, ե՞րբ ու ինչպե՞ս են խոստացել խողովակները տեղափոխել: Այս հարցերին գյուղացիներն ու համայնքի ղեկավարը իրարամերժ պատասխաններ են տալիս: Փաստն այն է, որ 9 ամիս առաջ օտարված հողակտորներում շինարարություն սկսել առայժմ հնարավոր չէ:

Բենիամին գյուղի սկզբնամասում 2 հեկտար հող կա: Դրանք համայնքապատկան են եղել և քննարկումների արդյունքում անցած տարվա նոյեմբերին որոշել են աճուրդով վաճառել: Աճուրդին մասնակցել ու հողակտորները ձեռք են բերել գյուղի այն բնակիչները, որոնք բնակարանային պայմանների բարելավման կարիք ունեն: Հողատարածքը բնակելի կառուցապատման համար է նախատեսված: Հողը գնել են, բայց կառուցապատում սկսել չեն կարող՝ Բենիամինի ոռոգման համակարգն է խանգարում՝ խողովակները օտարված տարածքներով են անցնում:

«Հողատարածքները գնել ենք տուն կառուցելու համար, բայց բոլորս էլ կանգնել ենք նույն խնդրիր առաջ՝ չենք կարող շինարարություն սկսել՝ ոռոգման ցանցի խողովակները տարածքով են անցնում: Նույնիսկ մարտի 12-ին վիճաբանություն է եղել գյուղապետի հետ այն հարցի շուրջ, որ իրենք իրավունք չունեին հողատարածքը վաճառել, քանի դեռ խողովակներ կային տարածքում: Պատճառաբանեցին, որ կտեղափոխեն, բայց մարտի 12-ից մինչ օրս ոչինչ չեն ձեռնարկել»,- SHANTNEWS.am-ին ասել են Բենիամինի բնակիչները:

Սամվել Մկրտչյանը Բենիամինի նախկին գյուղապետն է, գիտեր, որ տարածքով ոռոգման ցանցն է անցնում: Իմանալով հանդերձ՝ մասնակցել ու 3 հողակտոր է ձեռք բերել: Առաջինն էլ ինքն է շինարարությունը սկսել: Հիմքերի համար փորման աշխատանքներ է կատարել, բայց գործն առաջ չի գնացել:

«1 ամիս է, փորել են, ամբողջությամբ ջուր է՝ լցված հիմքերում: Չեմ սպասել, որ տեղափոխեն խողովակները, 9 ամիս է՝ հողերը գնել եմ: Իրենց ոչ մի բան չի հետաքրքրում, հետաքրքրում էր միայն փողը, որը վճարել ենք: Իրենք գիտեին, որ տարածքով խողովակներ են անցնում»,- ասել է Բենիամինի նախկին գյուղապետ Սամվել Մկրտչյանը:

Բենիամինի գյուղապետն էլ նշում է, թե ոռոգման ցանցի փականները հողատարածքի եզրով են տեղադրված, սա էլ հիմք է տվել՝ եզրակացնելու, որ խողովակները նույնպես եզրով են անցնում: Իսկ տեղափոխման խոստում, ըստ նրա, տվել է այն ժամանակ, երբ շինարարությունը սկսել են ու պարզվել է, որ ամբողջ տարածքի տակ խողովակներ են:

«Իմացել ենք, որ ոռոգման ջրագիծ է անցնում, բայց 1984-1985 թվականներին կառուցված ջրագիծ է: Չի պահպանվել ոչ մի արխիվային փաստաթուղթ, և չկա նախագիծ: Ընդամենը գուշակ պետք է լինեինք, որ կարողանայինք գուշակել, թե այդ ջրագիծը որտեղով է անցնում: Համապատասխան գերատեսչություններից թույլտվություն եղել է, աճուրդ ենք կազմակերպել, վաճառել ենք հողակտորները: Ջրագծերի  տեղափոխման նախագիծն արդեն կազմվել է, սպասում ենք, որ բերքահավաքն ավարտվի, քանի որ այդ տարածքները գյուղացիները մշակել են: Բերքը հավաքելուց հետո կսկսենք աշխատանքները»,-SHANTNEWS.am-ի հետ զրույցում ասել է Բենիամինի գյուղապետ Արտակ Անտոնյանը:

Ոռոգման համակարգի տեղափոխման նախագիծը հունիսի 20-ին են պատվիրել։ Հիմա էլ սպասելու են, մինչև գյուղացիներն իրենց բերքը կհավաքեն: Ձգձգումները, ըստ գյուղացիների, խախտել են ժամանակացույցը, որը սահմանվել է տուն կառուցելու համար:

Շինթույլտվություն դեռ ոչ մի գյուղացու չի տրվել: Այս գործընթացը սկսվելու է ոռոգման ցանցը տեղափոխելուց հետո: Համայնքային բյուջեից 2 մլն դրամ է հատկացվել խողովակները հանելու և այլ տարածքով անցկացնելու համար: Գյուղապետարանը տեղափոխման աշխատանքների նոր ժամկետ է նշում աշնան վերջը: