Ում է սիրահետել Արգենտինայի մարզիչը, քանի մարմնավաճառուհու հետ է զվարճացել Մեքսիկայի հավաքականը…

Աշխարհի գավաթը մինչև Մոսկվա հասնելը շրջեց 51 երկրում, այդ թվում՝ Հայաստանում: Այսքանով էլ, առայժմ, սահմանափակվում է Հայաստանի կապը աշխարհի առաջնության հետ, եթե իհարկե հաշվի չառնենք, թե Ռուսաստանում բնակվող քանի հազար մեր հայրենակիցներ տեսականորեն հնարավորություն ունեն ներկա լինել խաղերին:

Ի դեպ, դեռ երկու շաբաթ առաջ 2 միլիոն 300 հազար տոմս, կամ ընդհանուր տոմսերի 90 տոկոսն արդեն վաճառված էր: Շուրջ 90 հազար տոմս միայն ամերիկացիներն են գնել, 80 հազար՝ բրազիլացիները, 70 հազար՝ կոլումբիացիները: Ավստրալիան ու Անգլիան ևս առավել մեծ թվով տոմսեր գնած երկրների թոփ-տասնյակում են, չնայած որ այս երկրների կառավարությունները ռուսների հետ քաղաքական սկանդալներից հետո որոշեցին բոյկոտել առաջնությունը:  Անգլիական մի պարբերական նույնիսկ գրեց, թե Ռուսաստանում մարզված կանանց հատուկ խմբեր են կազմավորվում, որոնց միակ գործը անգլիացի զբոսաշրջիկներին ծեծելն է: Առնվազն 40 հազար անգլիացի երկրպագու այդ լուրերին լուրջ չվերաբերվեց և եկավ Ռուսաստան՝ աշխարհի խաղերը տեղում դիտելու:

Աշխարհի առաջնությանը ներգրավված 11 ռուսական քաղաքներում, ընդհանուր առմամբ, մեկ միլիոնից ավելի զբոսաշրջիկների են սպասում: Սակայն քննադատություններն ու առաջնության կազմակերպման մանրումեծ թերությունների մասին հատկապես արևմտյան մամուլի հրապարակումները  հիմա էլ չեն դադարում:

 Վերջերս Վոլգոգրադի նորակառույց մարզադաշտի զուգարաններից մեկի լուսանկարը հրապարակվեց: Շինարարները մոռացել էին զուգարանակոնքերի միջև միջնապատեր տեղադրել:   Շատերը միանգամից օլիմպիական Սոչիի հյուրանոցներից մեկի երկու զուգարանակոնքով նկարը հիշեցին: Իսկական երկրպագուների համար,  սակայն նման թերությունները անհարմարություն չեն: Բրազիլացիները, օրինակ, ամեն թերության կհարմարվեն, միայն թե իրենց սիրելի հավաքականը հաղթի: Ի դեպ, Բրազիլիայում որոշել են հավաքականի խաղերի ժամերը դարձնել ոչ աշխատանքային: Միևնույն է, երբ Բրազիլիան է խաղում, ոչ մի բրազիլացի չի աշխատելու, ավելի լավ է օրենքով չաշխատեն,  հետո չաշխատած օրերը լրացնեն ազատ օրերի հաշվին:  Այսպես են որոշել իշխանությունները:

Լատինամերիկյան երկրներում  ֆուտբոլը մի ուրիշ կիրք է, ֆուտբոլիստներին էլ ներելի է ամեն ինչ: Օրինակ՝ Արգենտինայի հավաքականի մարզիչը՝ Խորխե Սամպաոլին,  առաջնության նախօրեին հայտնվել է սեքսուալ սկանդալի մեջ:  Նա փորձել է սեռական բնույթի  ոտնձգություններ անել հավաքականի խոհարարի հանդեպ: Այս պատմությունը, սակայն, Արգենտինայում ջրի երես չեն հանում: Լուրեր տարածվեցին, թե Արգենտինայի ֆուտբոլի ֆեդերացիայի նախագահը անձամբ է գումար վճարել խոհարարին լռության համար, իսկ 58-ամյա Սամպաոլին հանգիստ խղճով հավաքականի հետ մեկնել է Մոսկվա:

Իսկ Մեքսիկայի գրեթե ամբողջ հավաքականը՝ 9 ֆուտբոլիստ մինչ Ռուսաստան գալը  Մեխիկոյի հայտնի հյուրանոցներից մեկում զվարճանքներ է կազմակերպել 30 մարմնավաճառուհիների  հետ: Հասարակությունում սա նորմալ են ընդունել: Ասել են՝ տղաները մարզումներից չեն բացակայել, իսկ  իրենց հանգիստը կազմակերպել են ինչպես ցանկացել են:
Բայց ամենահետաքրքիր սկանդալը ՌԴ-ում է գրանցվել: Պետդումայի՝ կանանց և երեխաների հարցերով հանձնաժողովի նախագահ Տամարա Պլետնյովան առաջարկել է աշխարհի առաջնության ժամանակ  արգելել է ռուս կականց կապեր հաստատել արտասահմանցի զբոսաշրջիկներ հետ: Պլետնյովան հիշեցրել է, որ 1980 թվականի մոսկովյան օլիմպիադայից հետո երկրում մեծ թվով միայնակ մայրեր հայտնվեցին: