ՍԱՏՄ-ը օրական կասեցնում է մոտ 100 տնտեսվարողի գործունեություն, իսկ գաղտնի հարսանիք անող ռեստորանների հանդեպ տուգանքները կխստացվեն

Այսօր Շիրակի մարզում հերթական ստուգումներ է կատարել Սննդի անվտանգության տեսչական մարմինը՝ կառույցի ղեկավար Գեորգի Ավետիսյանի գլխավորությամբ։

Տեսչական մարմնի պատասխանատուները ստուգումները սկսել են Մարալիկ քաղաքից, Գյումրիում էլ ուսումնասիրություններ կատարել են կենտրոնում գործող սրճարաններում, հանրային սննդի կետերում ու արտադրամասերում։ Բոլոր տնտեսվարողների մոտ հիմնականում հայտնաբերել են նույն խախտումները, կազմվել են արձանագրություններ, մի քանիսի մոտ խախտումների կրկնակի դեպքեր էին, իսկ կասեցումները կլինեն պարետի որոշումներից հետո։

Սննդի անվտանգության տեսուչները սրճարաններում, հանրային սննդի կետերում նախ ուշադրություն էին դարձնում ախտահանիչ միջոցների ապահովմանը, ինչպես նաև պահանջում էին աշխատակիցների ու հաճախորդների ջերմաչափումների գրանցամատյանները։

Մատյաններում գրանցման  խախտումներ կային, սրճարաններում աչքի ընկնող մյուս խախտումը սեղանների դասավորվածությունն էր, որոնց միջև անհրաժեշտ 1.5 մետր հեռավորությունը պահպանված չէր։

Հարևանությամբ գործող մեկ այլ սրճարանում մեկ շաբաթ առաջ էր տեսչական մարմինը խախտումներ արձանագրել, եղել էր 24 ժամով կասեցում, բայց այս անգամ ևս խախտումներ գտան, սպասարկման սրահում բացակայում էին նաև փակ աղբամանները։

Ստուգումների մյուս վայրն արդեn հացաբուլկեղենի արտադրամասն էր: Տեսուչները սանիտարահիգիենիկ կանոնների պահպանման  խախտումներ չհայտնաբերեցին։

Տեսչական մարմնի ստուգումները Հանրապետության տարբեր քաղաքներում ամենօրյա են, որոնց արդյունքում՝ խախտումների պատճառով բազմաթիվ կասեցումների որոշումներ են կայացվում։ Տեսչական մարմնի ղեկավարը թվարկեց այն խախտումների տեսակները, որոնք հաճախ են հանդիպում։

«Հիմնական խախտումները, ինչին հանդիպում ենք մեր ստուգայցերի ընթացքում՝ սոցիալական հեռավորության բացակայությունն է սեղանների շուրջ, հերթերը, որոնք առաջանում են խանութներում, դիմակների ոչ պատշաճ կրելը և մատյանների անհամապատասխան լրացնելը: Օրական մոտ 100 կասեցում ենք իրականացնում, երբեմն միջինը 50-60 կասեցման դեպքեր ենք արձանագրում»,- նշեց ՍԱՏՄ ղեկավարը:

Վերահսկողությունն ինչպես է կազամակերպվում ռեստորանների ու հարսանյաց սրահների դեպքում և հատկապես քաղաքից դուրս գործող  հանգստյան գոտիներում, որտեղ ոստիկանական շուրջօրյա հսկողություն չկա և բազմամարդ հարսանիքներ ու այլ միջոցառումներ են տեղի ունենում։

«Ես ինքս առաջարկել եմ արդեն ֆինանսական տույժերը կիրառել, տեսնենք՝ պարետատունը ինչ կորոշի: Էն ռեստորանները, որոնք նախատեսված են միայն հարսանիքների համար, միայն փակելով հարցը չենք լուծի, որովհետև էսօր չեն անի, երեք օր հետո նորից կանեն, ու էդ երեք օրերի տեղը կհանեն, և չի բացառվում, որ 72 ժամյա փակելու ընթացքում իրենք նախատեսված որևէ միջոցառում ունենան»,- ասաց Գեորգի Ավետիսյանը։

Տեսչական մարմնի ղեկավարը շեշտեց, որ խախտումների հայտաբերումից և զգուշացումներից հետո հարսանիքներ կամ բազմամարդ միջոցառումներ անցկացնելու երրորդ դեպքն արձանագրելիս պատժամիջոցները ավելի խիստ են լինում, վարչականից բացի՝ ընդհուպ երկարաժամկետ կասեցումներ։