Շիրակի մարզում այս տարի ցանքատարածություններն ավելացել են, իսկ ջրամբարները լցված են կիսով չափ

Շիրակի մարզում  ոռոգման սեզոնը սկսվել է: Իրենց ցանքատարածքներն առաջինը ջրելու հնարավորություն են ստացել Շիր ջրանցքից սնվող գյուղացիական տնտեսությունները:

Իսկ որքա՞ն ջուր կա կուտակված մարզի ջրամբարներում, արդյո՞ք ջրային պաշարները բավարար են ոռոգման սեզոնին պահանջարկի բավարարման համար։ Ձմեռը սակավաձյուն էր, գարնանային տեղումների քանակը՝ քիչ:

Կուտակված ջուրը խնայողաբար ու առանց կորուստների օգտագործելու համար «Շիրակ» ՋՕ-ի ենթակայության տակ գտնվող ջրատարների ու կուտակիչ ավազանների մաքրման ու ամրացման աշխատանքներ են կատարվում:

Այգաբաց գյուղի կուտակիչ ջրամբարը կառուցվել է 1970-ականներին: Նախկինում ունեցել է նաև պոմպակայան, 90-ականներին թալանվելուց հետո հիմա աշխատում է ինքնահոս եղանակով: Գյուղի 1045 հեկտար մշակովի հողերի մեծ մասը գտնվում է թեքությունների վրա ու անջրդի է, ոռոգվում է միայն  240 հեկտարը:

Ջուրն էլ  հասնում է միայն ջրավազանում կուտակելուց հետո: Քանի դեռ ջուրը չի հոսել ջրատարներով, կորուստները նվազեցնելու համար կուտակիչ ավազանը տիղմից ու հողաշերտից մաքրվում է:

«Ջրավազանը 10 հազար խմ տարողունակություն ունի, բայց գրեթե 30 տոկոսով լցված է հողով ու տիղմով: Մաքրում ենք, որ կարողանանք գիշերը ջրերը կուտակել ավազանում, առավոտյան ժամերին էլ սպասարկենք ժողովրդին»,- ասում է «Շիրակ» ՋՕ ջրօգտագործման բաժնի պետ Արթուր Սիմոնյանը:

Ջրի հոսքի հետ ավազանում սևահող է կուտակվել, որը դուրս են բերում և տեղափոխում մոտակա  ցանքատարածություններ ու խառնում վարելահողերին: Ոռոգման ջրի պահանջարկը գյուղի վարչական ղեկավարը կանխատեսում է՝ այս տարի մեծ կլինի, քանի որ գյուղում անմշակ հողեր չեն մնացել, վարած ցանքատարածությունները նախորդ տարվա համեմատ ավելացել են:

«Նախորդ տարվա համեմատ կարտոֆիլի ցանքատարածքները կրկնակի ավելացել են: Անցած տարի մոտ 30 հեկտար էր ցանվել, իսկ հիմա մոտ 60 հեկտար, խամ հող գյուղում չի մնացել, 1040 հեկտար վարելահող ունենք, 1045 հեկտարն էլ մշակվում է»,- նշել է Այգաբաց գյուղի վարչական ղեկավար Սասուն Վանեցյանը:

Որ մարզի ջրամբարներում ջրային պաշարները քիչ էին, ձնածածկույթի բացակայության պատճառով կուտակումներ չէին լինում, հայտնի էր դեռ տարեսկզբից: Բայց գարնանային անձրևները մասնակի իրավիճակը փոխեցին: Մի երկուսում բավարար ծավալի ջուր կա կուտակված, իսկ մյուսներում ոռոգման սեզոնի մեկնարկին ջրային պաշարները գոհացնող չեն։

«Այսօրվա դրությամբ ամենաքիչը Սառնաղբյուրի ջրամբարում է կուտակված, մոտ մեկ միլիոն երկու հարյուր հազար խմ-ի չափով ջուր ունենք, բայց հույս ունենք, որ կլցվի: Արդեն 10 օր է՝ դեպի ջրամբար ջրային հոսքեր ունենք»,- ջրամբարի ներկայիս ծավալների մասին է խոսել Արթուր Սիմոնյանը:

«Այս տարի Կառնուտի ջրամբարում ունենք 17 միլիոն խմ ջուր, իսկ Վարդաքարի ջրամբարում մոտ 2 միլիոն խմ է, իմ կարծիքով, կբավարարի սեզոնին»,- ասել է «Շիրակ» ՋՕ-ի գործադիր տնօրեն Ռուստամ Գրիգորյանը:

Մարզի համար կարևոր նշանակության Արփի լիճ-ջրամբարում ևս ջրային  պաշարները քիչ են, իսկ պատճառն անցած տարվա ավարտին պատվարի ուսումնասիրության ու ամրացման նպատակով լիճը դատարկելն էր։ Շինաշխատանքները  ջրամբարում մնում են անավարտ, իսկ մարզի մյուս ջրամբարների կուտակիչ ավազաններում, պոմպակայաններում ու ջրատարներում նորոգման աշխատանքներ են:

«Շիրակ» ջրօգտագործողների ընկերության պատասխանատուները ոռոգման ջուրը բաժանելիս առաջնորդվելու են պայմանագրային պարտավորություններով, ֆերմերային տնտեսությունները արտոնյալի կարգավիճակ չեն ունենա, վստահեցնում  է պատասխանատուն:

Գյուղացիական տնտեսություններից հայտը ստանալուց հետո եռօրյա ժամկետում պարտավոր են ջուր հասցնել հողեր։ 

Նախորդ տարիներից կուտակված պարտքեր չունեն, գանձումները հասցրել են մոտ 100 տոկոսի։ Այս տարի ոռոգման ջուրը գյուղացիներին կտրամադրվի 1 խմ-ն 11 դրամ սակագնով։