«Հիմա էս կնի՞կն ա կարևոր դատավոր, թե՞ բանը». Սեյրան Սարոյանն՝ Արա Բաբլոյանին

ԱԺ-ում քննարկվում է «Հեռուստատեսության և ռադիոյի ազգային հանձնաժողովի 2017 թվականի գործունեության մասին» հաղորդումը: Հանձնաժողովի նախագահին հարց ուղղեց ԱԺ ՀՀԿ խմբակցության անդամ Խոսրով Հարությունյանը: Նա ասաց, որ ինքն օգտվում է ինտերակտիվ հեռուստատեսային ծառայությունների հնարավորություններից և շատ դժգոհ է, քանի որ արդեն 4-րդ օրն է՝ որևէ հեռարձակում չկա: Պատգամավորը հանձնաժողովի նախագահ Գագիկ Բունիաթյանից հետաքրքրվեց՝ նման դեպքերում իրենք որևէ գործառույթ ունե՞ն կարգի հրավիրելու համար:

«Մյուս հարցս կոնցեպտուալ է: Հեռուստաընկերությունների եթերի լիցենզիան տրամադրվում է ժամկետով: Պատկերացրեք, հեռուստաընկերությունը ներդրումներ է կատարում, ձևավորում է իր լսարանը և 10 տարի, 5 տարի հետ դնում ենք մրցույթի, նա դուրս է մնում: Ի՞նչ խնդիր ենք լուծում, նրա լսարանը կա, պահանջարկված է, որևէ խախտում չի կատարում: Ինչո՞ւ պիտի վերալիցենզավորվի»,- հարցրեց Հարությունյանը:

Այդ պահին նիստերի դահլիճում խառնաշփոթ իրավիճակ էր: Պատգամավորներն այլ հարց էին քննարկում: Արա Բաբլոյանը մյուս պատգամավորներին կոչ արեց այլ հարցերը դրսում քննարկել: Տեղից արձագանքեց ՀՀԿ խմբակցության անդամ Սեյրան Սարոյանը:

«Հիմա էս կնի՞կն ա կարևոր դատավոր, թե՞ բանը»,- ասաց պատգամավորը:

Նշենք, որ խոսքը ՍԴ անդամի թեկնածու Ելիզավետա Դանիելյանի մասին է:

Ի պատասխան Սարոյանի՝ Բաբլոյանը նշեց, թե Բունիաթյանը պիտի պատասխանի, չեն կարողանում լսել:

Այնուհետև խորհրդարանականները փոքր-ինչ հանդարտվեցին, և Բունիաթյանը պատասխանեց Խոսրով Հարությունյանի հարցերին:

«Պարո´ն Հարությունյան, կաբելայինների գործունեությունն էլ է մեր տիրույթում, այսօր գործում է 58  կաբելային հեռուստաընկերություն, բնական է՝ բոլորի գործունեության մասին տեղյակ չեմ, բայց եթե կոնկրետ խնդիր կա, կասեք, մենք կճշտենք, խոսքը խոշորների մասին չէ՝ կարծում եմ:

Ինչ վերաբերում է երկրորդ հարցին. լիցենզիաների ժամկետներն օրենքով սահմանված կարգ են: Ընդհանրապես հեռահաղորդակցությունն այնքան արագ է զարգանում, որ կաբելային ծառայությունների, հեռուստատեսության դասական հեռարձակումները թույլ են տալիս հեռուստաընկերություններին գործել տարբեր հարթակներում: Եթե հեռուստաընկերությունները փորձում են` հնարավորություն կունենան տարբեր հարթակներում շարունակել իրենց գործունեությունը»,- ասաց Բունիաթյանը: