Մեխանիզմներ կային, մենք պետք է խոսեինք քաղաքացիների հետ. Մանե Թանդիլյան

«Ազատություն» ռադիոկայանի կողմից նախապես պլանավորված ասուլիսից րոպեներ առաջ ՀՀ աշխատանքի և սոցիալական հարցերի նախարար Մանե Թանդիլյանը հրաժարական է ներկայացրել: Պատճառների մասին խոսելիս նա նշել է, որ հրաժարականի հիմք է դարձել իր և կառավարության տեսլականների տարբերությունը կուտակային համակարգի պարտադիր բաղադրիչի կիրառման հարցում:

«Կառավարության նիստում, որին բոլորդ հետևում էիք, ըստ էության, այնպիսի որոշում կայացվեց, որը հակասում էր այն նախագծին, որ ես էի ներկայացրել՝ պարտադիր բաղադրիչի ամբողջական կիրառումը հետաձգելու մասին»,- ասել է նա:

Թանդիլյանը նշել է, որ կային հնարավորություններ այս համակարգն առավել գրավիչ, քաղաքացիների ձայնը ավելի լսելի դարձնելու համար:

Նա ընդգծել է՝ պարտադիր բաղադրիչն այս պահին էլ որոշ քաղաքացիների համար գործում է, այն կարելի էր դարձնել ավելի ընդունելի:

«Իմ նախագիծը չարժանացավ կառավարության հավանությանը, արժանացավ մեկ այլ նախագիծ, որով թեպետ տոկոսադրույքները փոխվեցին, բայց պարտադիր բաղադրիչն ամբողջությամբ կկիրառվի հուլիսի 1-ից: Ես կարծում եմ՝ այն չի համապատասխանում կենսաթոշակային բարեփոխումների իրականացման ճանապարհին և իմ տեսլականին»,- նշել է Թանդիլյանը:

Նրա խոսքերով՝ այս պայմաններում հնարավոր չէ, որ ինքն աշխատի. լսվել են տեսակետներ, կայացվել է այն որոշումը, որի ականատեսը եղել են բոլորը: Թանդիլյանը կառավարության աշխատանքին հաջողություն մաղթեց: Հարցին՝ ինչ կանի, եթե վարչապետն իր դիմումը չստորագրի, նա պատասխանեց.

«Քաղաքականության մեջ ես մի բան եմ սովորել, որ «եթե»-ներով չեն խոսում, իրողությունը ցույց կտա»:

Լրագրողի ճշտմանը՝ արդյո՞ք վիրավորված է, Թանդիլյանը պատասխանել է, որ դա այն կատեգորիան չէ, որով ինքն առաջ է շարժվում:

«Ես ունեմ պատկերացումներ, որոնք չեն համապատասխանում կառավարության այսօրվա տեսլականին»,- ասել է նա:

Թանդիլյանը ցավով նշել է, որ շատ քաղաքացիներ առհասարակ պատկերացում չունեին՝ ինչի մասին են խոսում, անում էին դատողություններ, սակայն դրանք իր վրա չեն ազդել. «պարտադիր» բաղադրիչի դեմ եղել է պայքար, ինքը համարել է, որ համակարգը պետք է լինի և հիմնվի մարդու կամարտահայտության հիման վրա, լինի այնքան գրավիչ, որ մարդիկ ցանկանան միանալ, որովհետև համակարգը պետք է երկրին:

Այդուհանդերձ, ըստ նախկին նախարարի, ներդրման մեխանիզմները, բովանդակությունը, գրավչությունը, սոցիալական բեռը և բազմաթիվ իրավական խնդիրներ, որ ուներ համակարգը, լուծված չեն: Թանդիլյանն ասել է, որ որոշ դրույթներ փոփոխության են ենթարկվել:

«Երբ մենք սկսել էինք պայքարը, խոսում էինք այն մասին, որ պետք է քաղաքացիների համար սոցիալական բեռ չլինի. չի կարող մարդ մի օր արթնանալ, և իր սոցիալական վիճակը վատանա, սա փոփոխության ենթարկվեց»,- նշել է նա:

Թանդիլյանը ներկայացրել է իրենց առաջարկները. համակարգին միանալուց հետո, եթե տվյալ անձը չաշխատի, պետք է հնարավորություն ստանա այդ գումարից օգտվելու. այս դեպքում մարդիկ կորոշեին՝ այդ ապահովագրությունն իրենք ուզո՞ւմ էին, թե՞ ոչ:

«Այսինքն՝ որոշ կուտակումների դեպքում դու կկարողանաս և՛ ապագայի համար գումար կուտակել, և՛ այդ գումարները հիմա տնօրինել: Մեխանիզմներ կային, մենք պետք է խոսեինք քաղաքացիների հետ, տեսնեինք՝ ինչպես էին պատկերացնում»,- նշեց Թանդիլյանը:

Ֆեյսբուքյան օգտատերերին հետաքրքրում էր՝ ինչու է նա վայր դրել իր լիազորությունները, չի՞ ցանկացել պատասխանատվություն ստանձնել: Թանդիլյանը պատասխանել է, որ պատասխանատվություն ստանձնում են այն դեպքում, երբ համակարծիք են, հակառակ դեպքում պատասխանատվություն չեն ստանձնում: