Այն միջոցառումները, որոնք կատարվում են Շիրակի մարզում խստացված ռեժիմի պահանջները պահպանելու համար, բավարար են. Տիգրան Պետրոսյան

Այն միջոցառումները, որոնք կատարվում են Շիրակի մարզում խստացված ռեժիմի պահանջները պահպանելու համար, բավարար են: Այս մասին SHANTNEWS-ին ասել է Շիրակի մարզպետ Տիգրան Պետրոսյանը: Շիրակի մարզի բնակիչների մեծ մասը, ըստ մարզային օպերատիվ շտաբի դիտարկումների, ենթարկվում է խստացված ռեժիմի պահանջներին, բայց այն խախտողներ կան: Տիգրան Պետրոսյանը ներկայացրել է տվյալներ Գյումրիի ինֆեկցիոն հիվանդանոցի հագեցվածության, մարզում հաստատված դեպքերի և տնտեսական գործունեության տեսակների մասին, որոնք, պարետի որոշմամբ, աշխատելու իրավունք են ստացել:

Գրեթե դատարկ փողոցներ, որտեղ շատ քիչ անցորդներ են ու հսկող ոստիկաններ…

Վիճակը Գյումրիում այսպիսին է սկսած խստացված ռեժիմի սահմանման օրվանից: Մարդիկ գիտակցաբար տեղաշարժը սահմանափակել են: Սրանում Պետրոսյանը ոչ թե լսելով է համոզվել, այլ տեսնելով՝ անձամբ է շրջայց կատարել:

Բայց սա, ըստ Շիրակի մարզպետի, չի նշանակում, թե խստացված ռեժիմը խախտողներ չկան: Նրանք, ովքեր խստացված ռեժիմի պահանջներին չեն ենթարկվում ու տանը մնալու հորդորը լուրջ չեն ընդունում, տուգանվում են: Գործունեություն ծավալել, բացի մթերային խանութներից ու դեղատներից, այլևս թույլատրելի է նաև որոշ տնտեսվարողների: Ցանկը թարմացվել է ու բացառություններ են արվել:

«Այն պրոցեսը, որը գնում է Շիրակի մարզում, բավարար է: Նաև շրջայցը ինձ ցույց տվեց, որ ճնշող մեծամասնությունը շատ հստակ գիտակցում է իրականացվող գործողությունների կարևորությունը: Տնտեսական գործունեության հետ կապված որոշակի փոփոխություն տեղի ունեցավ սկզբնական ցուցակից: Որոշ գործառույթներ ավելացան, որոնց բացառություն տրվեց աշխատելու: Դա կապված էր մեքենաների սպասարկման ոլորտի, նաև ծաղկի և ծաղկի սրահների աշխատանքային գործունեության հետ։ Գյուղատնտեսական աշխատանքները, առանց բացառության, ընթացքի մեջ են, որովհետև հիմա է շրջանը»,- SHANTNEWS-ի հետ զրույցում ասել է Շիրակի մարզպետ Տիգրան Պետրոսյանը:

Մարզի տնտեսվարողներն այս օրերին աջակցում են Գյումրիի ինֆեկցիոն հիվանդանոցին: Սննդամթերք, առաջին անհրաժեշտության պարագաներ են նվիրաբերում բուժհաստատությանը, որտեղ բուժօգնություն են ստանում նրանք, որոնց մոտ հաստատվել է վիրուսը: Գյումրիի ինֆեկցիոն հիվանդանոցում միայն Շիրակի մարզի հաստատված դեպքերը չեն, որ հոսպիտալացվել են: Ինֆեկցիոն հիվանդանոցի նախկին հակատուբերկուլյոզային բաժանմունքն է հատկացվել կորոնավիրուսով հիվանդներից նմուշառումներ կատարելու համար:

Հիվանդանոցը տեսահսկման հնարավորություն է ստացել, բժիշկներն էլ կարող են մեկուսանալ, միևնույն ժամանակ հիվանդանոցին մոտ լինել: Շիրակի մարզում հաստատված դեպքերի թիվը փոքր է, բայց սա չի նշանակում, թե այն ռիսկային գոտի չէ: Տիգրան Պետրոսյանը նշում է՝ ամբողջ աշխարհն է ռիսկային, իսկ սա նշանակում է, որ նման պայմաններում պետք է գնահատել քաղաքների առողջապահական և մեկուսացման տարածքների հնարավորությունները: Շիրակի մարզում ևս կազմել են ցանկ, թե անհրաժեշտության դեպքում, որ կառույցները կարող են մեկուսացման տարածք ծառայել:

«Ունենք հաստատված հիվանդներ, և ռիսկի շղթան մեծ է: Հաստատված հիվանդների թիվը մեծ չէ, բայց դա չի նշանակում, որ այդքանն է, և մյուսները ռիսկի գոտում չեն: Ամբողջ Երկիր մոլորակն է ռիսկի գոտում: Մեր խնդիրն է նվազեցնել տարածման շղթան, հնարավորություն տալ առողջապահական ոլորտին ուղղակիորեն արձագանքել ստեղծված իրավիճակին»,- ասել է Շիրակի մարզպետը:

Արտակարգ դրության պայմաններում հեռավար կրթության կազմակերպումը մարզում ընթանում է ոչ առանց խոչընդոտների: Շիրակի հեռավոր գյուղերում համացանցի հասանելիության խնդիր կա: Գյումրիում ու գյուղում 50 աշակերտի հեռավար ուսուցումը հասանելի չէ համակարգիչ չունենալու պատճառով: