Ինչպիսի՞ իրավիճակ է տիրում աշխարհում՝ կապված նոր կորոնավիրուսի հետ

Նոր տեսակի կորոնավիրուսը շարունակում է մնալ համաշխարհային հանրության ուշադրության կենտրոնում: Վարակվածների թվով վիրուսի էպիկենտրոն Չինաստանին հաջորդում է Հարավային Կորեան, իսկ մահացածների թվով՝ Իտալիան:

Իտալիա

Եվրոպայում նոր կորոնավիրուսի տարածման կենտրոնը համարվում է Իտալիան: Եվրոպական երկրների մեծ մասում կորոնավիրուսի առաջին դեպքերը բերվել են հենց Իտալիայից: Մահացության ցուցանիշով հիվանդության էպիկենտրոն Չինաստանից հետո Իտալիան երկրորդ տեղում է: Այնտեղ վերջին մեկ օրում կորոնավիրուսից մահվան 133 դեպք է արձանագրվել, ընդհանուր մահացածների թիվը գերազանցել է 360-ը: 25 %-ով ավելացել է վարակվածների թիվը, որն արդեն գերազանցում է 7370-ը: Հիվանդներից շուրջ 620-ը բուժվել է:

Իտալիայի իշխանությունները երկրի հյուսիսային Լոմբարդիա վարչական շրջանում և 14 այլ նահանգներում սահմանափակել են մուտքն ու ելքը, ինչն ազդում է 16 մլն մարդու տեղաշարժի վրա: Ամբողջ երկրում մինչև ապրիլի 3-ը փակվել են դպրոցները, մարզասրահները, թանգարանները: Սպորտային միջոցառումներն անցկացվում են առանց հանդիսատեսի:

Կորոնավիրուսի տարածումը կանխելու համար Իտալիայի իշխանությունները նաև արգելել են բանտեր այցելությունները: Սա ազատազրկվածների շրջանում մեծ դժգոհությունների առիթ է դարձել: Բանտերում կազմակերպված խռովությունների հետևանքով 6 մարդ է մահացել:

Ֆրանսիա

Ֆրանսիայում գրանցվել է վարակման ավելի քան 1200 դեպք, որոնցից 12-ը բուժվել է, 19-ը՝ մահացել: Ֆրանսիայի իշխանություններն արգելել են 1000 հոգուց ավելի մարդկանց կուտակումը մեկ վայրում:

Հարավային Կորեա

Հարավային Կորեայում գրանցվել է 7470-ից ավելի վարակակիր, որոնցից բուժվել է 118-ը, մահացել՝ 53-ը: Հարավային Կորեայում կորոնավիրուսով պայմանավորված մահացության ամենացածր ցուցանիշն է գրանցվել՝ 0,7 %: Այդ երկրի նախագահ Մուն Չժե Ինը հայտարարել է, որ նոր տեսակի կորոնավիրուսի համաճարակի տեմպերն իրենց երկրում, կարծես, նվազում են:

Չինաստան

Չինաստանը նույնպես բավական դրական առաջընթաց է արձանագրել: Վիրուսի էպիկենտրոն հանդիսացող Ուհան նահանգում 14 ժամանակավոր հիվանդանոցներից 11-ը փակվել են, քանի որ հիվանդների մեծ մասը բուժվել է: Միայն Չինաստանում վերջին 3 ամիսների ընթացքում կորոնավիրուսով հիվանդացել է ավելի քան 80 հազար մարդ, նրանցից 58 հազարը բուժվել է, 3120-ը՝ մահացել:

Իրան

Հարևան Իրանում, ըստ պաշտոնական տվյալների, նոր կորոնավիրուսի 7160-ից ավելի դեպք է գրանցվել, որոնցից բուժվել է 2390-ից ավելին, մահվան դեպքերը 237-ն են:

Կորոնավիրուս է ախտորոշվել Իրանի ևս մեկ պաշտոնյայի՝ Ճգնաժամային իրավիճակների ծառայության ղեկավար Իսմայիլ Նաջարի մոտ: Նա բուժօգնության է դիմել անցյալ շաբաթ: 4 թեստերի արդյունքները նրա մոտ արձանագրել են վիրուսի առկայությունը: Իսմայիլ Նաջարը հոսպիտալացվել է, սակայն լավ ինքնազգացողության շնորհիվ նրան դուրս են գրել հիվանդանոցից և կարանտինի ենթարկել:

Իրանի դատարանները որոշակի պայմանների համապատասխանող 70 հազար ազատազրկվածների ժամանակավորապես ազատել են բանտերից, որպեսզի կանխեն հիվանդության է՛լ ավելի տարածումը:

Իրանում վարակման ամենաշատ դեպքերը գրանցվել են, Թեհրան, Ղոմ և Գիլան նահանգներում:

Այլ երկրներ

Վրաստանում նոր կորոնավիրուսով հիվանդների թիվը 15 է, Ադրբեջանում՝ 9: Երկու երկրներում էլ մահվան դեպքեր չեն գրանցվել:

Գերմանիայում կորոնավիրուսով հիվանդների թիվը կազմել է 1151 մարդ, Իսպանիայում՝ 911: ԱՄՆ-ում նոր տեսակի կորոնավիրուսով ախտահարվածների թիվը գերազանցել է 560-ը, Ռուսաստանում այդ թիվը 20 է:

Ի դեպ, այս թվերը ժամ առ ժամ փոփոխվում են: Կորոնավիրուսից հիվանդացածների, առողջացածների և մահացածների թիվն կարող եք հետևել այստեղ:

Հիվանդության ավարտի կանխատեսումները և հնարավոր բուժումը

Չինաստանի առողջապահության նախարարության պաշտոնյաներից մեկը կանխատեսել է, որ կորոնավիրուսի համաճարակը աշխարհի տարբեր երկրներում կշարունակի տարածվել մինչև հունիս:

Մինչ հիվանդությունը տարածվում է, մասնագետները փորձում են արդյունավետ դեղամիջոց ստեղծել վիրուսի դեմ: Ճապոնական դեղագործական ընկերություններից մեկն առաջարկել է դեղամիջոցում օգտագործել վիրուսը հաղթահարած հիվանդների արյան հակամարմինները: