Իրանում կորոնավիրուսի դեպքերի աճը, Իտալիայի դատարկ փողոցները, վիրուսի «նվաճած» նոր երկրները. ի՞նչ իրավիճակ է աշխարհում

Նոր տեսակի կորոնավիրուսի տարածումը շարունակում է լարվածության մեջ պահել ողջ մոլորակը: Ընդհանուր առմամբ, կորոնավիրուսն աշխարհում 2804 մարդու կյանք է խլել, նրանց մեծ մասը՝ Չինաստանում: Ավելի քան 82 հազար մարդ հիվանդ է, շուրջ 33 հազար մարդ բուժվել է:

Նոր դեպքերի կտրուկ աճը

Առողջապահության համաշխարհային կազմակերպության տվյալներով` դեկտեմբերին՝ վիրուսի տարածումից ի վեր առաջին անգամ, մեկ օրում Չինաստանի սահմաններից դուրս ավելի շատ նոր դեպք է գրանցվել, քան Չինաստանի ներսում: Փետրվարի 26-ին Չինաստանը հայտարարել է 412 նոր վարակակրի մասին, իսկ աշխարհի մյուս երկրներում նոր դեպքերի թիվը կազմել է 459:

Հարավային Կորեա

Հարավային Կորեան հիվանդների թվով Չինաստանից հետո երկրորդն է աշխարհում: Այնտեղ կա 1760-ից ավելի վարակակիր, 13 զոհ:

Իրան

Չինաստանից դուրս մահացության ամենամեծ ցուցանիշը հարևան Իրանում է: Իրանում կորոնավիրուսի վարակակիրների թիվը հասել է 245-ի, զոհերի թիվը՝ 26-ի: Նոր վարակակիրների շարքում է նաև Իրանի Մեջլիսում Ղոմի ներկայացուցիչ, Ազգային անվտանգության և արտաքին քաղաքականության հարցերով հանձնաժողովի նախագահ Մոջթաբա Զոննուրը:

Նա հայտնել է, որ անհանգստանալու կարիք չկա, և ինքը կարանտինի մեջ է:

#Video

Chairman of #Iran’s parliament National Security and Foreign Policy Commission, who is also representative of Qom in the parliament, Mojtaba Zonnour announced that his #CoronaVirus test is positive, stressing he is now in quarantine.#CoronaVirusIran #COVID19 pic.twitter.com/hU1z9jAC2d

— Iran's Today (@Iran) February 27, 2020

Օրեր առաջ կորոնավիրուս էր հաստատվել Իրանի առողջապահության նախարարի մոտ: Իրանի իշխանությունները մարդկանց կոչ են արել չմեկնել Ղոմ, որը հիվանդության տարածման էպիկենտրոնն է երկրում: Իրանում ուսումնական հաստատությունները կշարունակեն փակ մնալ:

Ավելի վաղ Իրանի նախագահ Հասան Ռոհանին հայտարարել էր, որ կառավարությունն առայժմ չի ծրագրում որևէ քաղաք կարանտինի ենթարկել:

Մերձավոր Արևելքում կորոնավիրուսի դեպքերի աճի պատճառով Սաուդյան Արաբիան ժամանակավորապես արգելել է Մեքքա և Մեդինա այցելող ուխտագնացների մուտքը երկիր:

Իտալիա

Իսկ եվրոպական երկրներից կորոնավիրուսի ամենամեծ օջախը գտնվում է Իտալիայում: Միայն Լոմբարդիա նահանգում ավելի քան 300 վարակակիր կա: Ընդհանուր առմամբ, Իտալիայում արձանագրվել է կորոնավիրուսի 528 դեպք, 14-ը՝ մահվան ելքով: Աշխատանքային օրերին, սովորաբար, բազմամարդ Միլանի կենտրոնը կորոնավիրուսի վախի պատճառով գրեթե դատարկ է, մետրոն և տրամվայները՝ նույնպես:

Իտալական քաղաքներում դատարկվել են նաև սուպերմարկետները:

Ճապոնիա

Ճապոնիայում կորոնավիրուսի գրեթե 190 դեպք է արձանագրվել, 3-ը՝ մահվան ելքով: Այս տվյալները չեն ընդգրկում օրեր առաջ Ճապոնիայի ափերին կարանտինում գտնվող Diamond Princess զբոսանավի վարակակիրներին: Ճապոնիայի վարչապետ Սինձո Աբեն կոչ է արել մարտի 2-ից մինչև ապրիլ փակել բոլոր դպրոցները:

ԱՄՆ

ԱՄՆ-ում կորոնավիրուսի 60 դեպք է արձանագրվել: Երկրի նախագահ Դոնալդ Թրամփը փոխնախագահ Մայք Փենսին նշանակել է նոր տեսակի կորոնավիրուսի տարածման դեմ պայքարի պատասխանատու: Թրամփի խոսքերով՝ կորոնավիրուսի դեպքերն ԱՄՆ-ում շատ ավելի կլինեին, եթե հիվանդության տարածման հենց սկզբից որոշակի երկրների քաղաքացիների նկատմամբ մուտքի սահմանափակումներ չկիրառվեին:

Առաջին անգամ նոր կորոնավիրուս արձանագրած երկրները

Վերջին 2 օրերին կորոնավիրուսի առաջին դեպքերի մասին են հայտարարել Վրաստանը, Ռումինիան, Դանիան, Շվեյցարիան, Էստոնիան, Նորվեգիան, Հունաստանը, Հյուսիսային Մակեդոնիան, Բրազիլիան:

Կորոնավիրուսը հասել է գրեթե 50 երկիր:

Ներկայացված թվերը, ցավոք, վերջնական չեն: Դրանք ժամ առ ժամ փոխվում են: Այդ փոփոխությունները տեղ են գտնում պարբերաբար թարմացվող այս քարտեզում:

Կորոնավիրուսը կրկնվում է

Ինչ վերաբերում է կորոնավիրուսից բուժված և հիվանդանոցից դուրս գրված ավելի քան 33 հազար հիվանդներին, այս դեպքում էլ ամեն ինչ այդքան միանշանակ չէ: Չինաստանի նահանգներից մեկում բուժվածների 14 տոկոսի մոտ կրկին կորոնավիրուս է արձանագրվել: Նման դեպք է եղել նաև Ճապոնիայում՝ բուժված կինը 3 շաբաթ անց կրկին հիվանդացել է կորոնավիրուսով:

Կորոնավիրուսից պաշտպանվելու համար ոմանք փակվում են տանը, ոմանք փորձում են հեռու մնալ մարդաշատ վայրերից: Չնայած որոշ քաղաքներում դիմակների սղությանը՝ շատերը փորձում են կրել դիմակներ: Սոցցանցերում նույնիսկ այսպիսի լուսանկարներ են տարածվում:

Իսկ Միացյալ Նահանգների հիվանդությունների վերահսկման և կանխարգելման կենտրոնը մորուք ունեցող տղամարդկանց խորհուրդ է տվել սափրվել: