Կորոնավիրուսի դեպքերի կտրուկ աճը, ծովում դեգերող զբոսանավերը, ուժասպառ բժիշկները. ի՞նչ է պետք իմանալ կորոնավիրուսի մասին

COVID-19 անվանումը ստացած նոր տեսակի կորոնավիրուսը շարունակում է լարված պահել ողջ մոլորակը և տարբեր երկրների իշխանություններին ստիպում է ծայրահեղ միջոցների դիմել:

Առաջին անգամ կարանտին է հայտարարվել Չինաստանի սահմաններից դուրս. Վիետնամի իշխանությունները 20 օրով մեկուսացրել են 10 հազար բնակչություն ունեցող Շոնլոյ բնակավայրն այն բանից հետո, երբ այնտեղ գրանցվել է վարակի 6-րդ դեպքը:

Ճապոնիայի ափերին շարունակում է կարանտինում մնալ Diamond Princess զբոսանավը, որի ուղևորներից ևս 44 հոգու մոտ կորոնավիրուս է ախտորոշվել՝ այսպիսով նավի վարակակիրների թիվը հասել է 219-ի: Ճապոնիայի իշխանությունների որոշմամբ՝ փետրվարի 14-ից զբոսանավը կարող են լքել միայն 80 տարեկանից բարձր ուղևորները, ովքեր ունեն այլ հիվանդություններ և ում նավախուցը չունի պատուհան:

Կորոնավիրուսի պատճառով ծովում դեգերումների մեջ է հայտնվել մեկ այլ զբոսանավ: Չնայած նավի շուրջ 2300 ուղևորներից և անձնակազմի անդամներից ոչ ոքի մոտ կորոնավիրուս չի ախտորոշվել, հինգ երկրների նավահանգիստները չեն ընդունել նավը: Westerdam զբոսանավի վերջին կայարանը պետք է լիներ Ճապոնիան, սակայն երկրի իշխանությունները նավում գտնվողներից ոչ ոքի թույլ չեն տվել ցամաք դուրս գալ: Ճապոնիայի օրինակին են հետևել Ֆիլիպինները, Գուամը, Թայվանը, Թաիլանդը:

Ի վերջո, Կամբոջայի իշխանությունները համաձայնել են ընդունել նավը: Նավի ուղևորները չարտերային թռիչքներով կմեկնեն իրենց երկրներ:

Իսկ Չինաստանում թե՛ մահացածների, թե՛ վարակակիրների թիվը վերջին մեկ օրում կտրուկ աճել է. հիվանդությունը 254 մարդու կյանք է խլել՝ ընդհանուր զոհերի թիվը հասցնելով ավելի քան 1350-ի: Իսկ նոր վարակակիրների թիվն ավելացել է ավելի քան 15 հազարով: Ընդհանուր առմամբ, աշխարհում կա կորոնավիրուսի 60 հազար վարակակիր:

Չինաստանի Հուբեյ նահանգի առողջապահության հանձնաժողովը կորոնավիրուսի դեպքերի կտրուկ աճը բացատրում է ախտորոշման նոր մեթոդով: Բժիշկները COVID-19 վիրուսի վարակակիրների շարքին են դասում նաև այն հիվանդներին, ովքեր ունեն կլինիկական ախտանիշներ, ում մոտ, սակայն, կորոնավիրուս չի ախտորոշվել: Ըստ բժիշկների՝ կլինիկական ախտորոշումը հիվանդներին թույլ կտա բուժում ստանալ հիվանդության նախնական փուլում:

Մինչ բժիշկներն իրենց չխնայելով պայքարում են հիվանդների կյանքի համար, սոցիալական ցանցերում լայն տարածում են ստացել չինացի ուժասպառ բուժաշխատողներին պատկերող լուսանկարները:

Ուհանում կորոնավիրուսով հիվանդներին բուժող հարյուրավոր բժիշկներ ու բուժքույրներ էլ կարճ կտրել կամ բոլորովին սափրել են գլուխները՝ որպես հիվանդության տարածման կանխարգելիչ միջոցառում:

Թե երբ հիվանդությունը կնահանջի, առայժմ հայտնի չէ. Առողջապահության համաշխարհային կազմակերպությունը դժվարանում է կանխագուշակել կորոնավիրուսի համաճարակի ավարտը:

Միջազգային էներգետիկ գործակալությունը հայտնել է, որ 2020թ. առաջին եռամսյակում նավթի համաշխարհային պահանջարկը մեծապես կնվազի, քանի որ Չինաստանում փակվել են գործարաններ, միլիոնավոր մարդիկ չեն օգտվում տրանսպորտից:

COVID-19 վիրուսի պատճառով համաշխարհային բազմաթիվ միջոցառումներ չեղարկվել են, այդ թվում՝ Շանհայի Նորաձևության շաբաթը, Բարսելոնում նախատեսված հեռահաղորդակցության համաշխարհային կոնգրեսը, ռեգբիի մրցաշարեր Սինգապուրում և Հոնկոնգում: