Ինչպես կանոնակարգել երթևեկությունն առանց արագաչափերի. քննարկում Գյումրիում

Ինչպես կանոնակարգել երթևեկությունը Գյումրիում և անվտանգություն ապահովել: Այս հարցերը քաղաքապետարանում այսօր քննարկել են ճանապարհային ոստիկանության, քաղաքապետարանի և օրենսդիր մարմնի ներկայացուցիչները: Ճանապարհատրանսպորտային պատահարները գրեթե ամեն օր են գրանցվում Գյումրիում, հիմնանորոգված փողոցներում արագության գերազանցման դեպքերն են շատ: Այդուհանդերձ, Ճանապարհային ոստիկանությունը Գյումրիի փողոցներում տեսանկարահանող սարքեր՝ արագաչափեր տեղադրել չի նախատեսում: Այսպիսին է եղել այս կառույցի պատասխանը պատգամավորի, նաև քաղաքապետարանի դիմում-նամակներին:

Արագության գերազանցում, ոչ սթափ վիճակում ղեկին հայտնված վարորդներ և նրանք, ովքեր մեքենա ունեն, վարորդական իրավունք նույնպես, բայց երթևեկության կանոններին չեն տիրապետում, այս ամենի հետևանքը ճանապարհատրանսպորտային պատահարներն են: Միայն հունվար ամսին Շիրակի մարզում ճանապարհային ոստիկանները մոտ 900 վարորդի են վարչական պատասխանատվության ենթարկել:

«Հունվար ամսին 800-900, մինչև ամսվա վերջ 1000 վարչական արձանագրություն է կազմված Շիրակի մարզում, որից 55-ը՝ ոչ սթափ վարորդների նկատմամբ:

Իմ կարծիքով՝ պետք է ոչ թե վարչական պատասխանատվության ենթարկել, այլ երթևեկության կուլտուրա է պետք մտցնել: Եթե միասին շրջենք Գյումրիում, կոնկրետ ՃՈ տրանսպորտային միջոցով, ամբողջ օրվա մեջ կարող է հայտնաբերենք 2 կամ 3 խախտում: Բայց եթե չկա տվյալ տարածքում ՃՈ մեքենա, կարող են լինել բազմաբնույթ խախտումներ, բոլորս էլ դա տեսնում ենք»,- ասել է ՃՈ 3-րդ դասակի հրամանատար Լյուդվիգ Ղանդիլյանը:

Գյումրիի փողոցներում արագության գերազանցման դեպքերն են շատ: 7 արագաչափ է տեղադրված, դրանցից երեքն են բանուկ փողոցներում: Այս թիվն ավելացնել առայժմ չեն նախատեսում: Այսպիսին է եղել Ճանապարհային ոստիկանության պատասխանը Աժ պատգամավոր Կարեն Սարուխանյանի, իսկ ավելի վաղ նաև Գյումրիի քաղաքապետարանի դիմում-նամակին: Իսկ առանց նոր արագաչափերի՝ երթևեկությունը կարգավորելու համար, ըստ քննարկման մասնակիցների, ճանապարհային նշաններ են պետք, և դրանց նշանակությունն իմացող վարորդներ: Քաղաքապետարանում հաշվել են, որ Գյումրիի փողոցներում 6000 ճանապարհային նշան է պետք:

«2012-ին, երբ մենք ստանձնեցինք աշխատանքը քաղաքապետարանում, ներքին հաշվարկ կատարեցինք, թե ինչքան գումար է հարկավոր, որ Գյումրի քաղաքում երթևեկությունը կարողանանք նորմալ հունի մեջ դնել: Մեզ տվեցին ինֆորմացիա, որ առաջին տարում դա անելու համար պետք է մոտավորապես 700 մլն դրամ: Դա, այդ ժամանակ, քաղաքի բյուջեի 25 տոկոսն էր կազմում: Ստիպված հին մեթոդներ կիրառեցինք: Պատրաստում էին նշաններ, տեղադրում էինք, բայց դրանք ստանդարտներով չէին: Միանգամից 700-800 մլն դրամ պետք է ծախսենք, փողոցները կահավորենք, որից հետո ամեն տարի 200-250 մլն պետք է ծախսենք եղածը պահպանելու համար»,- ասել է Գյումրիի քաղաքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը:

Պահանջվող գումարը Գյումրիի տեղական բյուջեի համար մեծ ծախս է, իսկ հիմնանորոգված փողոցներում կահավորման հարցը լուծել են կապալառու ընկերությունները: Ասֆալտապատել են, ճանապարհային երթևեկության նշանները տեղադրել, բայց սա չի նշանակում, թե այս փողոցներում երթևեկության կանոնների խախտումներ է՛լ չկան:

Քաղաքապետարանը պատրաստ է փողոցները կահավորել ու սպասարկել, եթե ֆինանսավորում լինի, վարորդներն էլ համեմատաբար կարգապահ կլինեն, եթե արագաչափերը շատ լինեն: Սա այսօրվա քննարկման եզրահանգումն էր:

Անվտանգ երթևեկության է՛լ ինչպիսի տարբերակներ և դրանց համար ֆինանսավորման աղբյուրներ են հնարավոր, այս հարցը Գյումրիում նաև հանրային քննարկման է դրվելու: Իսկ բալային համակարգը, որը դառնալու է երթևեկության կանոնները պահպանելու հիմնական գործիքը, Գյումրիում մինչև սեպտեմբեր չի կիրառվելու: