Այսօր Ապրիլյան քառօրյայի հերոս Մերուժան Ստեփանյանի ծննդյան օրն է

Այսօր Ապրիլյան պատերազմի հերոս, հետախուզական դասակի հրամանատար, ավագ-լեյտենանտ Մերուժան Ստեփանյանի ծննդյան օրն է: Նա կդառնար 27 տարեկան: Մերուժան Ստեփանյանը 2016-ի ապրիլին զոհվել է Թալիշի դիրքերում: Որոնք էին Ապրիլյան քառօրյայի դասերը, որ արդիական դարձան 18-ամյա պատանիների ու նրանց հրամանատարների կյանքի գնով: Այս մասին այսօր խոսել են Մերուժանի զինակից ընկերները, մարզային, քաղաքային ու օրենսդիր իշխանության ներկայացուցիչները: Մերուժան Ստեփանյանի հիշատակի միջոցառումները Գյումրիում կազմակերպել էր Արցախի պաշտպանության բանակը:

«Շիրակ» գերեզմանատան պանթեոնում են ամփոփված 90-ականների արցախյան ազատագրական պայքարի մասնակիցները, որի շարունակությամբ էլ կառուցվեցին 2016-ի Ապրիլյան պատերազմի հերոսների շիրիմները: Այստեղ միշտ թարմ ծաղիկներ են: Այսօր դրանք նորից թարմացվեցին:

Պանթեոն այցելության առիթը 2016-ի ապրիլին Թալիշում զոհված ավագ լեյտենանտ Մերուժան Ստեփանյանի ծննդյան օրն է: Հետախուզական դասակի հրամանատարը Թալիշում պայքարել է թշնամու տասնապատիկ ավելի ուժերի դեմ: Մերուժանի և քառօրյայի բոլոր զոհերի գերեզմաններին մարզային ու տեղական իշխանության ներկայացուցիչները, զինվորականները ծաղիկներ խոնարհեցին:

Մերուժանի մարտական ընկերները  նրա մասին անցյալով չեն խոսում: Մարդն ապրում է, քանի դեռ նրան հիշում են: Մերուժանի անունը քրոջ որդին է կրում: Փոքրիկ Մերուժանը 4 տարեկան է , 2016-ի մայիսին է ծնվել: Փոքրիկ Մերուժանը մխիթարանք է ավագ լեյտենանտի ծնողների համար, իսկ նրա սխրանքը՝ հպարտանալու առիթ: Թալիշի դիրքը, որտեղ զոհվել է Մերուժան Ստեփանյանը, թիվ 170 անունն է կրում: Իսկ ավագ լեյտենանտը 2016-ի ապրիլից հետո բարձրաստիճան սպայական անձնակազմի 170-ի հզոր տղա անունով է կոչել:

Թիվ 170 դիրքի զոհված 4 տղաների հիշատակի համար հուշաքարը Մերուժանի ծնողներն են կառուցել: Իսկ տարածքում անվանական խնձորենիներ են, որոնք մի օր բերք են տալու:

«Քառօրյա պատերազմը սիմվոլիզմի առումով դարձել է ապացույցը այն բանի, որ մեր նորագույն պատմությունը չի սահմանափակվում անցյալի ձեռքբերումներով: Այն ծնել ու դաստիարակել է սերունդ, որի՝ երիտասարդ տարիքում կատարված սխրանքները չեն տեղավորվում հասարակ տրամաբանության մեջ:

Ապրիլյան պատերազմը նաև ապացույցն է այն բանի, որ հայ ազգը չի մոռացել իր համախմբվածության մասին, իսկ Մերուժան Ստեփանյանը այն սպան էր, որը մարտական առաջադրանքը վեր էր դասում անձնականից: Սա է փաստում այն, որ մինչև վերջին շունչը պայքարել է թիվ 170 դիրքի պահպանության համար»,- ասել է Արցախի ՊԲ ռազմադաստիարակչական բաժնի պետ Վրեժ Իշխանյանը:

Մերուժան Ստեփանյանի հիշատակին միջոցառումը Արցախի պաշտպանության բանակն էր կազմակերպել: Իսկ անցկացման վայրը Գյումրիի թիվ 23 դպրոցն էր: Այս կրթական հաստատության հետ է միավորվել թիվ 42 դպրոցը, որտեղ սովորել է Մերուժանը: Դպրոցում պատրաստվում են անվանակոչության գործընթաց սկսել:

Զինվորականների խոսքերով՝ քառօրյա պատերազմի դասը՝ զինված ուժերը պատրաստ ու զգոն պահելն է, բանակի սպառազինության արդիականացումը, այն, ինչ վերջին տարիներին տեղի է ունենում բանակում ամեն օր: