Տոնական օրերին Գյումրիի թանգարանները ռեկորդային թվով այցելուներ են ընդունել

Գյումրին տոնական օրերը դիմավորել է հյուրերի հետ, որոնք Հանրապետության տարբեր բնակավայրերից ու արտերկրից ժամանած զբոսաշրջիկներն են։ Առաջին անգամ քաղաքը գրավիչ է դարձել նաև ամանորյա հանգիստն անցկացնողների համար։ Ըստ այդմ էլ անհրաժեշտ էր համապատասխան ենթակառուցվածքների աշխատանքն ապահովել տոնական օրերին։ Ռեստորանները, հյուրանոցները ու հյուրատները և, իհարկե, մշակութային բաղադրիչն ապահովողները՝ թատրոնն ու թանգարանները, հունվարի 2-ից աշխատել են ու արձանագրել ձմռանը երբևէ ունեցած այցելուների ռեկորդային ցուցանիշ։

Գյումրին առաջին անգամ Ամանորն անցկացնելու համար ամենահարմար քաղաքների ցանկում է հայտնվել։ Ներգնա տուրիզմը տոնական օրերին բավական լավ ցուցանիշներ է ունեցել։ Գյումրին հյուրընկալել է մայրաքաղաքի, Վանաձորի, Ապարանի, Գավառի ու այլ քաղաքների բնակիչների, որոնք ամանորյա հանգիստը համատեղել են մշակութային այցելությունների հետ։ Հունվարի 2-ից բաց են եղել Գյումրիի թանգարանները։

Առաջին անգամ տոնական օրերն աշխատանքային են դարձրել, իսկ արդյունքը ցույց է տվել, որ իզուր չէր աշխատելու որոշումը։ Մշակութային Ամանորը Գյումրիում ընտանիքներով են անցկացնում։ Տեսնելու բան, ասում են, շատ կա։ Միայն թանգարաններն ու պատմամշակութային հուշարձաններ այցելելու համար տոնական օրերը չեն բավականացնի։

Լուսանկարվում են գյումրեցի մեծերի թանգարանում ու հաշվառվում այցելությունների գրանցամատյանում։ Տոնական օրերին առաջին անգամ են աշխատում ու առաջին անգամ տարեսկզբին մեծ թվով այցելություններ գրանցում։ Ամենաշատ այցելուներն ունեցել է Գյումրիի քաղաքային կենցաղի ու ժողովրդական ճարտարապետության թանգարանը։ Հունվարի 1-4-ը գրանցել են 251 այցելու։

Իսահակյանի տուն-թանգարանում այցելուների հոսքը հունվարի 3-ից է սկսվել։ 30-ից մի փոքր ավելի այցելուներ են ունեցել։ Թանգարանի աշխատակիցները առանձնացրել են լավագույն կարծիքները քաղաքի ու թանգարանի մասին։

«Այցելուներ ունեցել ենք Երևանից, Էջմիածնից են եղել, Արցախից 3 աղջիկներ էին եկել։ Շատ գոհ էին մեր քաղաքից, շատ սիրել էին Գյումրին, Ամանորն այստեղ էին դիմավորել: Նույնիսկ ասում էին է՛լ ոչ մի Դուբայ, ոչ մի Եգիպտոս ու Վրաստան չենք փոխի Գյումրիի հետ: Համոզված ենք, որ մյուս տարի էլ Ամանորը նշելու համար գալու ենք Գյումրի»,- SHANTNEWS-ին ասել է Ավ. Իսահակյանի տուն-թանգարանի տնօրեն Կարինե Վիրաբյանը:

Մհեր Մկրտչյանի թանգարանն սկսել է աշխատել հունվարի 4-ից։ Տոները դեռ ավարտված չեն, ու այստեղ այցելությունները դեռ նոր են սկսվում, իսկ Շիրազի թանգարանում թվերն են ամփոփում՝ մինչև հունվարի 5-ը 196 զբոսաշրջիկ է թանգարան այցելել։

«Հունվարի 1-ից աշխատելը նույնիսկ ճիշտ կլիներ, որովհետև մեր քաղաքը, իրոք, դարձել է զբոսաշրջային վայր և մեր այցելուները բավականին շատ էին: Նպատակային թանգարան եկողներ չէին, եկել էին որպես զբոսաշրջիկներ Գյումրի՝ իրենց Ամանորը անցկացնելու: Դեկտեմբերի 30, 31-ին էին եկել Գյումրի ու մինչև հունվարի 3, 4-ը մնացել են: Առանց տարիքային սահմանափակման՝ 196 այցելու ենք ունեցել»,- SHANTNEWS-ի հետ զրույցում ասել է Հովհաննես Շիրազի հուշատուն-թանգարանի տնօրեն Արա Պապանյանը:

Գյումրիում անցկացրած Ամանորից հյուրերն իրենց հետ կտանեն հիշողություններ տոնական քաղաքից, նրա տարբերվող ճարտարապետությունից ու մարդկանցից, որոնց հետ տոնական մի քանի օրերի ընթացքում հասցրել են ծանոթանալ ու կապեր հաստատել: Որոշել են՝ հաջորդ տարի կրկին Ամանորը և ոչ միայն այս տոնը Գյումրիում անցկացնել։