Գյումրիում բացվել է Սուրբ Ծննդյան տոնավաճառը

Գյումրիի Կենտրոնական հրապարակում երեկ բացվեց Ամանորի և Սուրբ Ծննդյան տոնավաճառը: Լուսավոր, հեքիաթային փոքր տնակ հիշեցնող տաղավարներում ամեն ինչ հնարավոր է գտնել. ամանորյա գեղեցիկ հուշանվերներ, տոնական զարդեր ու Սուրբ Ծննդյան խորհրդանիշներ: Հրապարակում այս տոնականությունը կպահպանվի մինչև 2020-ի հունվարի 13-ը: Սուրբ Ծննդյան տոնավաճառը Գյումրիում 2-րդ անգամ է անցկացվում` այս անգամ ավելի շատ տաղավարներով ու ավելի հազվագյուտ նմուշներով: Տնակ-տաղավարները «Մենեջմենթ Սիսթեմզ Ինթերնեյշնըլ» միջազգային կազմակերպության նվերն են Գյումրիին:

Կենտրոնական հրապարակում տեղադրված 20 տնակ-տաղավարներում տոնական ձևավորման ու ապրանքների դասավորության նախապատրաստությունները մինչև Նոր տարվա հունվարի 13-ի համար են: Հեքիաթից պոկված 20 տնակ-տաղավարները Գյումրիին նվեր են, որտեղ ծննդյան տոների և տարեմուտի առիթով նվիրելու շատ բան կտեսնեն այցելուները: Ամեն ինչ ձեռագործ է, գույնզգույն, որոնք երեխաների, արվեստի ու արհեստի մարդկանց աշխատանքներն են: Ուլունքագործության խմբակի սաները Ձմեռ պապին, Ձյունանուշին ու եղևնիները պատկերել են ուլունքներով: Նաև վիտրաժային նկարչությամբ են նրանք շունչ առել:

«Ամանորյա տոնավաճառներն աշխարհում չափազանց տարածված պրակտիկա են, մարդիկ քաղաքից քաղաք, երկրից երկիր են գնում հազարավոր կիլոմետրեր, որ մասնակցեն հենց ծննդյան և ամանորյա տոնավաճառներին, որովհետև բացառիկ հնարավորություն է դա թե՛ զեղչերով, թե՛ առհասարակ ձեռքի յուրօրինակ աշխատանքներ ձեռք բերելու համար»,- ասում են մասնակիցները: Զբոսաշրջային հետաքրքրություն ներկայացնող քաղաքը օտարերկրյա զբոսաշրջիկներին գունեղ տեսարաններով է դիմավորում: Ամանորյա և Սուրբ Ծննդյա խորհրդանիշներ ստեղծել են ամեն ինչից. փայտից, կերամիկայից, ուլունքից, գործվածքից, ապակուց, նույնիսկ թղթից: Թղթե տիկնիկները ևս ամանորյա հուշանվերների շարքում են:

Ամեն տաղավար ընտրել էր իր ապրանքային տեսականին ներկայացնելու ձևը, լուսավորել այնպես, որ արվեստի ու արհեստի նմուշները ավելի տպավորիչ ու աչքի ընկնող լինեին: Նորարար լուծումներն ու տեխնոլոգիական գաղափարները Սուրբ Ծննդյան տոնավաճառում մեկտեղելու արդյունքը նաև բարեգործական նպատակ ու սոցիալական նախաձեռնության էին վերածվելու: Գյումրիում տոներն անցկացնելու ցանկություն ունեն շատ օտարերկրացիներ: Քաղաքի առաջին հյուրերից է իտալացի Դորիան Թեսորը: Առաջին անգամ է այստեղ և ընկերուհու հետ հանդիպման վայրը Գյումրին է: Նաիրան՝ Սյունիքի մարզից է, աշխատանքն է իրեն բերել այս քաղաք: Եվ հիմա զույգի համար այս օրերին հանդիպումն անմոռանալի է: Դորիան Թեսորն է ասում, որ ժամեր առաջ է հասել Գյումրի, բայց հասցրել է 2 եկեղեցի մտնել, ինչպես նաև իմանալ, թե հրապարակում ինչ արձանախումբ է և ով է Վարդան Մամիկոնյանը: Տաղավարներում շատ գեղեցիկ աշխատանքներ է տեսել: Չէր սպասում, որ այսպիսի հին ճարտարապետություն կտեսնի: Կհասցնի շատ պատմական շինություններ էլ տեսնել: Նրա ընկերուհին՝ Նաիրան էլ ասում է, իր ամեն օրն է վայելում Գյումրիում ու հիանում մեր քաղաքի գեղեցկությամբ:

Նրանց ու Գյումրի այցելող բոլոր զբոսաշրջիկների համար բազմաթիվ են Սուրբծննդյան անակնկալները: Դրանք ծառայում են 1 նպատակի՝ տոնական հյուրերին տաք թեյով ապահովել ու տոնական հուշանվերների հնարավորինս մեծ առաջարկ ներկայացնել: