Բլոգերներն ու զբոսավարները հետաքրքրված լուսաբանում են Աշոցքի ու Ամասիայի ձմեռային տուրիզմի հնարավորությունները

Հայաստանի հյուսիսային Աշոցքի և Ամասիայի տարածաշրջաններն ունեն ձմեռային տուրիզմի կենտրոն դառնալու բոլոր հնարավորությունները: Այստեղ ձմեռը խստաշունչ է, ձյան ծածկույթը որոշ բնակավայրերում հասնում է մոտ 2 մետրի, և մյուս մարզերի համեմատ ավելի ուշ է հալչում:Բայց Շիրակի մարզի հյուսիսի գրավչության ու առկա պոտենցյալի մասին թե՛ հանրապետությունում, և թե՛ հանրապետությունից դուրս շատերը տեղյակ չեն, իսկ դրա հիմնական պատճառը ոչ պատշաճ իրազեկումն ու տեղեկատվության պակասն է:Հայաստանի տուրիզմի կոմիտեն կազմակերպում է տեղի և արտասահմանում բնակվող հայ բլոգերների ու  լրագրողների ճանաչողական այցեր   Աշոցք և Ամասիա՝ համացանցային տիրույթում հյուսիսի ձմեռային գեղատեսիլ վայրերն ու սպորտաձևերի զարգացման հնարավորությունները  հանրությանը ներկայացնելու համար:«Մենք ուղևորվում ենք Աշոցք, կազմակերպել ենք ճանաչողական այց լրագրողների ու բլոգերների համար՝ ներկայացնելու Հայաստանի ձմեռային գրավչությունն ու ներկայացնելու այն վայրերը, որոնք մեծ պոտենցիալ ունեն դառնալու ձմեռային տուրիզմի կարևոր կենտրոններից մեկը: Գնում էինք տեսնելու Աշոցքի դահուկավազքի կենտրոնը, ճանապարհին տեսանք դահուկ քշող երեխաներին, իջանք ցած ու հիմա մեր բլոգերները լուսանկարում են այս գեղեցիկ տեսարանը»,- ասում է Հայաստանի Զբոսաշրջային կոմիտեի հանրային կապերի թվային մարքեթինգի փորձագետ Գայանե Այվազյանը:«Այստեղ ենք գովազդելու Հայաստանի ձմեռային զբոսաշրջությունը, որը կարծում ենք՝ ոչ այնքան ճիշտ է լուսաբանվում, բայց կարծում եմ ,որ արժանի է, որ ավելի հաճախակի անդրադարձ կատարվի այս հրաշք բնությանը: Երևանում այս տարի ձմեռն ուշանում է, և ձյուն չկա, ու սա ամենալավ հնարավորությունն էր գալ դեկտեմբերի վերջին այստեղ ու վայելել ձյունը, որովհետև չունենք այդ հնարավորությունը քաղաքում»,- իրենց այցի նպատակն է ներկայացնում զբոսավար-բլոգեր Սիրանույշ Փիլոյանը:Ըստ բլոգերների՝ Հայաստանի ձմեռային տուրիզմի հնարավորությունները հատկապես թերի է ներկայացվում ռուսալեզու զբոսաշրջիկներին, որոնք ամենաշատն են ձգտում ձմեռային հանգիստն անցկացնել մեր երկրում: Դահուկավազքով  ու ձմեռային սպորտաձևերով զբաղվելու լավագույն բնական թեքություններով հայտնի Ամասիայի ու Աշոցքի սարալանջերը ֆինանասական անհրաժեշտ ներդրումներ կատարելու և ենթակառուցվածքներ կառուցելու դեպքում կարող են մինչև մայիս ընդունել զբոսաշրջիկների մեծ խմբեր, բայց նախ անհրաժեշտ է համացանցում օտարազգի զբոսաշրջիկներին մատչելի ներկայացնել:«Ես ծնվել ու մեծացել եմ Բելառուսում, բայց արդեն վեց տարի առաջ հայրենադարձվել եմ Հայաստան և, որպես զբոսաշրջիկ, որ նախկինում գալիս էր Հայաստան և հիմա արդեն, որպես ճամփորդող-բլոգեր ու ՀՀ քաղաքացի, զգացել եմ, որ ինֆորմացիա չկա,պորտալներ չկան, հենց  ռուսալեզու աուդիտորիայի և տուրիստի համար, որ իմֆորմացիա կարողանա ստանաս՝ ո՞նց հասնի այստեղ, որտե՞ղ ժամանակ անցկացնի, որտե՞ղ կարելի է գիշերել: Հիմա ես իմ բլոգում, որ կոչվում է «Հայաստանը ուսապարկում», ռուսերենով  կներկայացնեմ մեր երկրի ձմեռային տուրիզմի հնարավորությունները, լուսանկարներ կտեղադրեմ ու կնշեմ այն բոլոր ճանապարհները, որոնց միջոցով կարելի է հասնել ձյունապատ հյուսիս ու վայելել բնության ազատությունը»,- ասում է բլոգեր Նինա Մեհրաբյանը:

Բլոգերներն ու զբոսավարները վստահ են, որ մի քանի տարի անց տարածաշրջանը կդառնա դահուկավազքի ամենահայտնի կենտրոններից մեկը, հատկապես, երբ Աշոցքում արդեն գործում է դահուկավազքի կենտրոնը, որի չորս դահուկուղիներն արդեն ստացել են սերտիֆիկատ ու  դարձել միջազգային դահուկավազքի ֆեդերացիայի ստանդարտներին համապատասխան մրցաշարեր անցկացնելու համար նախատեսված մրցուղիներ: