Հիմնանորոգվում է Գյումրիի «Մայր Հայաստան» հուշահամալիրը

Գյումրիի «Մայր Հայաստան» հուշահամալիրի տարածքում հիմնանորոգման աշխատանքներ են: Սա սուբվենցիոն հերթական ծրագիրն է: Կառավարության և քաղաքապետարանի 55:45 տոկոս հարաբերակցությամբ է համաֆինանսավորումը: «Մայր Հայաստան» հուշահամալիրը կառուցվել է 1975թ. ու 44 տարվա ընթացքում միայն մասնակի նորոգումներ են եղել: Հիմա հիմնանորոգումը վերաբերում է ոչ թե հուշարձանին, այլ հարակից աստիճանահարթակին ու ավազաններին: Քանդված հատվածները շինարարներն ապամոնտաժել են, որի ժամանակ էլ ի հայտ են եկել խորհրդային շինարարության թերություններն ու բացթողումները:

«Մայր Հայաստան» հուշահամալիրը 44 տարեկան է: 1975-ին՝ Հայրենական մեծ պատերազմում տարած հաղթանակի 30-ամյակի առիթով, այն հեղինակել են ԽՍՀՄ ժողովրդական նկարիչ Արա Սարգսյանը և վաստակավոր ճարտարապետ Ռաֆայել Եղոյանը: Հուշարձանը երկու իմաստ ուներ՝ մեծարում էր հաղթանակը ու գովերգում աշխատանքը: Իսկ քարե աստիճաններն ու դրանց միջև սանդղաձև տեղաբաշխված ավազանները կոմպոզիցիային հաղորդել են հանդիսավորություն:

44 տարվա ընթացքում հանդիսավոր աստիճանահարթակի սալիկներն ու եզրաքարերը սկսել են քանդվել: Հենց դրանց ապամոնտաժմամբ ու նորերի տեղադրումով էլ սկսվել են հիմնանորոգման աշխատանքները: Խորհրդային տարիների շինարարության հայտնի որակի մասին է: Եզրաքարերն ու սալիկները տեղադրվել են պարզապես հողի վրա, առանց բետոնացման: Սա պարզ երևում է բոլոր այն հատվածներում, որտեղ շինարարները հին սալիկները քանդել են: Ըստ այդմ էլ փոխվել է հիմնանորոգման աշխատանքների նախագիծը: Հիմա շինարարները նոր եզրաքարերն են շարում, բայց նախ` խճապատման ու բետոնապատման աշխատանքներ են կատարել, այսինքն` մեծացել է նաև սուբվենցիոն ծրագրի նախահաշիվը:

«Պարզվեց, որ որտեղ աստիճաններն են, եզրաքարերը, բացարձակապես ցեմենտբետոնե խառնուրդ չկար, տեղադրված են հողի վրա: Բնականաբար, նախահաշիվը պիտի փոխվեր: Մրցույթը շինարարը շահել է 51 մլն դրամով: Վերահաշվարկ կատարվեց ու մոտավորապես 5 մլն-ով ավելացան ծախսերը, այսինքն` հիմնանորոգման համար 56 մլն դրամ է պահանջվում»,- SHANTNEWS.am-ին ասել է Գյումրիի քաղաքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը:

5 մլն լրացուցիչ ֆինանսավորում է պահանջվել, որը նույնպես, ինչպես սուբվենցիոն ծրագրի պահանջն է, համաֆինանսավորմամբ 55:45 տոկոս հարաբերակցությամբ հատկացնելու են կառավարությունն ու քաղաքապետարանը: Ավազանները ևս վերանորոգման կարիք ունեն՝ ջրամատակարարման ապահովումը և կորուստները անհնար են դարձրել դրանց շուրջօրյա շահագործումը:

Այստեղից ջուր հոսում է տարին միայն մեկ անգամ՝ մայիսի 9-ին: Ավազանների վերանորոգումը ծրագրի հաջորդ  տարվա փուլում է, ինչը, ըստ բնակկոմունալ բաժնի պետի, անհրաժեշտ է դարձնում «Մայր Հայաստան» հուշահամալիրի տարածքի ոռոգման համակարգի վերանորոգումը:

Իսկ բռունցքն ու աստղը, որտեղ վառվելու է անմար կրակը, արդեն մշտական են: Տարիներ առաջ բրոնզաձույլ բռունցքը գողացել էին: Այն փոխարինվել էր գիպսե օրինակով, որը տարածք էր բերվում մայիսի 9-ին ու նորից տեղափոխվում: Մեկ ամիս առաջ քաղաքապետարանը նոր աստղ ու բազալտե բռունցք է տեղադրել: Նյութի ընտրությունը հատուկ է արվել, որ գունավոր մետաղների սիրահարների ուշադրությունն այլևս չգրավի: