Շիրակի մարզի զոհված և մահացած զինծառայողների 13 ընտանիքներ բնակարանի գնման վկայագրեր կստանան

Շիրակի մարզի զոհված ու մահացած զինծառայողների 13 ընտանիքներ բնակարանի գնման վկայագրեր կստանան: Այս մասին որոշումը կառավարությունն օրեր առաջ է կայացրել: Սա զոհված, մահացած ու հաշմանդամ զինծառայողների` պաշտպանության նախարարության բնակարանային ապահովման ծրագիրն է, որը 2000-ականներին է սկսվել: Այն ծրագիր է ոչ թե անօթևան, այլ բնակարանի բարելավման կարիք ունեցող ընտանիքների համար:

Շիրակի մարզի հերթացուցակում 184 ընտանիք է: Այս թվում 35-ը զոհված կամ մահացած զինծառայողների ընտանիքներն են: Նրանցից առայժմ հաստատվել են 13-ի բնակարանային բարելավման գործերը:

Նախ` առաջնահերթությունը տրվում էր, ըստ հաշվառման տարեթվի, այսինքն` ինչքան շուտ էր ընտանիքը հաշվառվել, այնքան հերթացուցակի առաջին համարներում էր: Հիմա չափորոշիչները փոխվել են: Բնակարանային բարելավում նախ` տրվում է զոհվածների կամ մահացածների ընտանիքներին: Հաշվառման նոր կարգը առաջ է գցել Կարապետյանների փոխհատուցման հերթը: 2008-ին էին հաշվառվել: Նրանց որդին՝ Հովսեփ Կարապետյանը, 1998-ին զորակոչվել է բանակ, մարտական գործողությունների հետևանքով չի զոհվել, մահացել է ծառայության ընթացքում ձեռք բերած հիվանդությունից:

Հովսեփ Կարապետյանը մահացել է զորացրվելուց 10 տարի անց: Բժշկական փաստաթղթերը բավարար հիմք են եղել, որ ընտանիքը հաշվառվի ծրագրում: Երկու երեխաները կինն ու ծնողներն ապրում են բնակարանում, որի բնակմակերեսը չի բավարարում:

Այս հիմնավորմամբ էլ Կարապետյանները ընդգրկվել են 13 ընտանիքների շարքում: Ինչպես Կարապետյաններին, այնպես էլ մարզի շահառուների մեծ մասին պաշտպանության նախարարությունը մեկ սենյականոցի փոխհատուցում է տալիս:

«Լիարժեք անօթևաններ չեն, որ ընտանիքի կազմը հաշվի առնվի: Նախատեսել են սոցիալական ապահովության իրենց տված տեղեկանքով և դրան համարժեք տալիս են: 13 ընտանիքներից 3-ը երկու սենյականոցի շահառու է, մյուսները՝ մեկ սենյականոցի: 13 ընտանիքի հատկացրել են, 5 ընտանիքի` մերժել, 8 ընտանիքի գործ էլ դեռևս քննարկման փուլում է: Ընդհանուր առմամբ, 26 հոգու գործ է քննարկվել»,- SHANTNEWS.am-ին ասել է Շիրակի մարզպետարանի բնակարանային և ենթակառուցվածքների զարգացման բաժնի պետ Տիգրան Հարությունյանը:

Պաշտպանության նախարարությունը քննել է միայն զոհված և մահացած զինծառայողների բնակարանային գործերը` 13-ինը հաստատել է, 8 ընտանիքի հարց դեռ քննարկման չի դրվել, 5-ին էլ մերժել է:

Օրինակը Անահիտ Առաքելյանի ընտանիքն է: Խաղաղ պայմաններում զոհված զինվորի մայրը հերթացուցակում է 10 տարուց ավելի: Հիմա հերթը հասել է, բայց մերժում է ստացել:

«Ես ինքս եղել եմ Ազատամարտի վետերանների միության կանանց խորհրդի նախագահ ու միշտ սպասել եմ, որ իմ հերթն էլ կհասնի: 6 անձով բնակվում եմ ընդամենը 26 քառակուսի մետր տարածքով բնակարանում: Գրություն են ուղարկել, որ մերժվում եմ, պատճառը նույնիսկ չեն ուղարկել: Քաղաքապետարանից ընդամենը մերժման ծրարն եմ ստացել»,- SHANTNEWS.am-ի հետ զրույցում նշել է Անահիտ Առաքելյանը:

Մերժման մասին եզրակացության մեջ պատճառները նշված չեն: Միայն մարզպետարանի համապատասխան բաժնում, բնակարանային գործն ուսումնասիրելիս, պարզ դարձավ, որ մերժման հիմնավորումը եղել է այն, որ ՊՆ համապատասխան հանձնաժողովի եզրակացությամբ Առաքելյանների բնակմակերեսը բավարարում է:

Հիմա փաստացի Շիրակի մարզի հերթացուցակում հաշվառված 184 ընտանիքներից փաստաթղթեր ներկայացրել, ու վերահաշվառվել է 125-ը: Հիմա այն ընտանիքներին, որոնք վկայագրեր են ստանալու, 6-ամսյա ժամկետ է տրվելու բնակարան ձեռք բերելու համար: