Boeing-ի հերթական մոդելում խնդիրներ են հայտնաբերվել. Ryanair-ը նույնպես դադարեցրել է որոշ ինքնաթիռների թռիչքները

Վերջին 1 տարվա ընթացքում ինքնաթիռ արտադրող Boeing ընկերությունը բավական լուրջ խնդիրների առաջ է հայտնվել: Նախ` խնդիր էր առաջացել Boeing 737 MAX մոդելի ինքնաթիռների մոտ, ինչը 2 ավիավթարի և հարյուրավոր զոհերի պատճառ էր դարձել: Այժմ էլ խնդիրներ են հայտնաբերվել Boeing-ի մեկ այլ մոդելի՝ 737 NG ինքնաթիռների մոտ:

Ինչպես հաղորդում է CNN-ը, իռլանդական Ryanair բյուջետային ավիաընկերությունը դարձել է վերջինը այն ավիաընկերություններից, որոնք հետաձգել են տվյալ մոդելի թռիչքները ստուգումներ անցկացնելու նպատակով:

Բանն այն է, որ տվյալ մոդելի ինքնաթիռների, այսպես կոչված, «պատառաքաղ» (pickle fork) հատվածում ճաքեր են հայտնաբերվել: Հենց այդ հատվածի միջոցով են ինքնաթիռի թևերը միանում իրանին: Տվյալ մասը պետք է անխափան ծառայի ինքնաթիռի շահագործման ողջ ընթացքում: Այդ հատվածի փոխարինումը բավական աշխատատար և թանկարժեք գործընթաց է, որը տևում է շուրջ 60 օր:

Վերջին 5 շաբաթների ընթացքում նույն տեխնիկական խնդրի պատճառով աշխարհի տարբեր ավիաընկերություններ հետաձգել են Boeing 737 NG մոդելի շուրջ 50 ինքնաթիռների թռիչքները: Այդ ավիաընկերությունների շարքում են բրազիլական, ավստրալիական և ամերիկյան խոշոր ընկերություններ:

Ryanair-ը եվրոպական ամենախոշոր բյուջետային ավիաընկերությունն է և ունի ավելի քան 400 Boeing 737:

Ընդհանուր առմամբ, աշխարհի տարբեր ավիաընկերությունների կողմից շահագործվում է 737 NG մոդելի 6800 ինքնաթիռ: Boeing ընկերությունը ստուգել է դրանցից ավելի քան 1100-ը, և խնդիրներ հայտնաբերվել են 5 տոկոսից պակաս ինքնաթիռների մոտ:

Boeing-ը հայտարարել է, որ կատարվում են լրացուցիչ ստուգումներ և անսարքությունները վերացնելու ծրագիր է մշակել:

Ի դեպ, Boeing-ը խնդիրներ ունի ոչ միայն 737 NG, այլև 737 MAX մոդելի հետ: 8 ամիս է՝ բոլոր ավիաընկերությունները դադարեցրել են Boing 737 MAX ինքնաթիռների թռիչքները: Այս դեպքում պատճառը 5 ամսվա ընթացքում տեղի ունեցած 2 ողբերգական ավիավթարներն էին, որոնք 346 մարդու կյանք խլեցին: Եթովպական ավիաընկերության Boeing 737 MAX ինքնաթիռը կործանվել էր 2019թ մարտին՝ թռիչքից 6 րոպե անց, իսկ ինդոնեզական Lion Air ավիաընկերության ինքնաթիռը՝ 2018թ. հոկտեմբերին՝ թռիչքի 13-րդ րոպեին: Մասնագետները վթարի պատճառ են համարում սենսորի և թռիչքի կառավարման համակարգի անսարքությունը: Խնդիրները վերացնելու համար Boeing-ն արդեն նախատեսվածից ավելի շատ ժամանակ է ծախսել:

New York Times-ի Deal Book համաժողովի ընթացքում ընկերության տնօրենը խոսել է Boeing-ի առաջնահերթությունների մասին․

«Նախ և առաջ, մենք պետք է համոզվենք, որ ինքնաթիռը լիովին անվտանգ է: Մենք ամբողջովին կենտրոնացած ենք այն բանի վրա, որ MAX մոդելը սկսի անվտանգ թռիչքներ կատարել: Մենք որևէ հստակ ժամանակահատվածով մեզ չենք սահմանափակի, նույնը ասել է նաև Դաշնային ավիացիոն վարչությունը: Մեզ միայն հետաքրքրում է ինքնաթիռի անվտանգությունը»,- հայտարարել է Boeing-ի գործադիր տնօրեն Դենիս Մուլենբուրգը:

Օրեր առաջ ԱՄՆ Սենատում տեղի ունեցած լսումների ընթացքում Boeing-ի ղեկավարությունն ընդունել է, որ 737 MAX մոդելի մշակման ժամանակ ընկերությունը լուրջ սխալներ է թույլ տվել: