«Մեր մանկության տանգոն» ֆիլմի հայտնի պատշգամբի շենքը հավակնում է դառնալ «Սինոփսիս Արմենիայի» կրթական կենտրոնը

Գյումրիի հայտնի պատմական շինություններից մեկը` «Մեր մանկության տանգոն» ֆիլմի պատշգամբի շենքը հավակնում է դառնալ կրթական ու արտադրական կենտրոն: Շենքը ձեռք բերելու հայտ է ներկայացրել «Սինոփսիս Արմենիա» ընկերությունը, որը Գյումրիում կրթական ծրագրերի ընդլայնման հեռանկարներ ունի:

Ընկերության ղեկավարությունն այսօր կրթության, գիտության, մշակույթի և սպորտի նախարարի հետ քննարկել է Գյումրիում այս տարվա սեպտեմբերից համատեղ իրականացվող կրթական ծրագրերի ընթացքն ու խոսել նոր ձեռնարկների մասին:

Գյումրիի ամենահայտնի պատմաճարտարապետական կառույցներից մեկը՝ «Մեր մանկության տանգոն» ֆիլմի հայտնի պատշգամբի շենքը, 20-րդ դարասկզբին է կառուցվել ու երկար տարիներ կիսաքանդ վիճակում է, թեև այն վերականգնելու ծրագրերի ու ձեռնարկների պակաս երբևէ չի եղել: Շենքի միայն մեկ հատվածի համար 7 տարի առաջ ներդրումներ կատարվեցին, վերականգնումից հետո այստեղ մարզային գրադարանը տեղակայվեց:

Հենց գրադարանի պատշգամբից ամենալավն է երևում, թե ինչ վիճակում է ամբողջ շենքը: Ռուսական կայսրության տարիներին եղել է փոստի շենք, իսկ խորհրդային շրջանում բնակեցվել է: Այդ ընթացքում պատմական շենքին կցակառույցներ են բնակիչներն ավելացրել: Դրանք խաթարում են պատմական կառույցի տեսքը, բայց ապամոնտաժման հարցերն անորոշ են, քանի դեռ վերականգնման ծրագիր չկա:

Մոտ 1 տարի առաջ շենքի պատկանելությունը փոխելու գործընթաց է սկսվել: Կառույցը համայնքային ենթակայությունից անցել է Պետգույքի կառավարման վարչությանը: 1200 քառակուսի մետր մակերեսով շենքը տնօրինելու հայտ «Սինոփսիս Արմենիա» ընկերությունն է ներկայացրել, սպասում են կառավարության որոշմանը:

Նախարար Արայիկ Հարությունյանի խոսքերով` որոշումը նախագծի տեսք ունի, և հարցը կառավարությունում դեռ չի քննարկվել: Բայց նախարարության ընդհանուր դիրքորոշումն է, որ այդ ծրագիրն այս տարածքում պետք է իրականացվի, և հիմա կառավարության հետ ավելի լուրջ բանակցություններ են ունենալու, որպեսզի համաձայնեցնեն ու իրականացնեն ծրագիրը` Գյումրին դարձնել «Սինոփսիս Արմենիայի» խոշոր կրթական կենտրոններից մեկը: Սա է ընկերության ծրագիրը, որին ծառայելու է նաև պատշգամբի շենքը, եթե հատկացման որոշում կայացվի: Իսկ կրթական ծրագրերը Գյումրիում ընկերությունը սեպտեմբերից է սկսել: 38 ուսանող ընկերության ծրագրավորման դասընթացներին է մասնակցում:

«Սինոփսիս» ընկերության նախագահ Չի-Ֆուն Չանը նշում է, որ Երևանում 850 մասնագետներ ունեն, ուրախ է, որ ընկերության գործառույթները պիտի ընդլայնեն նաև Գյումրիում: Ասում է, ամեն անգամ, երբ Հայաստան է այցելում, միշտ նոր բաներ է սովորում, թե՛ կրթական, թե՛ մշակութային: Գյումրիում տեսնում է մեծ պոտենցիալ ու մշակութային ժառանգություն:

«Սինոփսիս Արմենիա» ընկերության տնօրեն Հովիկ Մուսայելյանն էլ ասում է, որ սա Գյումրիի համար բացառիկ շանս է, որ մարդիկ հասկանան, որ այսօր կարելի է համաշխարհային բարձր մակարդակի կրթություն ստանալ Գյումրիում ու տեղում առաջատար ընկերությունից ստանալ աշխատանքի հրավեր:

Գյումրիում կրթական մեկ այլ ծրագիր էլ նախարարությունն է պատրաստում: Խոսքը բուհերի միավորման մասին է, ինչը, ըստ Արայիկ Հարությունյանի, տեղի կունենա «Բարձրագույն կրթության մասին» օրենքի ընդունումից հետո: Նախարարության ցանկությունն է Գյումրիում ունենալ հզոր տարածաշրջանային բուհ` միավորելով այն բոլոր կարողությունները, որոնք կան Գյումրիում:

Կրթության, գիտության, մշակույթի ու սպորտի նախարարը այսօր նաև հասցրել է լինել Շիրակի պետական համալսարանում, բայց հանրույթի հետ չի հանդիպել: Նախարարի խոսքերով` բուհի որոշ ենթակառուցվածքներում եղած խնդիրներին է ծանոթացել: Առաջիկայում խոստացել է նորից բուհ այցելել, նշել Շիրակի պետական համալսարանի հիմնադրման 85-ամյակն ու դասախոսների հետ քննարկել «Բարձրագույն կրթության և գիտության մասին» օրենքի նախագիծը, որը անուղղակիորեն առնչվում է նաև բուհի ներքին խնդիրներին: