Գյումրիում թերություններով ասֆալտապատված փողոցները քաղաքապետարանը չի ընդունի. թեժ քննարկում

Այսօր Գյումրու ավագանին հերթական նիստն է անցկացրել: Օրակարգային հարցերի մեծ մասը դարձյալ առնչվել է անհատ քաղաքացիներին ու տարբեր կառույցների տեղական բյուջեից ֆինանսական հատկացումներին:Օրակարգի 13 հարցերի քննարկումից հետո առաջին անգամ ավագանու անդամների և քաղաքապետարանի տարբեր բաժինների պատասխանատուների միջև  տեղի է ունեցել հարցուպատասխան։ Հետաքրքրող հարցերը վերաբերել են հիմնականում փողոցաշինական աշխատանքների ընթացքին, ինչպես նաև փողոցների լուսավորությանն ու ճանապարհային նշանների բացակայությանը։Համայնքային բյուջեից գումարային հատկացումներից մեկն էլ վերաբերում էր Գյումրիում քանդակագործության միջազգային սիմպոզիումի կազմակերպմանը: Այդ նպատակին ավագանին որոշեց մոտ մեկ միլիոն դրամ տրամադրել, մեկ այլ որոշմամբ՝ Արթուր Ալեքսանյանի մարզադպրոցը ցանկապատելու համար բյուջեից գումար հատկացվեց: Գումարի չափը որոշվել է նախագիծ-նախահաշիվ կազմելուց հետո՝ 340 հազար դրամ:Գյումրու բյուջեից ավելի մեծ գումար կտրամադվի կոմունալ ծառայության ավտոպարկը թարմացնելու համար: 14 ու կես միլիոն դրամով, բայց երկրորդային շուկայից գնելու են բեռնատար ու ավտոաշտարակ։ Օրակարգային հարցերից բոլորին կողմ քվեարկելուց հետո առաջին անգամ հարցուպատասախանի ձևաչափով շարունակվեց նիստը: Բնակկոմունալ բաժնի պետը նախ տեղյակ պահեց, որ նախատեսում են ասֆալտապատ փողոցները կահավորել արագաչափերով ու տեսախցիկներով։

«Մեկ շաբաթ առաջ մենք դիմել ենք ՀՀ ճանապարհային ոստիկանությանը՝ խնդրելով, որ ուսումնասիրություններ կատարեն Գյումրիում: Հատկապես նորակառույց փողոցներում տեղադրվեն արագաչափեր, իսկ խաչմերուկներին տեսախցիկներ, հիմա սպասում ենք պատասխանին»,- տեղեկացրել է Կնյազ Մանասյանը։

Այս հարցը ներկայացնելուց հետո Կոմունալ բաժնի պետին այլ հարցեր էլ ունեին: Կնյազ Մանասյանն այդպես էլ մնաց ամբիոնի մոտ կանգնած: Իսկ հարցերը վերաբերում էին փողոցաշինական աշխատանքների ընթացքին ու որակին։

«Փողոցներն արդեն ասֆալտապատել,  վերջացրել են, ուզում եմ իմանալ, թե ինչ չափորոշիչներով են ընդունվելու ասֆալտապատված փողոցները, քանի որ էդ փողոցների մեջ կան մի քանիսը, որ այդքան էլ լավ վիճակում չեն գտնվում, օրինակ՝ Երևանյան խճուղին»,- հարցրել է ավագանու անդամ Ավետիս Առաքելյանը:

«Երևանյան խճուղու մասին ասեկոսեներ են տարածվում, որ պիտի քանդվի, նորից ֆռեզ արվի ու ասֆալտապատվի: Յուրաքանչյուր փողոց ունի իր անհարթության որոշակի թույլատրելի սահմանը, դա մասնագիտական լաբորատորիաներն են ստուգում, արդեն եկել ստուգել են, չորս կտոր տարվել է ուսումնասիրության, մենք դեռևս պատասխան չունենք»,- ասել է բնակկոմունալ և շրջակա միջավայրի պահպանության բաժնի պետը:

«Այն փողոցները, որոնք Համաշխարհային բանկի միջոցներով արվեցին, եթե ունեն թերություն, չենք ընդունելու, միանշանակ, մինչև վերջին կաթիլն անելու են, որ լինի ամեն ինչ տեղը-տեղին: Վազգեն Սարգսյան փողոցում էլ կա թերություն, Տիգրան Մեծում էլ կա, ես ասել եմ՝ ամեն մի շինարար գլխով պատասխանատու է որակի համար: Հատուկ մեքենա ենք բերել, որն անցնում է ասֆալտի վրայով ու ցույց է տալիս բոլոր թերությունները, մենք փողոցները չենք ընդունի մինչև խնդիրները չվերացվեն»,- նշել է Գյումրու քաղաքապետ Սամվել Բալասանյանը։

Հետո անդրադարձան թափառող շների դեմ պայքարին: Ավագանու անդամները հետաքրքրվեցին, թե կենդանիների հանդեպ բռնությունը քրեականացվող օրենքն ընդունելուց հետո, ինչ մեթոդներ է պատրաստվում կիրառել թաղամասերում վտանգավոր, թափառող շների հարձակումներից բնակիչներին պաշտպանելու համար:

«Որոշակի աշխատանքներ մեր կողմից արվել են, քննարկումներ են եղել, հանդիպել ենք թափառող կենդանիների վնասազերծմամբ զբաղվող կազմակերպության ղեկավարների հետ: Մենք քննարկեցինք մի երկու տարբերակ, առաջինը, երբ ծառայությունների մատուցման պայմանագիր կնքենք կազմակերպության հետ, որ իրենք նույն ծառայությունները մատուցեն մեզ մոտ, բայց հրաժարվում են, ասում են՝ դուք բռնեք շներին, տեղափոխեք Երևան»,- քննարկումների մասին է խոսել Գյումրու փոխքաղաքապետ Հայկ Սուլթանյանը:

Վտանգավոր շներին հավաքելու գործը հաջորդ տարվանից նախատեսվում է վստահել քաղաքապետարանին կից ստեղծվող ոչ առևտևրային մի կազմակերպությանը կամ համայնքային կազմակերպություններից մեկում ավելացնել հաստիքներ թափառող շներին հավաքելու և խնամելու համար: Պարզվեց` այդ աշխատանքների համար կա նաև արդեն անհրաժեշտ տարածք ու շինություն: