Գյումրիից Ամասիա տանող ճանապարհի ու կամրջի հիմնանորոգման աշխատանքները կավարտվեն հոկտեմբերի 20-ին

Գյումրի-Կապս-Ամասիա հանրապետական նշանակության ճանապարհի հիմնանորոգման աշխատանքները մի քանի օր դադարեցված են: 6 կմ երկարության հատվածում մեկ ամիս առաջ մեկնարկած շինարարությունը ժամանակավոր է դադարեցվել: Պատճառը ոչ ֆինանսական է, ոչ էլ նախագծային:

Պարզապես աշխատանքներն իրականացնող երկու շինընկերություններն այս պահին ամբողջ շինտեխնիկան և բանվորական ուժը կենտրոնացրել են միջպետական ճանապարհի ՝ Աշոցք-Բավրա հատվածի ասֆալտապատումը ժամանակին ավարտելու գործին:

Գյումրի-Կապս-Ամասիա ճանապարհի հիմնանորոգումը կշարունակվի Աշոցք-Բավրայի շինարարությունն ավարտելուց հետո: Այս ընթացքում շինարարը կհասցնի ամբողջությամբ ավարտել Գյումրի-Կապս-Ամասիա ճանապարհի երկու հատվածներն իրար կապող կամուրջների ամրացումը:Ամասիայի տարածաշրջանի 18 գյուղեր հասնելու իակ ու հիմնական ճանապարհը սա է: 25 կմ երկարության ճանապարհի 6 կմ-ը վերջապես հիմնանորոգվող ճանապարհների ցանկում  է հայտնվել:

18 գյուղերի բնակիչների համար 30 տարի ճանապարհը սպասարկող ընկերությունը ամառ-ձմեռ տրակտորներով մեծ ու փոքր փոսերը հարթեցնելով ու մոտակայքից բերված կավային խառնուրդով էր միայն անցանելի դարձնում:

Առաջին անգամ նույն ճանապարհը կապիտալ նորոգվում է: Հիմքերն ու ներքին ենթակառուցվածքներն ամրացվել են, շրջադարձերի այն հատվածներում, որտեղ տեսանելիություն գրեթե չկար, ժայռերը կտրելու հաշվին ճանապարհը լայնացվել է ու դարձել 11 մետրից ավելին, որից 7․20 մետրը երթևեկելի մասն է:Լայնացնելուց բացի, ամրացվել են նաև Ջրաձոր գյուղի ձորամերձ հատվածների ճամփեզրին հին բետոնե արգելապատնեշները, կառուցվել են նաև նորերը: Հիմա ճանապարհի աշխատանքները դադարեցված են: Բանվորական ուժն ու տեխնիկան տեղափոխվել է Աշոցք:Գյումրի-Բավրա մինչև Վրաստանի սահման հասնող 40կմ երկարության միջպետական ճանապարհի ամենավատ վիճակում գտնվող՝ 9 կմ հատվածն է հիմնանորոգվում:

Ամասիայի ճանապարհի շինարարության ժամանակավոր դադարի ընթացքում շրջանցիկ ելք ու մուտքի խնդիրն են լուծելու, որ մեքենաների երթևեկությունը չխանգարի ասֆալտապատմանը:

Շինարարությունն այժմ դադարեցված չէ ամենակարևոր հատվածում: Խոսքը 36 մետր երկարության կամրջի մասին է: Հիմնովին ամրացվում է 60-ականներին կառուցված կամուրջն իր կամրջակներով: Մասնագիտական ուսումնասիրություններ կատարվել են, կամրջի ընդհանուր վիճակը գնահատել են բավարար:Կամուրջը հենված է գետի մեջ գտնվող երկու սյուների վրա, ծանրությունն իր վրա կրող բետոնե կոնստրուկցիայի ներքին մասում դեռ պահպանված են փայտե հենարանները, որոնք հավասարությունը պահելու համար 60-ականներին կիրառել են շինարարները:Բետոնե մայթեզրերի վրա կան հատուկ անցքեր, որոնց ներսի մակերևույթը մետաղապատ է, նախատեսված է անձրևաջրերի հեռացման համար, իսկ կամրջի ծածկը պահպանելու համար տեղադրվելու է ջրահեռացման նոր համակարգ:

Մեծ կամրջից բացի, ամրացվել են նաև երկու փոքր կամուրջները: Կամրջի տակով հոսող ջրի անցանելիությունը ապահովելու համար տեղադրվել են 1800 սմ տրամագծով խողովակներ, որոնք նաև բետոնե ծածկի համար ամուր հիմք են հանդիսանում:

Կամրջի աշխատանքների ավարտին քիչ բան է մնացել, դրանից հետո շինարարները տեխնիկան և աշխատուժը կենտրոնացնելու են Գյումրի-Կապս-Ամասիա ճանապարհի ժամանակավոր դադարեցված աշխատանքները շարունակելու համար:

Մինչ այդ շինարարները կավարտեն նաև Աշոցք-Բավրա հատվածի ասֆալտապատումը: Շինարարության նպաստավոր եղանակը Հայաստանի հյուսիսային տարածաշրջանում շատ կարճ է, 20 օրից նախատեսում են ճանապարհը շահագործման հանձնել: