115 մլն դոլարի հայց Արցախի դիրքերի ուղղությամբ հարվածին մասնակցած իսրայելական ընկերության դեմ

Ներդրողները 115 միլիոն դոլար են պահանջում իսրայելական այն ընկերությունից, որի մասնագետներն ադրբեջանցիների խնդրանքով սեփական մահապարտ անօդաչու թռչող սարքը կիրառել են Արցախի հայկական դիրքերի ուղղությամբ։ Ընկերության բաժնետոմսերը զգալիորեն նվազել են այս միջադեպի մասին հայտնի դառնալուց հետո, և բաժնետերերը դատարան ներկայացված հայցով հատուցում են պահանջում ընկերությունից: Ընկերության բաժնետոմսերի գներն այս ընթացքում ընկել են ավելի քան 35 տոկոսով (տե՛ս գծապատկերում)։

Դեռևս ամռանը ընկերության աշխատակիցներից երկուսը տեղեկացրել էին, որ երբ իրենք Ադրբեջանում ներկայացրել են անօդաչու թռչող սարքը, խնդրանք են ստացել ադրբեջանցիներից՝ հենց հայկական դիրքերի դեմ կիրառել սարքը՝ դրա հնարավորությունները մարտական պայմաններում ցուցադրելու համար։ Չնայած ընկերության ղեկավարության սպառնալիքներին՝ աշխատակիցները հրաժարվել են անել դա, ինչից հետո ընկերության բարձրաստիճան ներկայացուցիչն անձամբ է գործարկել սարքն ու այդպիսով հարձակում իրականացրել Արցախի հայկական դիրքերի ուղղությամբ։

«Միգուցե իրենց մոտ որոշակի խնդիրներ կային՝ կապված կադրերի հետ, որոնք պետք է կիրառեին այդ մահապարտ տարբերակը կամ խնդիրներ կային արտադրության հետ․ Որոշակի բաներ չէր ստացվել, նորից փորձում էին ոչ թե իրենց մոտ հավաքված, այլ Իսրայելից բերված տարբերակները փորձարկել իսրայելցի մասնագետների միջոցով, որպեսզի հետագայում միգուցե իրենք յուրացնեն արդեն դրանց օգտագործումը»,- նշում է Razm.info մասնագիտացած կայքի վերլուծաբան Տարոն Հովհաննիսյանը։

Միջադեպի մասին հայտնի դառնալուց հետո դրա վերաբերյալ քննություն սկսվեց Իսրայելի պաշտպանության նախարարությունում, ապա գործը փոխանցվեց ոստիկանության՝ միջազգային քրեական հանցագործությունների բաժնին։ Այս ընթացքում սառեցվեց ընկերության միջազգային պայմանագրերից մեկի կատարումը, որով արտադրողը 20 միլիոն դոլարի այս սարքերից պետք է մատակարարեր այսպես կոչված «նշանակալի գնորդին», որի անունը չէր բացահայտվում։

«Հետաքննությունից տարածված նյութերը հենց Ադրբեջանի հետ կապված միջադեպի շուրջ էին, ըստ այդմ՝ այդտեղ կասկած չկա, որ նույն հետաքննության շրջանակներում Իսրայելի պաշտպանության նախարարությունը նախ՝ դիմել էր նման քայլի, այնուհետև արդեն հետաքննության արդյունքում քրեական գործ է հարուցվել»,- նշում է վերլուծաբանը։

Սակայն ադրբեջանական իշխանությունները ժամանակին պայմանագիր են կնքել Aeronautics ընկերության հետ, որի հիման վրա սարքի արտադրությունը կամ հավաքումը պետք է կազմակերպվի հենց Ադրբեջանում։ Արդեն իսկ ներկայացվել է դրա ադրբեջանական տարբերակը՝ հավաքված Իսրայելում արտադրված դետալներով: Ընդ որում՝ այդ սարքը ներկայացվել է նույնիսկ Ադրբեջանի նախագահին (լուսանկարում)։

Սրա հետ կապված հայտարարություն է տարածել Իսրայելի խորհրդարանի պատգամավոր Թամար Զանդբերգը, որում մասնավորապես նշել է. «Aeronautics ընկերությունն անօդաչու թռչող սարքեր է արտադրում նաև Ադրբեջանում կամ առնվազն թույլտվություն է տվել, որ ադրբեջանական ընկերությունը Իսրայելում արտադրվող այդ սարքերի պատճենները հավաքի Ադրբեջանում։ Իսրայելի պաշտպանության նախարարին ուղղված իմ նամակում ես պահանջել եմ, որ նա հրահանգի կասեցնել Aeronautics ընկերության կողմից Ադրբեջանում արտադրություն կազմակերպելու արտոնագիրը և, մասնավորապես, հրահանգի դադարեցնել Ադրբեջանում այդ անօդաչու թռչող սարքերի արտադրությունը»։

«Ադրբեջանի տարածքում դետալներ չեն արտադրվում, պարզապես հավաքվում են Իսրայելից ու Եվրոպայից բերված դետալների միջոցով։ Եթե դատենք հրապարակվող տվյալներից, ապա [Իսրայելում և Ադրբեջանում հավաքվող սարքերը] նույնն են, քանի որ նշվում են նույն մարտավարատեխնիկական բնութագրերը»,- նշում է Տարոն Հովհաննիսյանը։

Միջադեպին իսրայելական ընկերության ներկայացուցչի մասնակցությունը ներկայում քննվում է Իսրայելի ոստիկանության հատուկ վարչությունում։ Մինչ քննության ավարտը, սակայն, իսրայելական դատարանի որոշմամբ դադարեցվել է քննության մանրամասներին վերաբերող տեղեկությունների տարածումը։