Կովերի նախիրն ամեն օր արոտ է գնում Գյումրիում նոր ասֆալտապատված Գերցեն փողոցով

Անանցանելի ջրափոսերով, մշտապես ցեխապատ ու քայքայված Գերցեն փողոցը թեև առայժմ ոչ ամբողջությամբ, բայց վերջապես ասֆալատապատվեց: Ինչպես թաղամասի բնակիչներն են ասում, 30 տարի անց շքերթն իրենց դռնով էլ կանցնի, եթե քաղաքավայել փողոցների միջավայրն ապահովվի: Գերցենի փողոցում գյուղի ու քաղաքի կենցաղը խառնվել է իրար:

Նախկինում չէ, բայց հիմա բողոքելու պատճառներ ունեն 4-5 հարևան տներից, որոնք զբաղվում են անասնապահությամբ: Նոր ասֆալտապատ փողոցը հարթ ճանապարհ է բացել արոտ գնացող մոտ 60 գլուխ խոշոր եղջերավորների համար:

«Ամեն օր լապատկեքով թրիքը կմաքրենք, օրը երեք անգամ»,- դժգոհում են Գերցեն փողոցի բնակիչները։

Գերցեն փողոցի անսովոր ու տարօրինակ դեպքերը շարունակվում են, մուտքի դռան ասֆալտապատման պատմությունը դեռ չավարտած, փոշուց ու ցեխից հազիվ ազատված փողոցում ամեն առավոտ հարևանները բահով հեռացնում ու ցնցուղով լվանում են նոր ասֆալտապատած փողոցը:

Երբ քանդված ու քայքայված վիճակում էր, չէին տեսնում կամ աչք էին փակում: Հիմա ստիպված են՝ գյուղի կենցաղով ապրող հարևանների պատճառով: Անասնապահությամբ զբաղվող 4 տնտեսության անասուններն ամեն օր հենց այս փողոցով գնում են արոտ ու հետ գալիս, իսկ հետևանքներն արդեն անտանելի են բոլորի համար:

«Մե 50-55 հատ կով մի անգամ առավոտ էրթալուց,մի հատ էլ երեկոյան՝ 7-7։30-ին, հետ գալուց կկեղտոտեն, դուք պատկերացրեք՝ 50 կովից հինգ հատն էլ օր ըդպես էնեն, ինչ կրնա էղնի փողոցի վիճակը»,- ասում է բնակիչներից Ժորա Աթոյանը:

«Էն վախտ հող էր, հողի վրա ոչինչ հլը, բայց հմի օր ասֆալտ է, կուգաս՝  հոտավետ տորթը դրած է»,- կատակում է դժգոհող բնակիչներից Մանուկ Հովհաննիսյանը:

Քաղաքում անասնապահ 5 տնտեսությունները սեփական տների բնակիչների նոր հարևանները չեն ու, այս ընտանիքներն ավանդաբար ու տարիներով զբաղվել են անասնապահությամբ: Քաղաքի բանուկ՝ Գերցեն փողոցում հարևանների աչքի համար վաղուց սովորական տեսարան են՝ փողոցի վրա գոմաղբ ու խոտի դեզ:  Բայց մեծ թաղամասում փոքր գյուղի կենցաղը է՛լ չեն ուզում հանդուրժել, ի վերջո, 3 տասնամյակ անց իրենց փողոցն ասֆալտապատվել է:

«Բոլորս էլ կբողոքենք. որ ստեղով չանցնի իրանց մալը, թող ուրիշ ճամփով տանին»,- դժգոհում էր Արաքսի Ջելեզյանը:

«Ինչքան կարելի է փչացնել ասֆալտը, էդ հայվաններին հո չես կրնա ըսես, թե գիտե՞ս՝ էս մարդիկ 30 տարի սպասել են օր ստեղ ասֆալտ էնեն, դու ստեղ մի կեղտոտե, գնա հողի վրա կեղտոտե, կրնա՞ս ըդպես բան ըսես, չես կրնա»,- ասում էր բնակիչներից ևս մեկը։

Բողոքին հավասար նաև կատակում էին: Ասում են՝ ասֆալտ փռեցին, որ անասունների մոտ փողոցն անցնելու կուլտուրան զարգանա, փոխարենը հարևանների գործն ավելանա: Անասնատերերը չեն մաքրում, ստիպված հարևաններն են անում, որ հոտն ու գոմաղբն իրենց տներ չմտնի: Բազմաթիվ տարբերակներ են առաջարկել՝ շրջանցիկ ճանապարհով նախիր տանել, կամ գոնե գարուն-ամառ թաղամասից տեղափոխել:

Մաքուր փողոց ու մաքուր օդ շնչելու ցանկությունները մի կողմ, այլ մտահոգություն էլ ունեն: Բողոքը հասել է քաղաքապետարան, այստեղ էլ կոմունալ բաժնի պատսախանատուները սկսել են անհանգստանալ արդեն ասֆալտապատ փողոցի պահպանության վիճակով: Գոմաղբն ու մնացածը կքայքայեն ամբողջ ասֆալտաշերտը:

«Սելը ճռռալու փոխարեն, սելվորն է ճռռում: Մենք հսկայական գումարներ, միլիոններ ենք ներդրել, որ կարողանանք նորմալ փողոց ստանալ, հասկանում ենք, որ մարդիկ, անասուն պահելով, սոցիալական խնդիր են լուծում, բայց դա չի նշանակում, որ նոր կառուցված փողոցի վրայով կարելի է անասուն տանել-բերել, կովերի արտաթորանքն ավելի շուտ է քայքայում նոր տեղադրված ասֆալտաշերտը»,- ասում է Գյումրու քաղաքապետարանի բնակկոմունալ և շրջակա միջավայրի պահպանության բաժնի պետ Կնյազ Մանասյանը։

Կոմունալ բաժնի պետն անձամբ է հանդիպել անասնատերերի հետ, բայց դրանից ոչինչ չի փոխվել: Առաջարկներ էր արել, անասնապահները չեն համաձայնել: Կովերին արոտ տանելու համար կան երկրորդային ճանապարհներ, որոնք ցույց են տվել անասնատերերին, բայց հրաժարվել են: Հաջորդ քայլը եղել է վարչական պատասխանատվության ենթարկելու մասին ծանուցումներ ուղարկելը:

Վարչական պատասխանատվությունը՝ տուգանքն է, առաջին անգամ 16 հազար դրամով, չենթարկվելու դեպքում տուգանքները կրկնապատկվում, եռապատկվում են: Բայց տուգանքի դիմաց մուծումները խնդրի լուծում չեն, պահանջ են դրել անասնատերերի առջև՝ կա՛մ  նախիրը տանել առաջարկած շրջանցիկ ճանապորհով, կա՛մ թաղամասից սեզոնի ընթացքում տեղափոխել այլ վայր:

Համաձայն ծանուցումների՝ նաև ժամկետ են նշանակել՝ մեկ ամսում հարցերը կարգավորել: Հակառակ պարագայում՝ բանը կարող է հասնել նրան, որ Գերցենի կովերի ու փողոցի պահպանման հարցը դառնա ավագանու քննարկման թեմա: