Գյումրիում խոհարարների, մատուցողների, մաքրուհիների ու ծրագրավորողների պահանջարկը մեծ է

Վաղը Գյումրիում կանցկացվի աշխատանքի 12-րդ տոնավաճառը, որին մասնակցության հայտ են ներկայացրել մարզի 36 գործատուներ՝ մոտ 380 թափուր աշխատատեղի համար։ Տոնավաճառների կազմակերպման անհրաժեշտության ու արդյունավետության մասին է «Մեդիա կենտրոնում» հրավիրած ասուլիսի ժամանակ խոսել Գյումրու զբաղվածության կենտրոնի տնօրեն Ամալյա Ադամյանը։ Այս անգամ տոնավաճառում միայն աշխատանքի առաջարկներ չէ, որ կներկայացվեն, կանցկացվեն մասնագիտական կողմնորոշման քննարկումներ ու վարպետության դասեր։

Աշխատանքի տոնավաճառները գործատուների և աշխատանք փնտրողների հանդիպման, առաջարկի և պահանջարկի քննարկման լավագույն հարթակներից են դարձել։ Արդյունքների մասին արդեն Ամալյա Ադամյանը խոսում է թվերով: Անցած տարիներին անցկացված աշխատանքի տոնավաճառների ցուցանիշներից դժգոհ չէ։

12-րդ անգամ անցկացվող տոնավաճառին մասնակից ընկերությունների թիվը 36-ն է, մոտ 400 թափուր աշխատատեղերի առաջարկով: Վերջին տարիների վիճակագրությամբ էլ աշխատաշուկայում մեծ պահանջարկ են վայելում IT և սպասարկման ոլորտների մասնագետները։

«Մեծ թվով խոհարարների, մատուցողների, մաքրուհիների կարիք ունենք մենք այսօր, հատկապես հյուրանոցային բիզնեսում և հասարակական սննդի բացվող վայրերում»,- ասում է Գյումրու զբաղվածության կենտրոնի տնօրեն Ամալյա Ադամյանը։

Շիրակը շարունակում է մնալ հանրապետությունում գործազրկության բարձր ցուցանիշ ունեցող մարզերի առաջին հորիզոնականում: Գյումրու զբաղվածության կենտրոնում գրանցված են 15 700 աշխատանք փնտրող քաղաքացիներ, նրանց մեջ գերակշռողը՝ 72 տոկոսը, կանայք են: Իրականացված ծրագրերի և գործատուների հետ համագործակցության արդյունքում, 6 ամիսների տվյալներով, մշտական աշխատանքի են տեղավորվել 785 գործազուրկներ։

Պետական ծրագրերից դուրս չեն մնացել նաև կենտրոնում գրանցված մասնագիտացում չունեցող երիտասարդները, որոնց համար կազմակերպում են  մասնագիտություն ձեռք բերելու և աշխատանքի տեղավորելու արագացված դասընթացներ։

Հանրապետությունում իրականացվող մինչև 2 տարեկան երեխայի խնամքի համար արձակուրդում գտնվող աշխատող մայրերի աջակցության ծրագրի ներդրման շնորհիվ մարզում ավելացել են նաև դայակ փնտրող ընտանիքների և դայակությամբ զբաղվել ցանկացողների թիվը։

Աշխատանք փնտրողների թիվը մեծ է նաև գյուղական բնակավայրերում։ Այս տարի պետական աջակցության ծրագրով Ախուրյանի տարածաշրջանի  լեռնային, սահմանամերձ ու բարձր լեռնային 12 գյուղական համայնքներում իրականացվում է սոցիալապես անապահով 45 ընտանիքների համար փոխհատուցում աշխատանքի ծրագիրը։

«Մենք տրամադրում ենք հողը մշակելու, հողի վրա աշխատանք կատարելու համար օրավարձի տեսքով: Տրամադրում ենք առավելագույնը մինչև 350 հազար դրամ գումար մեկ ընտանիքին՝ նվազագույնը 50 հազար դրամ»,- ծրագրի մասին մանրամասներ է ներկայացրել Ամալյա Ադամյանը։

Զբաղվածության կենտրոնի տնօրենն աշխատաշուկայում թափուր աշխատատեղերի առկայության ու դժվար համալրման պատճառները գործատուների ներկայացրած չափորոշիչներն ու պահանջներն է շեշտադրում, որոնք երբեմն մասնագիտության որակակական հատկանիշներին չեն համապատասխանում: Խնդիրը կարգավորելու համար սկսվել է մասնագիտությունների դասակարգման մշակման ու ներդրման գործընթաց, որից դուրս աշխատանք փնտրողներին  գործատուն մասնագիտական որակների այլ պահանջներ չի կարողանա ներկայացնել։