Աշխարհի ամենաբարձր գագաթները նվաճած հայազգի լեռնագնացը Ֆրանսիայից ոտքով կգա Հայաստան

Աշխարհի ամենաբարձր գագաթները նվաճած Ֆրանսահայ լեռնագնաց Արա Խաչատուրյանը նոր խնդիր է դրել իր առաջ: Հայազգի լեռնագնացն այս անգամ ոչ թե պիտի հազարավոր կիլոմետրեր հաղթահարի՝ բարձր գագաթներ մագլցելով, այլ մտադիր է Ֆրանսիայի Մարսել քաղաքից վազքով հասնել Երեւան: Այդ մասին «Իրավունքին» տեղեկացրել է Ա. Խաչատուրյանն ու հավելել, որ Հայաստան հասնելու համար պետք է հատի 10 երկրի սահման:

«ՎԱԶՔ ԽԱՂԱՂՈՒԹՅԱՆ»

«Աշխարհի ամենաբարձր գագաթը` Էվերեստը մագլցելուց հետո, որոշեցի` 2018-ին լինել Երեւանում: Նախ Ֆրանկոֆոնիայի միջազգային կազմակերպության 2018 թվականի գագաթաժողովը պիտի տեղի ունենա Երեւանում, ինչպես նաեւ 2018-ին կտոնվի Էրեբունի-Երեւանի 2800-ամյակը, այդ իսկ պատճառով վճռեցի վազքով Ֆրանսիայի Մարսել քաղաքից գալ Հայաստան` Երեւան: Դրա համար ամեն օր կանեմ մեկ մարաթոն, այն կտեւի մոտավորապես 103 օր: 2018-ի ապրիլի սկզբին կմեկնարկեմ մարաթոնը եւ իմ հաշվարկներով հուլիսի 10-ին կլինեմ Երեւանում: Նման մեծ մարաթոններ շատ եմ արել, բայց առաջին անգամ է, որ 100 օր պիտի վազեմ»,- ասաց, մեր զրուցակիցն ու շտապեց տեղեկացնել, որ մարաթոնն անվանել է վազք` խաղաղության. «Ուզում եմ Ֆրանսիան եւ Հայաստանը կապել իրար այս խաղաղության երթով: Ճանապարհին, անշուշտ, պիտի հատեմ տասը երկրի սահման, անցնեմ նաեւ Թուրքիայով: Քանի որ մեծ հայրս ու մեծ մայրս ջարդի ժամանակ մազապուրծ եղան, իսկ ես, հայրս ու մայրս Լիբանանի պատերազմի մեջ ընկանք, այս անգամ ուզում եմ խաղաղության համար վազք անել, ինչպես որ Էվերեստը մագլցեցի` Հայոց ցեղասպանության ճանաչման համար»:

ՆԱՄԱԿ ԷՐԴՈՂԱՆԻՆ

Մեր հայրենակիցն ասում է, որ Էվերեստի գագաթը նվաճել է ընկերոջ հետ գրազով, բայց Ֆրանսիայից Հայաստան վազքի մարաթոնի մտահղացումը սկզբում այլ է եղել. «Նախ Թուրքիայի նախագահ Ռեջեփ Էրդողանին նամակ գրեցի, մասնավորապես նշելով, որ այն, ինչ պատահեցավ 100 տարի առաջ հայերի հետ, դրա համար դուք հանցավոր չեք, այլ ձեր նախնիները, մենք սպասում ենք, որպեսզի Ձեր գլխավորած կառավարությունն ընդունի Հայոց Ցեղասպանությունը: Միայն Ձեր կառավարությունն է, որ կարող է ոչ թե` մեղադրվել դրա համար, այլ` ընդունել իր նախնիների կողմից իրականացված այդ ոճիրը: Նամակում նշել եմ նաեւ, որ իմ նախնիները նույնպես այդ ոճրի զոհերն են, իսկ ես` իրենց ողջ մնացած ժառանգը: Ուզում էի այդ նամակն անձամբ հանձնել Էրդողանին` Ֆրանսիայից վազքով Թուրքիա գնալով, հետո շարունակելով վազք-մարաթոնը դեպի Հայաստան, այդ միտքն ինձ մոտ հղացավ հենց Էվերեստի վրա: Բայց հետո որոշվեց անել խաղաղության վազք»:

ՀԱՋՈՐԴԸ ՄՏԱԴԻՐ Է ԼՈՒՍԻՆ ԲԱՐՁՐԱՆԱԼ

Image result for արա խաչադուրյանՄոտավորապես 20 լեռ մագլցած հայազգի լեռնագնացը մշտապես իր հետ տարել ու հպարտորեն ծածանել է Հայաստանի եռագույնը` աշխարհի ամենաբարձր գագաթներում: 8848 մետր բարձրությամբ Էվերեստը հաղթահարելուց հետո Ա. Խաչատուրյանին հանգիստ չի տալիս 2016-ի գարնանը Արցախում սկսված քառօրյա պատերազմը ու վճռում է գալ Հայաստան եւ անպայման լինել նաեւ Արցախում: Այդ այցի ժամանակ է, որ Ա. Խաչատուրյանը Երեւանում ՀՀ սփյուռքի նախարարության կողմից անձամբ է ստանում իր Էվերեստը մագլցելու համար արժանացած շքանշանը: Այդ ժամանակ հայազգի նպատակասլաց լեռնագնացը ՀՀ սփյուռքի նախարար Հրանուշ Հակոբյանին խոստանում է լուսին գնալ. «Շքանշանը ստանալիս, երբ Հրանուշ Հակոբյանն ասաց` էլ բարձր լեռ չկա, ո՞ւր պիտի գնաս, ասացի` եթե նյութականով ինձ օգնեք, լուսին կբարձրանամ: Տիկին Հակոբյանը ծիծաղեց ու ասաց` վազն անցիր…»:

Ավելի մանրամասն՝ սկզբնաղբյուր կայքում: