Ես շատ մտահոգված եմ. Շարմազանովը` ներքաղաքական վիճակի ու Վրաստանի դեպքերի մասին

Այսօր՝ հունիսի 24-ին, Էդուարդ Շարմազանովը հանդիպել է լրագրողների հետ: ՀՀԿ մամուլի խոսնակը անդրադարձել է Հայաստանի ներքաղաքական իրադարձություններին և սուր քննադատության ենթարկել իշխանությունների գործելաոճն ու նաև վիրավորական արտահայտություններ հնչեցրել:

Էդուարդ Շարմազանովն անդրադարձել է ինչպես տնտեսական ցուցանիշերին, ներդրումներին, այնպես էլ ներքին ու արտաքին հարաբերություններին` նշելով, որ այդ ոլորտներում իշխանությունները վարում են իր քաղաքական թիմի համար ոչ ընդունելի քաղաքականություն:

Էդուարդ Շարմազանովը, որը վերջին օրերում Վրաստանում էր, խոսեց նաև վրացական իրադարձություններից` ընդգծելով, որ ռուս-վրացական լարվածությունը չի բխում Հայաստանի շահերից, իսկ եղածի պատասխանատվությունը կրում են թե´ Ուղղափառության համաժողովի կազմակերպիչները, թե´ հյուրընկալող երկիրը, որ պարտավոր էր ապահովել մասնակիցների անվտանգությունը:

«Ես շատ մտահոգված եմ, որովհետև Ռուսաստանը մեր դաշնակից երկիրն է, Վրաստանը ևս, մեր հարաբերությունները երկու երկրների հետ ունեն դարավոր անցյալ և այս լարվածությունից չենք կարող որևէ դիվիդենտ շահել, թե´ տնտեսական առումով՝ Լարսի հետ կապված, թե´ քաղաքական առումով: Եթե սրան գումարենք, որ լարված է նաև հարաբերությունները ԱՄՆ և Իրանի միջև, ամեն դեպքում մեր հյուսիսային և հարավային դարպասները լուրջ մարտահրավերների առաջ են, և եթե բացասական զարգացումներ լինեն, շահողներ հաստատ չեն լինի»,- ասաց Շարմազանովը:

Շարմազանովը նշեց, որ ռուսական կողմից սխալ չի տեսնում, և եղածի պատասխանատվությունը կրում է կազմակերպիչն ու հյուրընկալող կողմը, քանի որ նրանք պարտավոր են ապահովել բոլոր մասնակիցների անվտանգությունը:

«Առաջին անգամ չէ: Երևանում էլ է եղել նման միջոցառում, որ ադրբեջանցիներ են եկել, որևէ էքսցես չի եղել: Աշոտյանն ու Թանդիլյանն են գնացել Բաքու, և որևէ լուրջ միջադեպ չի գրանցվել: Այդ իմաստով, եթե Ուղղափառության վեհաժողովի ղեկավարները գտել են, որ Թբիլիսիում պետք է լինի այդ նիստը, պարտավոր էին բոլոր պատվիրակությունների և նախագահող երկրի լիազորությունները պատշաճ կերպով պաշտպանել: Եթե կա սխալ, բացառապես կա´մ համաժողովի կազմակերպիչների, կա´մ հյուրընկալող երկրի կողմից է»,- ասաց Շարմազանովը: