Մանվել Գրիգորյանը պատրաստ է փոխհատուցել պետությանը հասցրած նյութական վնասը. պաշտպան

Մանվել Գիգորյանի և Նազիկ Ամիրյանի դեմ հարուցված քրեական գործի դատաքննության ժամանակ այսօր ամբաստանյալ Գրիգորյանը կրկին ներկա չէր: Դատարանը բանավոր տեղեկացել էր, որ նրան հնարավոր չէ տեղափոխել «Նաիրի» բժշկական կենտրոնից առողջական խնդիրների պատճառով:

Դատարանը հրապարակեց մի գրություն Պետական գույքի կառավարման կոմիտեից ստացված, որի համաձայն` Մանվել Գրիգորյանը «Ակնալճի կուղբաբուծական տնտեսություն» ԲԲԸ-ն նվիրաբերում է պետությանը` որպես պետությանը հասցված նյութական վնասի փոխհատուցում:

Նույն գրությամբ  Պետական գույքի կառավարման կոմիտեի նախագահ Նարեկ Բաբայանը հետաքրքրվել է, թե որքա՞ն է կազմում Մանվել Գրիգորյանի կողմից պետությանը պատճառված վնասի չափը և արդյոք արգելանք դրված է Գրիգորյանին պատկանող տնտեսության, անշարժ և շարժական գույքի վրա:

Հիշեցնենք՝ Գրիգորյանի պաշտպան Լևոն Բաղդասարյանը դեռևս 2018թ. հոկտեմբերին էր հայտնել կառավարությանը, որ Գրիգորյանը ցանկություն է հայտնել «Ակնալճի կուղբաբուծական տնտեսություն» ընկերության 329 հեկտար տարածքը նվիրաբերել Հայաստանի Հանրապետությանը։ Պաշտպանը տեղեկացրել էր, որ Գրիգորյանը պատրաստ է ընկերության 100 տոկոս բաժնեմասը տրամադրել պետությանը՝ արձանագրելով, որ այդ տարածքի շուկայական արժեքը մի քանի անգամ գերազանցում է պետությանը պատճառված ենթադրյալ վնասի չափը:

Կառավարությունը, իր հերթին, նվիրատվության գործընթացի կազմակերպումը հանձնարարել է Պետական գույքի կառավարման կոմիտեին։

Նարեկ Բաբայանը դատարանին նաև հայտնել էր, թե Հատուկ քննչական ծառայությունը տեղեկացրել է, որ իրենց  վարույթում գտնվող գործով հստակեցված չէ հանցագործությամբ պետությանը պատճառված վնասի չափը և առաջարկել է կոմիտեին հարցի քննարկումը հետաձգել մինչև վնասի չափը պարզելու համար քննչական և դատավարական գործողությունների ավարտը։ Լևոն Բաղդասարյանն ասաց, որ Գրիգորյանը մեղադրվում է նաև հարկերից խուսափելու համար, իր պաշտպանյալը պատրաստ է  փոխհատուցել այդ վնասը, սակայն տեխնիկական պատճառով գործընթացը չի կատարվում.

«Իմ պաշտպանը զրկված է օրենքով նախատեսված՝ վնասի չափը փոխհատուցելու իրավունքից»:

Դատավոր Մնացական Մարտիրոսյանը նկատեց, որ գործի նյութերը դեռևս չեն հետազոտվել: Այս պահի դրությամբ արգելանք է դրված Գրիգորյանի, նրա մերձավորների ամբողջ գույքի, այդ թվում բաժնետոմսերի, տրանսպորտային միջոցների վրա։ Դատարանը նկատեց, որ նախ` պետք է քննարկվի գույքն արգելանքից հանելու միջնորդությունը, ապա նոր վնասի փոխհատուցման հարցը։ Սակայն այդ քննարկմանը պետք է ներկա լինի ամբաստանյալը:

Դատական կիստը հետաձգվեց մինչև հունիսի 25-ը: