Կառավարությունում չեն ընդունում, որ Երևանում ԴՏՏ-ի երկու գերեզմանոց կա. Միքայել Մանրիկյանն իրենց հաջորդ քայլի մասին

SHANTNEWS.am-ը մի քանի անգամ է անդրադարձել Էրեբունի վարչական շրջանի տարածքում գտնվող ԴՏՏ-ի գերեզմանոցին՝ նաև արձանագրելով, որ գերեզմանոցի ցանկապատը պոկված է, և գողություն է կատարվում:

Հիշեցնենք, որ ավելի քան 1000 տոննա ԴՏՏ-ն թաղվել է ցորենի արգելանոցի դիմաց:

ՀՀ ԱՆ Հիվանդությունների վերահսկման և կանխարգելման ազգային կենտրոնի շրջակա միջավայրի հիգիենայի բաժնի աշխատակիցներ են տարածք այցելել, հողի, ջրի փորձանմուշներ վերցրել: Վարակվա՞ծ է հողը ԴՏՏ-ով կամ այլ թունաքիմիկատով՝ լաբորատոր  փորձաքննությամբ են այս հարցի պատասխանը տալու, որը ևս ուշանում է:

Ավելի վաղ Երևանի ավագանու «Բարգավաճ Հայաստան» խմբակցությունից SHANTNEWS.am-ին ասվել է, որ Էրեբունի վարչական շրջանի տարածքում թաղված ավելի քան 1000 տոննա ԴՏՏ-ի գերեզմանոցի խնդրով զբաղվելու համար հանձնաժողով ձևավորելու առաջարկ են արել:

«Համապատասխան դիմումները ներկայացված են եղել քաղաքապետին: Յուրաքանչյուր խմբակցությունից առաջարկվել է երեքական անդամ: Դրական պատասխանել են «Իմ քայլը»-ը դաշինքը, «Լույս» դաշինքը, սակայն, իրավաբանական վարչությունից մերժում է եղել մի պարզ պատճառով, որ նշված չի եղել, թե ժամանակավոր խումբը, հանձնախումբը ինչ ժամկետով է ստեղծվում: Բոլորս էլ գիտենք, որ ժամանակավոր  հանձնախումբը ստեղծվում է  ընդամենը երկու ամսով»,- ասել է Մանրիկյանը:

Ըստ Երևանի ավագանու «Բարգավաճ Հայաստան» խմբակցության ղեկավարի՝ իրենք հանդիպել են Երևանի քաղաքապետարանի բնապահպանության վարչության պետ Խաչիկ Հակոբյանի հետ, ով ասել է, որ կառավարությունում խումբ է ստեղծվել: Խոստում կա, որ վերջնական պարզաբանումներ կտրվեն մինչև հունիսի 24-ը: Ամեն դեպքում, ըստ Մանրիկյանի, խոսվում է միայն Նուբարաշենի գերեզմանոցի մասին:

«Հետագայում անպայման կլինեն բաց լսումներ, որը կկազմակերպի մեր խմբակցությունն այդ թեմայի շուրջ: Կհրավիրեն կառավարության հանձնախմբի անդամներին, որպեսզի զեկուցեն՝ մինչ այսօր ինչ աշխատանքներ են կատարվել, բայց, կարծես, տեղում դոփում են աշխատանքները: Կառավարության խումբը չի ընդունում, որ խոսքը տարբեր գերեզմանոցների մասին է: Եթե ընդուներ, բնապահպանության վարչության պետը տեղեկացված կլիներ, ինքը շատ զարմացավ, երբ մենք նշեցինք, որ երկու գերեզմանոց է, որովհետև պարոն Հակոբյանը այդ հանձնախմբի աշխատող է, որը ներկայացնում է Երևանի քաղաքապետարանը: Նաև երկրորդ դիմումը կներկայացնենք մեր հարգարժան գործընկերների համար` նշելով, որ խումբը ստեղծվում է երկու ամիս ժամկետով»,- հավելել է Երևանի ավագանու «Բարգավաճ Հայաստան» խմբակցության ղեկավարը:

Ինչ վերաբերում է բաց լսումներին, ապա դա, Միքայել Մանրիկյանի խոսքերով, կկազմակերպվի հուլիսի սկզբին:  Տարածքում ապրող բնակիչներից բազմաթիվ բողոքներ են ստացել:

«Անձամբ այցելել ենք, զգացել տոքսիկ նյութերի առկայությունը թե´ գլխապտույտների, թե´ սրտխառնոցների, թե´ մաշկի ցանի արտահայտությամբ: Ես բժիշկ եմ և շատ լավ տիրապետում եմ դրան: Սա մեր ամենօրյա հսկողության տակ է, ուղղակի կա պայմանավորվածություն 10 օր սպասելու, մենք այդ 10 օրը սպասում ենք»,- ասել է Միքայել Մանրիկյանը: